Read lega-mwenga I Bakolinto 3 Bible Online

I Bakolinto 3 - lega-mwenga bible

I Bakolinto 3

¹Nunne, mibuto zane, nsiavuamine kutenda neinyu anga bagomia na Muuza, tondo anga bantu bekuyangaga bumba bua buagi, anga bana bakeke mu Klisto.

²Namumomezie mabele, aba nsiamulisizie idia: kubuno muabezaga tamukulivuama: aba, kano kaluma tamukulivuama;

³kubuno inyue mukikili bayangi ba bumba bua buagi; kubuno ndi mukikili na lugi nu miango bueinyu bueinyu, ndi nti tamuikile bayangi ba bumba bua buagi, nu bekuyanga lukita lua bantu ba kisi?

⁴Kubuno ndi muntu umozi ekutenda bune, Nne nili wa kikanga kia Paolo, nu ungo bune, Nne nili wa kikanga kia Apolo; ndi nti tamukukitaga anga bantu bekuyanga bumba bua buagi?

⁵Umpanga Apolo eli nazi? Nu Paolo eli nazi? Beli bakiti tugu, kubabo muakatizizie; anga buakasile Mukota ku muntu na muntu.

⁶Nne nayikile, Apolo asandide mazi; tondo Kalaga ekukuzagia,

⁷Ububo we ukuyikaga nteli kena, aba we ukusandilaga mazi; tondo Kalaga ukukuzagia.

⁸Umpanga we ukuyika nuwe ukusandila mazi beli umozi; tondo muntu na muntu akakasua lukalilo luage wenyene lugezie na mulimo wage wenyene.

⁹Kubuno tuli bakiti ba mulimo na Kalaga: inyue muli anga isoa likuasibua na Kalaga, nu anga numba zikobakua na Kalaga.

¹⁰Ku mponga za Kalaga zinakasilue, anga mukulu wa bobaki eli na menge nabikile kibanza, nu ungo muntu ekubaka gantata gakio. Tondo na muntu na muntu alole lukita luakubaka gakio.

¹¹Kubuno takuli muntu unavuama kubika kingo kibanza kutinga kikino kiabikilue kalazi, U Yesu Klisto.

¹²Tondo ndi muntu obaka ga kibanza kikino olo, feza, aba makozi ma bukunza, aba miti, aba nsolu zakama, aba bisesa;

¹³mulimo wa muntu na muntu ukamonekako: kubuno busi bubo bukagulolesia, kubuno ukabisulua na keiya; nu kako keiya kakalindika mulimo wa muntu na muntu ndi walukita lukizi.

¹⁴Ndi mulimo wa muntu wobakile gakio wikala nti akakasua lukalilo lusoga.

¹⁵Ndi mulimo wa muntu wagia, nti akeida lukalilo luage: tondo we wenyene nti akonibua, tondo anga ku keiya.

¹⁶Tamuizi buno inyue muli numba za Kalaga, nu Muuza wa Kalaga ekuikala mu muli?

¹⁷Ndi muntu abigia numba za Kalaga, nti Kalaga akabigia muntu wozo; kubuno numba za Kalaga zasililila, u inyue.

¹⁸Muntu nteiyengelele we wenyene. Ndi muntu umozi kumuli ekuikengela buno, eli na menge mu nkiko zeno, nti abe kikongolo, buno abe na menge.

¹⁹Kubuno menge ma nkiko zeno meli bukongolo ku Kalaga. Kubuno buasanzilue bune, We ukumenyaga buengelezi bua beli na menge:

²⁰nu lingo, Mukota eizi makengelo ma beli na menge, buno meli huliabulia.

²¹Umpanga muntu nteikake mu bantu. Kubuno binsania bili bienyu;

²²ndi bia Paolo, aba bia Apolo, aba bia Kefa, aba bia kisi, aba bia kalamo, aba bia lukuo, aba bia kano kaluma, aba bikaba; binsania bili bienyu;

²³nuinyue muli ba Klisto, nu Klisto eli wa Kalaga.