Read lega-mwenga Balomo 2 Bible Online

Balomo 2 - lega-mwenga bible

Balomo 2

¹Ububo ntukuvuama kuibingia, uwe muntu, aba ndi uli nazi ukusungia: kubuno mu kusungia ungo, ukuisungia uwenyene; kubuno uwe ukukita nage bumozi.

²Tondo tuizi buno lusungio lua Kalaga luli bulili ku babo bekukitaga bubo.

³Nu mukukengela buno, uwe muntu, ukusungia babo bekukita misako zezo, ziukukita nuwe, ndi ukeibembukia na lusungio lua Kalaga?

⁴Aba ukubenga buingi bua mponga zage nu nkiki zage nu kuikalila kuage, nu ntukumenya buno mponga za Kalaga zikukusondelezia kukuiyania?

⁵tondo ku bubibu buobe nu ku mutima wobe uteli na kuiyania ukuitalikila bongua ku busi bua bongua nu kulolesibua kua lusungio luisanana lua Kalaga:

⁶ukaliga muntu na muntu anga buli makitilo mage:

⁷ku babo beli na komanizia ku kukita busoga, bekulonda lutanuno nu luanzo nu kutabiga, bakakasua kalamo katanakuzinda:

⁸tondo babo beli na misona nu batakuanza bulili, tondo bakuanza bubi, bakamona ku bongua nu kasungu ka Kalaga,

⁹mbabazio nu lubaba, ku muntu na muntu ukukitaga mibi, ku baYuda kulinga, nu lingo ku baGeleka;

¹⁰tondo lutanuno nu luanzo nu bubobelelo ku muntu na muntu ukukitaga busoga, ku baYuda kulinga, nu lingo ku baGeleka:

¹¹kubuno ku Kalaga takuli kukutibua kua bantu.

¹²Kubuno bansania bagile kuteli mulembe bakazimina kuteli mulembe; nu bansania bagile mu mulembe bakasungibua ku mulembe;

¹³kubuno tabonguilizi ba mulembe ubeisanana ku Kalaga, tondo bakiti ba mulembe bakabingibua

¹⁴(kubuno baBilongo bateli na mulembe gabakukita ku bumba buabo buli mu mulembe, babano, tabeli na mulembe, beli na mulembe bebenyene;

¹⁵kubuno bakulolesia makitilo ma mulembe wasanzilue mu mitima zabo, kalenganio kabo kakubalongekela, nu makengelo mabo buabo buabo makubabinga aba kubabingia);

¹⁶mu busi bubo Kalaga gakasungia misako za bantu zibakubisaga, anga ku musagu musoga wane, mu Yesu Klisto.

¹⁷Tondo ndi uwe ukumanua muYuda, nu ukulemanina mulembe, nu kuikaka mu Kalaga,

¹⁸nu kumenya kusombola kuage, nu kumenya kulindika bitondo bisoga, nu kuigisibua mu mulembe,

¹⁹nu kukengela lebelebe buno uwe wenyene uli musondelezia wa biuku, kiengi ku babo beikile mu kapilo,

²⁰musunguzi wa bikongolo, musozi wa bana, uli na lukita lua bumenyinino nu bulili mu mulembe;

²¹uwe umpanga ukuigisia ungo, ndi ntukuiyigisia uwenyene? Uwe ukusambala buno muntu ntibe, ndi ukuibaga?

²²uwe ukutenda buno muntu nteite meiga, ndi ukuita meiga? uwe ukusomba nkisi, ndi ukuliaga bili mu numba za nkisi?

²³uwe ukuikaka mu mulembe, mu kukagula mulembe ndi ukuitia Kalaga na nsoni?

²⁴Kubuno izina lia Kalaga likulingua ku baBilongo ku kabamba keinyu, anga buasanzilue.

²⁵Kubuno kumonesibua kuatananina ndi uli mukiti wa mulembe: tondo ndi uli mukaguzi wa mulembe, kumonesibua kuobe nti kuli anga utamonesibua.

²⁶Umpanga, babo batamonesibua ndi bakokomezia kukakizia kua mulembe, ndi kutamonesibua kuabo ndi takukatekulua kuba kumonesibua?

²⁷nu babo batamonesibua ku bumba, ndi bakokomezia mulembe, ndi ntakakusungia uwe, uli na masanzo nu wamonesibua, tondo ukukagula mulembe?

²⁸Kubuno wozo uteli muYuda eli muYuda ku mubili tugu; nu kuko takuli kumonesibua kuli kumonesibua ku mubili tugu:

²⁹tondo wozo uli muYuda eli muYuda munda; nu kuko kuli kumonesibua kuli mu mutima wa muntu, ta muisanzo; nu luganuno luage talukutuka ku bantu, tondo ku Kalaga.