Read lega-mwenga Misako 7 Bible Online

Misako 7 - lega-mwenga bible

Misako 7

¹Nu sankoga munene atendile bune, Ndi bubuno buligo?

²Nuwe atendile bune, Mibuto zane, nu batatane, unguililazi: Kalaga wa lutanuno abaside tateisue Abalahama, gabezaga ku Mesopotamia, nti nteikala ku Halana,

³amubuide bune, Tuka mu kisi kiobe, nu mu kikanga kiobe, nu enda ku kisi kinakulolesie.

⁴Umpanga atukile mu kisi kia Kalalia, nu eikalile mu Halana: nu atukile kuko kusila kua lukuo lueisi, Kalaga amuigizie mu kisi kikino kimuikile mukio kano kaluma:

⁵nu ntamukasile bupieni mukio, aba kabe keibikila ga magulu mage; nu amulagile buno amukasekio buno kibe buangato buage, nu bua kikanga kiage kumbusa kuage, gabezaga ntebuta.

⁶Nu Kalaga atendile buno, kikanga kiage kikeikala mu kisi kite kiabo, nubo bakaba bakobe babo bakabakitila bubi miaka nkama inazi.

⁷Nu kilongo kikababika bakobe nkakisungia, ubuatendile Kalaga: nu kusila kua bubo bakatuka, nu bakankumbamina mu kiziki kikino.

⁸Nu amukasile idagano lia kumonesibua: nu Abalahama abutile Isaka, nu amumonesezie gabezaga ese bindi kinana; nu Isaka abutile Yakobo, nu Yakobo abutile batateisue ikumi na babili.

⁹Nu batateisue, babeide na lugi ku Yosefu, bamukunzizie ku Ezipeto: nu Kalaga abezaga nage,

¹⁰nu amutikizie mu milondo zage insania, nu amukitide mponga nu amukasile menge ku Falao mukota wa Ezipeto; nu amubikile muangati wa Ezipeto nu wa numba zage insania.

¹¹Nu kuabeide munganda mu kisi kinsania kia Ezipeto nu Kanana, nu milondo mingi: nu batateisue tababezaga neidia.

¹²Tondo gongule Yakobo buno, Kuli idia ku Ezipeto, alingile kusinga batateisue.

¹³Nu ku lia mabili Yosefu eimenesizie ku beiselenzi nu muto wage; nu kikanga kia Y osefu kiamenyinue na Falao.

¹⁴Nu Yosefu abasingile, nu amanine isi Yakobo, nu kikanga kiage kinsania, babezaga bantu bakuka makumi mutuba kamo nu batano.

¹⁵Nu Yakobo abasile ku Ezipeto, nu akule, nu batateisue nubo bakule;

¹⁶nu bekilue aba ku Sikeme, nu bayikilue mu nsinda zakunzaga Abalahama ku bukunza bua feza ku bana ba Emola wa Sikeme.

¹⁷Tondo gakukile nkungu zeidagano lia Kalaga lialagile Abalahama, bantu betide kuba beingi mu Ezipeto,

¹⁸aba nu ungo mukota wangatile mu Ezipeto, utamenyaga Yosefu.

¹⁹Wozo akitide kikanga kietu bubi, nu asungizie batateisue, nu abakakizizie buno beise bana bato babo, buno banakivua kulama.

²⁰Mu zezo nkungu, Mose abutilue, abezaga muana musoga nunse; alisizibue miezi isatu mu numba zeisi:

²¹nu gesilue, mukinga wa Falao amusongezie, nu amulisizie anga muana wage.

²²Nu Mose eigisizibue menge mansania ma Ezipeto; nu abezaga mubibu ku kutenda kuage nu mu makitilo mage.

²³Tondo miaka zage gazakukile miaka makumi manazi, akengede mu mutima wage buno atabangide mibuto zage, bana balsalele,

²⁴Nu gamonine mubuto wage ekukitua bubi, amukasizie, nu amusubile, nu alibuide wozo muEzipeto wabengaga mubuto wage:

²⁵akengelaga buno, embe mibuto zage banamenyinina buno, Kalaga abakasa bukuluzi ku kuboko kuage, tondo tabamenyinine.

²⁶Nu bungo busi asangile bekusaka, atundaga buno abasunge, nu atendile bune, Inyue bakota bane, muli mubutua, buni bumukukitilana bubi?

²⁷Tondo wozo wagilaga munyage amusindikile, nu atendile bune, Nazi wakubika mukota nu ngatu zeitu?

²⁸Ndi ukutunda kunita anga buwitile muEzipeto walubi?

²⁹Nu Mose atinine gongule ku bubo, abeide mugeni mu kisi kia Midiane, nu abutile bana babili kuko.

³⁰Nu gasilile miaka makumi manazi mugenzi wa Mukota wamubaside mu kalula ku muiduko wa Sinai, mu ngulumina za keiya mu kilindi.

