Read lega-mwenga Balomo 7 Bible Online

Balomo 7 - lega-mwenga bible

Balomo 7

¹Mibuto zane, ndi tamuizi (kubuno nkutenda na babo beizi mulembe), kubuno mulembe ukuangata muntu ku nkungu zeli na kalamo?

²Kubuno mukikulu ndi eli neiba akandua na mulembe ku wozo iba ndi eli na kalamo; tondo ndi wozo iba akua, nti akandulua ku mulembe weiba wage.

³Umpanga, nkungu zili iba wage na kalamo, ndi asongua nongo wamulume, nti eita meiga: tondo ndi iba wage akua, nti akandulua ku mulembe, nu nti nteita meiga, anasongua nongo wamulume.

⁴Bubo nuinyue, mibuto zane, mualekanukile na mulembe ku mubili wa Klisto, buno mube bikulo bia gungo, u wozo wayukizibue ku bakuzi, buno tukolamine Kalaga biguma.

⁵Kubuno gatuayangaga bumba bua buagi, nu ntundo zabo mbi, zabezaga ku kabamba ka mulembe, zakitile mulimo mu biganza bietu aba tuakolamine biguma bia lukuo.

⁶Tondo kano kaluma tuakanduidue ku mulembe, tualekanukile na wozo watukandile; buno tukite mu lukita luto lua muuza, ta mu lukita luasanzilue wakalazi.

⁷Umpanga tutende buni? Ndi mulembe uli buagi? Kilo, aba nunse. Tondo nsinamenyine misako za buagi, songo mulembe taguliko; kubuno nsinamenyine kutonia songo mulembe tawatendile bune, Ntutonie:

⁸tondo buagi buamonine kiziki ku kuko kukakizia buakitile mundi lukita na lukita lua kutonia: kubuno kuteli mulembe buagi tabuabezaga na magala.

⁹Nunne nabezaga na kalamo mu kulinga kuteli mulembe; tondo gabasile kukakizia, buagi buabede na kalamo nunne nakule;

¹⁰nu kuko kukakizia kuandusizizie kalamo; ukuko kualusizie lukuo;

¹¹kubuno buagi buamonine kiziki ku kuko kukakizia buanengelede, nu kububo buanitile.

¹²Kasi, mulembe uli wasilila, nu kuko kukakizia kuli kuasililila, nu kuisanana, nu kusoga.

¹³Buni lingo, bubo buabezaga busoga, buambelede buse lukuo? Kilo, aba nunse. Tondo buagi buno bumoneke buli buagi, buakitile lukuo mundi ku bubo busoga; buno ku kuko kukakizia buagi bube bubi nunse.

¹⁴Kubuno tuizi buno mulembe uli wa muuza: tondo nne nili na mubili wa lukuo, nangatilue na buagi.

¹⁵Kubuno nsizi bunkukita; kubuno bunkutunda tubunkukita; tondo bubo bunkusomba, ububo bunkukitaga.

¹⁶Tondo ndi nkukita bubo buntakutunda, nti nitabizia mulembe buno uli musoga.

¹⁷Nu kano kaluma ta nnenyene ukubukita, tondo bubo buagi buikile mundi.

¹⁸Kubuno nizi buno mundi nnenyene, buno mu bumba buane bua buagi tamuikile buampa busoga; kubuno kutunda nkutunda, tondo nsikuvuama kukita busoga.

¹⁹Kubuno bubo busoga bunkutundaga tubunkukitaga: tondo bubo bubi buntakutundaga, ububo bunkukitaga.

²⁰Umpanga, ndi bubo buntakutunda, ububo bunkukita, nti ta nnenyene ukubukita, tondo buagi bukuikalaga mundi.

²¹Umpanga, nkumona ku mulembe wono, buno nkutunda kukita busoga, tondo bubi nti buseli.

²²Kubuno nabogaboga ku mulembe wa Kalaga ku muntu undi nage:

²³tondo nkumona ku ungo mulembe mu biganza biane, ukuitana na wozo mulembe wa bumenyinino buane, nu ukunkinda nu kuba mukobe wa mulembe wa buagi uli mu biganza biane.

²⁴Nne mukuzi! nazi ukandekanukia na mubili wono wa lukuo?

²⁵Nkusimaga Kalaga mu Yesu Klisto Mukota weitu. Ububo nne ku bumenyinino buane, nkukitilaga mulembe wa Kalaga; tondo mu bumba buane bua buagi, nkukitilaga mulembe wa buagi.