Read lega-mwenga I Bakolinto 2 Bible Online

I Bakolinto 2 - lega-mwenga bible

I Bakolinto 2

¹Nunne, mibuto zane, ganavule kumuli nsiavule na moki makumutananizia aba ma menge, kumusambalila bulongeki bua Kalaga.

²Kubuno nsiakengede kingo kitondo kumuli, umpanga Yesu Klisto nuwe atakilue ku muti wa magu.

³Nunne ganabezaga kueinyu nabezaga natamba, nu nabezaga na boba, nu nagilimine.

⁴Nu kutenda kuane nu kusambala kuane takuabezaga ku moki ma kuluta kua menge ma bantu, tondo ku tulolesio tua magala ma Muuza Wasililila:

⁵buno bukatizio bueinyu tabube mu menge ma bantu, tondo mu magala ma Kalaga.

⁶Tukutendaga na menge ku babo bese bakula mu Klisto: numo ta menge ma nkiko zeno, aba ma bangati ba nkiko zeno, nu bekukengagibua:

⁷tondo tukutenda menge ma Kalaga mu kakungu mamo mabisilue, mabikile Kalaga nkungu zabezaga kisi takibumbua ku lutanuno lueitu:

⁸mamo matamenyine bangati ba kisi kikino: kubuno songo bamamenyine, songo tabanatakile Mukota wa lutanuno:

⁹tondo anga buasanzilue bune, Bitondo bitamonekileko na liso, aba bitonguilueko na kutuzi, Aba tabiamenyinue na mutima wa muntu, Bibio bitondo biabalongekede Kalaga babo bekumutunda.

¹⁰Tondo Kalaga atulolesizie ku Muuza wage: kubuno Muuza akulondaga binsania E, bitondo biabisua bua Kalaga.

¹¹Kubuno nazi muntu unamenya bitondo bia muntu, umpanga muuza wa muntu, uli mueli? Nu bubo bitondo bia Kalaga takuli muntu ukubimenya, umpanga Muuza wa Kalaga.

¹²Tondo isue tatuakasilue muuza wa nkiko zeno, tondo Muuza wozo ukutukaga ku Kalaga; buno tumenye bitondo bituakasilue buliabulia na Kalaga.

¹³Nubio ubitukutendaga, ta ku moki matuigisizibue na menge ma bantu, tondo matuigisizibue na Muuza: ku kumenyinina bitondo bia Muuza na moki ma Muuza.

¹⁴Tondo muntu uteli na Muuza wa Kalaga ntekumenyaga bitondo bia Muuza wa Kalaga: kubuno kueli bili bukongolo; aba ntanavuama kubimenya, kubuno bikumenyininua tugu na Muuza.

¹⁵Tondo we wagomia na Muuza ekumenyinina bitondo binsania, tondo we wenyene ntekumenyininua na muntu.

¹⁶Kubuno nazi wamenyine bumenyinino bua Mukota, buno amuigisie? Tondo isue tuli na bumenyinino bua Klisto.