³¹Nu Mose gamonine ku bubo, angamine na bubo buamonine kubo: nuwe asigelede buigi buno amone, nu iyuki lia Mukota liamubaside bune,

³²Nne Kalaga wa baso, Kalaga wa Abalahama, nu wa Isaka, nu wa Yakobo. Nu Mose agilimine, nu ntavuamine kulola,

³³Nu Mukota amubuide bune, Gondola bisalapata ku magulu mobe: kubuno kiziki kiwemana gakio kili kisi kiasuagibua.

³⁴Lebelebe namona ku mbabazio za bantu bane beli mu Ezipeto, nu nongua ku kutonga kuabo, bubo ubunagela kubatikia: nu kano kaluma nakusinga buno wende ku Ezipeto.

³⁵U wozo Mose ubasombaga, bamutendile bune, Nazi wakubikile mukota nu ngatu zeitu? uwozo wasingilue na Kalaga kuba mukota nu monia ku kuboko kua wozo mugenzi wamubaside mu kikio kilindi.

³⁶Wozo uwabatikizie, gakitaga migeleko nu tulolesio ku Ezipeto, nu mu kitatenge kia Kisimana, nu mu kalula miaka makumi manazi.

³⁷W ozo Mose uwabuide bana balsalele bune, Mukota Kalaga weinyu akamusakikila mulengania munkatini mueinyu, anga bundi.

³⁸We eli wozo wabezaga mu ekelezia mu kalula gamozi na wozo mugenzi watendaga nago ku muiduko wa Sinai, nu na batateisue; uwakatile idagi lia kalamo, buno atukasilelio; uwakasilue makakizio ma kalamo, buno atukasemo:

³⁹nu batateisue tabatundile kumuanza, tondo bamusindikile, nu makengelo mabo mabeide ku Ezipeto,

⁴⁰nu babuide Alona bune, Tukitile tulaga, buno tutusondelezie; kubuno wozo Mose watutikizie mu kisi kia Ezipeto, tatuizi lingo kueli.

⁴¹Nu bakitile muana wa ngombe bubo busi, nu bakasile kisansa ku zezo nkisi, nu babogedebogede milimo za maboko mabo.

⁴²Tondo Kalaga abasigile bakumbamine iyombo lia mpelela; anga buasanzilue mu mukanda wa balengania bune, Ndi muankasile nyama zitilue nu za bisansa Miaka makumi manazi mu kalula, inyue numba za Isalele?

⁴³Nuinyue muekile numba za nsulu za Moleke, Nu lukenikeni lua kalaga kako Lefani, Nkisi zimuakitile buno muzikumbamine: Nunne nikamuigia buno muende bulazi kutinga Babelona.

⁴⁴Lulo lusu lua bulongeki luabezaga na batateisue mu kalula, anga buakakizizie wozo watendaga na Mose, buno akite anga lukita luamonineko.

⁴⁵Nubo batateisue balukasene, nu baluingizizie na Yosua mu bukota bua baBilongo, babo beimbibagua na Kalaga ku batateisue, aba ku busi bua Davidi;

⁴⁶nuwe atananizizie Kalaga, nu asegile kulondela Kalaga wa Yakobo kiziki kia kumobakila.

⁴⁷Tondo Solomo uwamubakide numba.

⁴⁸Tondo wozo Munene uli muigulu ntaneikala mu numba zakitilue na maboko anga buatendile mulengania bune,

⁴⁹Igulu lili kisumbi kiane, Nu kisi kili kiziki kia kubikila magulu mane; Numba nkizi zimukanobakila? ubuatendile Mukota: Aba kiziki kikizi kinikomunua mukio?

⁵⁰Ndi ta kuboko kuane ukuakitile bibio binsania?

⁵¹Inyue beli na makosi mabibu, batamonesibua mu mitima, aba matuzi meinyu, mukunana Muuza Wasililila; anga bubo buakitile basoinyue, nuinyue abumukukita,

⁵²Mulengania mukizi utasungizie basoinyue? nubo beitaga babo beigisagia musagu wa kuvua kua wozo Wisanana; bubo nuinyue museli bagabuzi nu muamuitile:

⁵³inyue muakasilue mulembe ku kukakizia kua mugenzi, nuinyue tamuaguanzile.

⁵⁴Nubo gabongule bubo, beinine mitima, nu bamulimbanizizie meinyo.

⁵⁵Tondo we eiyeide na Muuza Wasililila, nu agalamine muigulu, amonine ku lutanuno lua Kalaga, nu Yesu emana ku kuboko kuaseidume kua Kalaga,

⁵⁶nu ababuide bune, Lolazi, namona meigulu makandulua, nu Muana wa muntu emana ku kuboko kuaseidume kua Kalaga.

⁵⁷Tondo balalukile na moki manene nunse, nu bazibile matuzi mabo, nu bamusolobokeide na mutima umozi;

⁵⁸nu bamusindikile kuisula lia muino, nu bamulibuide makozi: nu balongeki babikile nsulu zabo ku magulu ma musikila umozi wamanagua Saolo.

⁵⁹Nu balibuide Setefano makozi, nuwe, asegile, atendile bune, Mukota Yesu, sekela kalamo kane.

⁶⁰Nu akomine mazu, alalukile neiyuki inene bune, Mukota, ntubike buagi bubuno kubeli. Nu gasilile kutenda bubo alekene.