Read lega-mwenga Misako 14 Bible Online

Misako 14 - lega-mwenga bible

Misako 14

¹Nu beingide mu numba za musanganano wa baYuda ku Ikonio, nu beigisizie, nu bantu beingi ba baYuda nu baGeleka bakatizizie.

²Tondo baYuda babo batakatizizie balutile babo baBilongo nu bababikile makengelo mabi ku mibuto.

³Nu beizizizie kuko, basambede na luatu mu kukatizia Mukota, balongekede idagi lia mponga zage, nu bakitile migeleko nu maganogano na maboko mabo.

⁴Tondo musanganano wa mu wozo muino wibeganizie; bamozi babeide ku lulenge lua baYuda, nu bango ku lulenge lua basingua.

⁵Nu gabeide misona za baBilongo nu za ba Yuda nu za bangati babo, bababengile, nu kubalibula makozi,

⁶bamenyine bubo, nu batinine ku mino za Lukanonia, nu Lusta, nu Delebe, nu ku kisi kiabezaga muntungo:

⁷nu kuko basambalaga musagu musoga.

⁸Nu ku Lusta muntu umozi, abezaga kitunga ku magulu, uwabutilue, ntatabangaga nunse.

⁹Muntu wono ongule ku kusambala Paolo: nu Paolo amulolile kisozi nu amenyine buno, anakatizia buno onibue,

¹⁰atendile neiyuki inene bune, Emanuka ku magulu mobe. Nu asasizie kuemanuka nu atabangile.

¹¹Nu gamonine musanganano bubo buakitile Paolo, balalukile na moki mabo, batendile ku mutendezi wa kiLukoni bune, Tulaga tuatugelela ku kisusania kia bantu.

¹²Nu bamanine Balanaba, buno, Yupita, nu Paolo, Mekulio, kubuno we uwalingile kutenda.

¹³Nu sankoga wa numba za musanganano za Yupita zabezaga kuisula lia muino, avule na ngombe nu nkumbu za maluba ku nibi za mu muino, nu atundaga kukita kisansa gamozi na musanganano wa bantu.

¹⁴Tondo gongule basingua Balanaba nu Paolo ku bubo, batile nsulu zabo, nu bazugide musanganano, balalukile bune,

¹⁵Bamulume, kubuni kumukukitila bubuno? Nuisue tuli bantu anga inyue; nu tukumuigisia musagu musoga buno mugaluke ku Kalaga uli Mulami nu kusiga misako zeno zitongana, kubuno Kalaga uwakitile igulu nu kisi nu kitatenge, nu binsania bili mubio:

¹⁶wakalazi asigile baBilongo bansania buno bende bubakutunda.

¹⁷Tondo ntabasigile kuteli bulongeki, akitile busoga nu abalokezizie mbula za kuigulu nu nkungu za kunagia biguma, eiyazizie mitima zeinyu neidia nu mbogimbogi.

¹⁸Nu ku kutenda bubuno musanganano tawabakitide kisansa.

¹⁹Tondo bango baYuda batukile ku Antiokia, nu ku Ikonio: nu bavule buno balubikanie nu bagalukie makengelo ma musanganano; balibuide Paolo makozi, nu bamubulutile kuisula lia muino, bakengede buno, akua.

²⁰Tondo beigisibua gababezaga bekumutimba, bamutimbikania, emanukile nu eingide lingo mu muino; nu gakeide busi endile na Balanaba ku Delebe.

²¹Nu gabasilile kusambala musagu musoga mu wozo muino, nu balutile beingi nubo babeide beigisibua, basubizie ku Lusta nu Ikonio nu Antiokia,

²²galindizie mitima za beigisibua, babamanine beikale mu bukatizio, nu ku nsungio ningi tuatunganana kuingila mu bukota bua Kalaga.

²³Nu gabasilile kusombola bakulu ba ekelezia na ekelezia, basegile nu tabalile, bababikile mu maboko ma Mukota ubakatizizie.

²⁴Nu batingile mu Pisidia, nu bavule ku Pamfulia.

²⁵Nu gabasilile kusambala idagi ku Pelega, bagelile ku Atalia;

²⁶nu kutuka kuko bendile na buato aba ku Antiokia, ukuko kubabikilue mu mponga za Kalaga ku mulimo ubasilizizie.

²⁷Nu gababasile nu kukundamania ekelezia, babasambalide bunsania buabakitide Kalaga, nu anga buigulide baBilongo luibi lua bukatizio.

²⁸Nu beizizizie kuko na beigisibua.