Read lega-mwenga I Bakolinto 9 Bible Online

I Bakolinto 9 - lega-mwenga bible

I Bakolinto 9

¹Ndi nne nsili mukandulua? Ndi nne nsili musingua? ndi nne nsiamonine ku Yesu Mukota weitu? ndi inyue tamuli mulimo wane mu Mukota?

²Ndi nsili musingua ku bango bantu, tondo nili musingua kumuli; kubuno kalolesio ka busingua buane u inyue mu Mukota.

³Kuakula kuane ku babo bekumbuzia u kukuno.

⁴Ndi tatuli na buangato bua kulia nu kunua?

⁵Ndi tatuli na buangato bua kuenda gamozi na mukikulu uli mukatizia, anga bango basingua, nu mibuto za Mukota, nu Kefa?

⁶Aba ndi nnenyene nu Balanaba tugu, ndi tatuli na buangato bua kutakita mulimo?

⁷Nazi mukoloboyo unenda kuitana bita nu kuidiga wenyene? nu nazi unayika miti za biguma nu ntakulia ku biguma biazo? aba nazi ukulangaga bituganua, nu ntakunuaga ku mabele mabio?

⁸Ndi bubuno bunkutenda nsikutenda anga muntu? aba ndi mulembe tagukutenda nugo bubo?

⁹Kubuno buasanzilue mu mulembe wa Mose bune, Ntukande kanua ka ngombe zikunyanta mumpunge. Ndi Kalaga ekulola bitondo bia ngombe?

¹⁰aba ekutenda ku kabamba keitu umpanga? E, kiasanzilue ku kabamba keitu: kubuno buatunganana mulimi alime ku kilemanizio, nuwe ukututa, ku kilemanizio atunganana kukasua nkindi.

¹¹Ndi tuamusambalide bitondo bia Muuza, ndi tabunakulungana nuinyue kutubogiabogia na bimukumona?

¹²Ndi bango bekukasua buangato bubuno kumuli, ndi isue tatunatinga? Tondo tatukukitila buangato; tondo tukuikalilaga bitondo binsania, tunavua kubigana musagu musoga wa Klisto.

¹³Tamuizi buno babo bekukita mulimo wa bia numba za kukumbamina, bekulia nkindi zeidia lia numba zezo, nu babo bekukita mulimo wa kiziki kia kayulo bekukasua kuidia lia kiziki kia kayulo?

¹⁴Nu bubo Mukota akakizizie buno babo bekusambala musagu musoga bakalama ku musagu musoga.

¹⁵Tondo nsialemanine bibio; aba kimozi, aba nsiasanzile bibino bibe bubo kundi; buli busoga kubuno, nikue ndi muntu unsania ntabigia kuikaka kuane.

¹⁶Kubuno ndi nasambala musagu musoga, tondo nne nsili na kampa kakuikaka, kubuno natananinue nago; nu kisuililo kundi ndi nsiasambala musagu musoga.

¹⁷Kubuno ndi nakita mulimo wono ku kusombola kuane nnenyene, nti nili na lukalilo: tondo ndi ta ku kusombola kuane, nti nakasilue bulangi.

¹⁸Kikizi lukalilo luane? Ululuno: buno kungua nasambala musagu musoga, nti tagube na bukunza, buno nsite buangato buane mu musagu musoga.

¹⁹Kubuno nabezaga mukandulua ku bantu bansania, tondo nikitile mukiti wa bansania, buno nilute bantu beingi nunse.

²⁰Nabede anga muYuda ku baYuda, buno nilute baYuda; ku babo beli mu mulembe, nabede anga mu mulembe, tondo nsiabezaga mu mulembe, buno nilute babo beli mu mulembe.

²¹Kubabo beteli na mulembe, nabede anga nsili na mulembe, tondo tanga buno nsili na mulembe ku Kalaga, tondo ku mulembe wa Klisto, buno nilute babo beteli na mulembe.

²²Ku batamba nabede anga watamba, buno nilute batamba; nabede muntu wa nkita insania ku bantu bansania, buno nonie bamozi ku nkita zezo.

²³Nunne nkukita bubuno bunsania ku kabamba ka musagu musoga, buno nigomie nabo mugo.

²⁴Tamukumenya buno bakuenda kantangoa bakuenda lubilo bansania, tondo ukukasua lukalilo lusoga eli umozi? Ububo endazi Iubilo lukita luluno buno mukasue.

²⁵Nu na muntu na muntu ukulonda kukinda akuizugila ku binsania. Umpanga, babano buno bakasue nkumbu zabiga; tondo isue zitanakubiga.

²⁶Aba nne nkuenda lubilo bubo, tanga ukuzingazinga; nkuluana, tanga utakuluana.

²⁷Tondo nkubabazia mubili wane, nu kugukitia, bunavua kuba buno ndi nasila kusambalila bango, nu nti nasombua.