Read lega-mwenga Misako 5 Bible Online

Misako 5 - lega-mwenga bible

Misako 5

¹Tondo muntu umozi wamanagua Anania, nu Safina mukikulu wage, akunzizie isoa liabo,

²beibindikide nkindi nkeke ku bibio bibakunzagia, nu mukikulu wage amenyine bubo, nu avule na nkindi nkeke ku basingua.

³Tondo Petelo amubuide bune, Anania, kubuni Satana eizazia mutima wobe kuengelela Muuza Wasililila, weibindikila nkindi nkeke ku biwakunzagia kuisoa?

⁴Galiabezagile ndi taliabezagile liobe? Aba galiasilile kukunzua, ndi taliabezagile ku buangato buobe? Kubuni kuwakengede mu mutima wobe kukita bubuno? Ntueka bantu buza, tondo Kalaga aguweka buza.

⁵Anania gongule ku bubo, aguide, nu alekene: nu bansania gabongule ku bubuno bakule boba nunse.

⁶Nu basikila bamukandile, nu bamuekile kumbuga nu bamuyikile.

⁷Gabeide gatinga nkungu isatu, mukikulu wage eingide nu ntamenyine buabezagako.

⁸Nu Petelo amuakuide bane, Ntende ndi wakunzizie isoa ku bukunza bubuno. Nu atendile bune, Bubo ububuli.

⁹Tondo Petelo amubuide bune, Buni bumuagomanizie ku kulindika Muuza wa Mukota? lola, magulu ma bekaga iba wobe bamuyikaga, beli ku muingilo, nubo bakukueka kumbuga.

¹⁰Nu kazanga kongo aguide, nu alekene: nu basikila bengidemo nu basangile: esalekana nu bamuekile, bamuyikile gamozi neiba wage.

¹¹Nu boba bunene buabede ku ekelezia linsania, nu ku bansania bonguaga ku bubo.

¹²Nu ku maboko ma basingua kuakitilue migeleko nu maganogano meingi munkatini mua bantu; nubo bansania babezaga na mutima umozi ku lusu lua Solomo.

¹³Tondo ku bango bansania takuli umozi wagelekile kugomia nabo: tondo bantu babaganuine,

¹⁴nubo bakatizizie batalikidue ku Mukota, nu betide beingi bamulume nu bakikulu:

¹⁵nu bekile basambi mu nzila, nu bababikile ga bisasa nu ga migu, buno, Petelo gavue, embe nti kilimelime kiage kiatinge ku umozi wa kubeli.

¹⁶Nu misanganano zatukile ku mino zabezaga buigi na Yelusalema, bekile basambi bakuaga na basumbu: nu bansania bonezibue.

¹⁷Tondo gatukile sankoga munene, nu bansania babezaga gamozi nage (ubakikanga kia Basadoke), babeide na lugi,

¹⁸nu bakatile basingua, nu bababikile mu kikando.

¹⁹Tondo mugenzi wa Mukota akanduide nibi za kikando mu kindi, abatikizie, atendile bune,

²⁰Endazi, muimane mu numba nnene za kukumbamina, nu mubule bantu bunsania bua Kalamo kakano.

²¹Nubo gabongule ku bubo, beingide mu numba nnene za kukumbamina, nindunindu, nu beigisizie. Tondo sankoga munene avule na babo babezaga nage, bakundamanizie ngatu, nu bakulu bansania ba bana balsalele, nu basingile bantu ku kikando buno bavue nabo.

²²Tondo bakiti gababasile tababamonineko mu kikando: nu bavule na musagu,

²³nu batendile bune, Tuasangile kikando kiakandua nunse, nu balangi bemine ku nibi; tondo gatueguide tatuamonine ku muntumo.

²⁴Gabongule ku bubo mulangi wa numba nnene za kukumbamina nu basankoga banene, tabamenyine bubatenda, nu buabe kuzinda kua bubo.

²⁵Nu kuavule umozi nu abasambalide musagu bune, Unguililazi, bantu babo bamuabikile mu kikando, beli mu numba nnene za kukumbamina, bemana, nu bakuigisia bantu.

²⁶Nu mulangi endile na bakiti, nu bavule nabo, tondo tababasikuide; kubuno bakule babo bantu boba, banavua kubalibula makozi.

²⁷Nu gabavule nabo bababikile ku ngatu, nu sankoga munene ababuzizie,

²⁸nu atendile bune, Ndi tatuamuzugide bubibu buno, tamuigisie lingo kuizina lilino: nu lolazi, muakukia Yelusalema na meigisia meinyu, nu mukutunda kutulusizia mikila za muntu wono gantata geitu.

²⁹Tondo Petelo nu basingua bakuide bune, Buatutunganana kuanza Kalaga kutinga bantu.

³⁰Kalaga wa batateisue ayukizie Yesu, gumuitile nu umuatakile ku muti.

³¹Kalaga asakikile wono na kuboko kuage kuaseidume, buno abe Muangati nu Monia, akase balsalele kuiyania nu kusigililua ku misako za buagi buabo.

³²Nu isue tuli balongeki ba bubuno, na Muuza Wasililila, wakasile Kalaga ku bansania bekumuanzaga.

³³Gabongule ku bubuno, beinine mitima, nu bakalile luango buno babeite.

³⁴Tondo muntu umozi, wa baFalese, izina liage Gamaliele, ngatu za mulembe, anzagua na bantu bansania, akakizizie bakambi buno bababasie kumbuga tanga.

³⁵Nu ababuide bune, Inyue bamulume ba Isalele, idangazi na bumukukitila bantu babano.

³⁶Kubuno ku bingo bindi biatingile Yeuda abasile, atendile buno, we eli muntu munene; nu bantu anga nkama inazi bamuyangile; nuwe akule nu bansania bamuitabizizie bandabene.

³⁷Kumbusa kuage kuabasile Yudasa wa Galela mu bindi bibino bia kusanzua kuidigo, nu alubikanizie bantu beingi kumuyanga; nuwe azimine; nu bansania, bamuitabizizie, bandabene.

³⁸Nu kano kaluma nkumubula bune, Tamunangana na bantu babano, basigazi: kubuno luango luluno aba mulimo wono ndi watukile ku bantu, nti wakue:

³⁹tondo ndi luli lua Kalaga, inyue tamunavuama kuluita, munaba anga bekusaka na Kalaga.

⁴⁰Beitabizizie bubo buatendile: nu bamanine basingua, babalibuide nu babazugide buno tabatende lingo muizina lia Yesu, nu babasigile.

⁴¹Batukile ku ngatu na mbogimbogi kubuno bamonekile anga batananina kusungibua ku kabamba keizina lilio.

⁴²Nu busi na busi, mu numba nnene za kukumbamina, nu mu numba zabo, tabamenkile kuigisia nu kusambala musagu musoga wa Yesu buno u Klisto.