Read lega-mwenga Misako 4 Bible Online

Misako 4 - lega-mwenga bible

Misako 4

¹Nu gabatendaga na bantu, basankoga, nu mulangi wa numba nnene za kukumbamina, nu basadoke babavuilide,

²babezaga na kabebe nunse, kubuno babezaga bekuigisia bantu, nu kusambala buno, iyukilo lia bakuzi lili mu Yesu.

³Babakatile nu bababikile mu kikando aba nu mu nindunindu: kubuno buabezaga buse muigolo.

⁴Tondo beingi ku babo bongule ku wozo musagu bakatizizie; nu maganzo ma bamulume makukile tununu tutano.

⁵Nu gabeide buse nindunindu, bakundamaninue mu Yelusalema, bangati nu bakulu, nu basanzi;

⁶nu Anasa sankoga munene, nu Kayafa, nu Yoana, nu Alesandelo, nu bansania babezaga ba kikanga kia sankoga munene.

⁷Nu gabababikile munkatini muabo, bababuzizie bune, Ku magala makizi, aba kuizina lia nazi, ku muakitile bubuno?

⁸Umpanga Petelo, eiyede na Muuza Wasililila, ababuide bune, Bangati ba bantu nu bakulu balsalele,

⁹ndi isue tuabuzibua lelo misagu za bubuno busoga buakitidue wono muntu musosu, aba ku lukita luonizibue;

¹⁰menyazi buno, inyue bansania, nu bantu bansania balsalele, buno muizina lia Yesu Klisto wa Nazaleta, wozo gumuatakile, wayukizie Kalaga ku bakuzi, kuizina lilino ukuemana mugimagima kumuli.

¹¹Wono u ikozi limuasombile inyue bobaki, liabikilue ikozi inene lia kapindapinda.

¹²Nu takuli lonio mu ungo: kubuno takuli lingo izina kunsi kuigulu, liakasilue munkatini mua bantu, liatunganana konibua kulio.

¹³Nu gabamonine ku bupuka bua Petelo nu Yoana, nu bamenyine buno, beli anga bantu beteli na menge, tondo beli anga bikongolo, bangamine: nu babamenyine buno babezaga na Yesu.

¹⁴Nu gabamonine ku wozo muntu wonezibue, emana gamozi nabo, tababezaga na bua kubakula.

¹⁵Tondo gabasile kubembia buno batuke ku bangati, bakalile luango bune,

¹⁶Buni butukita bantu babano? kubuno bakitile kalolesio keligo, takabisama ku bantu bansania beli mu Yelusalema; aba tatunavuama kukatuna.

¹⁷Tondo bubuno bunavua kukuka ku bantu bansania, busoga ndi tuabeitia boba, buno batende na muntu kuizina lilino.

¹⁸Nu babamanine, nu babazugide nunse buno, tabatende, aba tabeigisie lingo kuizina lia Yesu.

¹⁹Tondo Petelo nu Yoana babakuide bune, Ndi buisanana ku Kalaga kumuanza kutinga kuanza Kalaga, sombolazi:

²⁰kubuno isue tatunavuama kumenkela kutenda butuamonine kubo nu butungule kubo.

²¹Nubo, gababeitizie na boba lingo, babasigile, tabamenyine bubabasungia, ku kabamba ka bantu; kubuno bansania baganunaga Kalaga ku bubo buabede.

²²Kubuno muntu wono wakitidue kalolesio kakano ka kona, abezaga esakuka miaka zatinga makumi manazi.

²³Gabakanduidue, bendile ku bantu babo, nu basambede bunsania bubabuidue na basankoga banene nu bakulu.

²⁴Nubo, gabongule, basegile na mutima umozi, ku Kalaga, batendile bune, E, Mukota, wakitile meigulu nu kisi nu bitatenge, nu binsania bilimo;

²⁵watendile na Muuza Wasililila ku kanua ka tateisue Davidi, mukambi wobe bune, Kubuni baBilongo bekuikaka, Nu bantu bakengela butakulungana?

²⁶Bakota ba kisi bemene, Nu bangati bakongene, Gantata ga Mukota, nu gantata ga Klisto wage:

²⁷kubuno buligo, Helode nu Pontio Pilato nu baBilongo nu bantu balsalele, bakundamene mu muino wono ku kabamba ka Mukambi wobe Wasililila, wono Yesu, uwabongezie makuta,

²⁸buno bakite anga kuboko kuobe nu luango luwakalile kutukila wakalazi.

²⁹Nu kano kaluma, Mukota, lola bubekutuitia boba, kasa bakambi bobe magala ma kusambala idagi liobe na luatu,

³⁰lambia kuboko kuobe konia; nu tulolesio nu maganogano makitue kuizina lia Mukambi wobe Yesu Wasililila.

³¹Nu gabasilile kusega, gago gababezaga bakundamana gatengiletengile, bansania beiyede na Muuza Wasililila nu basambede musagu wa Kalaga na luatu.

³²Nu kikanga kiabo bakatizizie babezaga na mutima umozi nu makengelo mamozi: takuabede umozi watendile buno, kinsania kieli nakio kili kiage wenyene; tondo babezaga bekubegana biabo binsania.

³³Nu ku magala manene basingua balongekile buiyukilo lia Mukota Yesu: nu mponga nnene zakitile ku babo bansania.

³⁴Kubuno takuabezaga wiyaninaga kubeli: kubuno bantu bansania babezaga na bibanza, aba numba, bazikunzisizie nu bavule na bukunza bua bibio biakunzagia;

³⁵nu babibikile lisa na basingua nu biabeganizibue kubeli anga buiyaninaga muntu na muntu.

³⁶Nu Yosefu, wamanagua na basingua Balanaba (buisulilua bualio, muana wa kubobelezia), muLewi, muntu wa kilongo kia Kupulio,

³⁷abezaga neisoa, alikunzizie, avule na bikulo bialio ku basingua, nu babibikile gansi gasamba magulu mabo.