Read lega-mwenga Misako 22 Bible Online

Misako 22 - lega-mwenga bible

Misako 22

¹Bamulume, mibuto zane, nu batata, nunguililazi nimusambalile.

²Nu gabongule ekutenda mutendezi wa kilibelo, beikeide kibibi: abatendile bune,

³Nne nili muYuda, nabutilue mu Taliso Kilikia, nunne nakulile mu muino wozo, na Gamaliele, nu neigisizibue mulembe wa batateisue mu lukita lubibu, nu nabeide na kitule kinene ku Kalaga, anga bumuli inyue bansania lelo:

⁴nu nababazizie bantu ba zeno Nzila nu kubeita, nabakandile, nababikile mu bikando, bamulume nu bakikulu.

⁵Anga buandongekelaga sankoga munene nu bakulu bansania: nubo bankasaga mikanda ku mibuto zeitu, nu nendile ku Dameseke kutola babo babezaga kuko nu kuvua na bakandua nu kubeikia ku Yelusalema buno bakandue nu kubasungia.

⁶Nu ganabezaga mu lugendo, ganabede nise buigi na Dameseke, mu nkungu za makuluka, kitangala besi kiengi kinene kiatukile kuigulu, kiansanine.

⁷Nu naguide gansi, nu nongule kuiyuki liambuide bune, Saolo, Saolo, kubuni kukumbabazia?

⁸Nu nakuide bune, uwe unazi, Mukota? Nu ambuide bune, Nne u Yesu wa Nazaleta, ukubabazia.

⁹Nu babo banabezaga nabo bamonine ku kikio kiengi, tondo tabongule ku lilio iyuki linatendaga nalio.

¹⁰Nu nabuzizie buno, Mukota, nkite buni? nu Mukota ambuide buno, Emanuka, nu wende ku Dameseke; nu kuko wasambalilue bunsania buwakakizibue buno ukite.

¹¹Nu nabezaga nsikumona ku kabamba ka kikio kiengi kiankelimine, nasondelezizibue na babo banabezaga nabo, nu navule ku Dameseke.

¹²Nu muntu umozi abezaga kuko izina liage Anania, mukatizia nu mukiti wa mulembe wa Mose, alumbibagua busoga na baYuda bansania babezaga mumo;

¹³anvuilide, nu emene buigi nanne, abuide bune, Mubuto wane, Saolo, mona. Nu nkungu zezo namulolile.

¹⁴Nu ambuide bune, Kalaga wa batateisue akusombola buno umenye kusombola kuage, nu kumona ku Wozo Weisanana, nu kungua kuiyuki likutuka mu kanua kage.

¹⁵Kubuno wabe mulongeki wage ku bantu bansania ku bubuno buwamona kubo, nu buwongua kubo.

¹⁶Nu kano kaluma kubuni ukulindila? zanzuka, nu ubatizibue, nu usugue misako za buagi buobe, nu sega muizina liage.

¹⁷Nu ganasubizie ku Yelusalema, nabezaga nkusega mu numba za kukumbamina, nendile kalengoe,

¹⁸nu namumonineko nu antendile bune, Sasia, tuka ku Yelusalema; kubuno tabakatizie bulongeki buobe bua musagu wane.

¹⁹Nunne natendile bune, Mukota, babo bebenyene beizi buno, nne nabezaga nkubakanda mu kikando, nabalibulaga mu numba na numba za musanganano babo bekukatizia:

²⁰nu mikila za Setefano mulongeki wobe zabasile, nunne nabezaga nimine gago, nu neitabizizie, nu nalangaga nsulu za babo bamuitaga.

²¹Nu ubuambuide lino bune, Enda: kubuno nkakusinga bulazi ku baBilongo.

²²Nu bamunguilide ku bubo bunsania; nu balalukile nunse, nu batendile bune, Tikiazi wono ga kisi, ta busoga ndi alama.

²³Nu balalukile nu kuta nsulu zabo, nu kuisa mukungu mu mpelela,

²⁴wozo mukota munene akakizizie buno, bende nabo ku numba nnene za mukota, atendile buno bamugeleke kumulibula, buno amenye kabamba kakizi kabamukitilaga kazege.

²⁵Nu gabasilile kumukanda na mizigi, Paolo abuide mukota wa bakoloboyo wabezaga buigi bune, Ndi muli na buangato bua kulibula muntu wa Loma, nuwe ntesungibua?

²⁶Nu wozo mukota wa bakoloboyo gongule ku bubo, endile kua mukota munene wa bita amutendile bune, Ukukita kikizi? kubuno wono muntu eli muLoma.

²⁷Nu wozo mukota munene wa bita amuvuilide, nu amubuzizie bune, Mbule ndi uli muLoma? Nu amutendile bune, E.

²⁸Nu wozo mukota munene wa bita amubuide bune, Ku bikulo bingi nakunzile buangato bubuno. Nu Paolo amubuide bune, Tondo nne nili muLoma kukubutua.

²⁹Kubuno babo batundaga kumubuzia bamusigile: nu wozo mukota munene wa bita akule boba, gamenyine buno, eli muLoma nu buamukandide.

³⁰Tondo gakeide busi atundile kumenya nunse buni buamusongede baYuda, amukanduide, nu akakizizie basankoga banene nu bakazi ba luango bakundamane, nu agezezie Paolo gansi nu amubikile lisa nabo.