Read lega-mwenga II Bakolinto 1 Bible Online

II Bakolinto 1 - lega-mwenga bible

II Bakolinto 1

¹Paolo, musingua wa Yesu Klisto ku kusombola kua Kalaga, nu Timoteo mubuto weitu, ku ekelezia lia Kalaga lili mu Kolinto, nu basuagibua bansania beli mu kisi kinsania kia Akaya:

²mponga zibe kumuli nu bubobelelo bukutukaga ku Kalaga Tateisue nu ku Mukota Yesu Klisto.

³Lutanuno ku Kalaga, Isi wa Mukota weitu Yesu Klisto, Isi wa kiombo nu Kalaga wa kubobelezia kunsania;

⁴ukutubobelezagia mu tubebe tueitu tunsania, buno tubobelezie babo beli na tubebe tua nkita insania, ku kubobelezia kutukubobelezibua na Kalaga.

⁵Kubuno anga buzitila mbabazio za Klisto kutuli, bubo ububo kubobelezia kueitu kuitila ku Klisto.

⁶Tondo ndi isue tuli na tubebe, nti ku kabamba ka kumubobelezia nu lonio lueinyu; aba ndi tukubobelezibua, nti ku kabamba ka kubobelezia kueinyu ukuko kukukita mulimo wage kukukokomena mu mbabazio nuisue,

⁷nu kilemanizio kietu kumuli kiakokomena; mumenye buno, bubo ububo anga bumuli na kindi kieinyu mu mbabazio, bubo ububo mu kubobelezibua.

⁸Kubuno, mibuto zeitu, tukutunda muamenya, kitondo kia kabebe kako katuabezaga nako mu Asia, buno tuabezaga na bitondo bingi biatulimbagene, nu tuakengede buno tulumbe tuakua:

⁹tondo bubo butuli isue benyene tuabezaga na lusungio lua lukuo, aba tatuidemanine tubenyene, tondo tulemanine Kalaga ukuyukagia bakuzi:

¹⁰kubuno atonezie mu lukuo lunene nunse, nu akatonia: ndi tuamulemanina buno, atonie lingo:

¹¹nuinyue tukasiazi ku masego; ku kitondo kia mutebe wozo utuakasilue ku masego ma bantu beingi, luganuno lukasue na bantu beingi ku kabamba keitu.

¹²Kubuno kukuno ukuikaka kueitu, bulongeki bua kalenganio keitu, buno kusuagibua nu ku kutengelela kua mutima ukutukaga ku Kalaga; ta ku menge ma mubili, tondo ku mponga za Kalaga; uzituendede muzo mu kisi, nu kuitila nunse kumuli.

¹³Kubuno tatuamusanzide bingo bitondo, umpanga bibio bimukusoma aba bimuteizi, nunne nkulemanina buno muabimenye aba nu kuzinda:

¹⁴bubo bubo anga bumuatumenyinina, buno isue tukuikaka kumuli, anga bumukuikaka kutuli, mu busi bubo bua Mukota Yesu.

¹⁵Nu na kilemanizio kikino natundaga kulinga kuvua kumuli, buno mubogeboge lingo:

¹⁶nu kutinga kumuli nu kuenda ku Makedonia, nu lingo kutuka ku Makedonia nu kusubia kumuli, nu muanelekezie ku Yudaya.

¹⁷Umpanga ganatundile bubo, ndi nabezaga natamba? Aba bitondo binkukengela kukita, ndi nkukengela kubikita ku lukita lua bumba bua buagi buno nitende bubuno, E, nti E, nu tobo, nti tobo?

¹⁸Tondo anga buli Kalaga mukatizia, idagi lietu kumuli taliabezaga bubo nu tobo.

¹⁹Kubuno Muana wa Kalaga, Yesu Klisto, utuamusambalide musagu wage, nne nu Siluano nu Timoteo, taliabezaga, bubo nu tobo, tondo mueli liabede bubo.

²⁰Kubuno malagano mansania ma Kalaga meli mueli, ububo, nu mueli lili Amena, buno tuganuzie Kalaga.

²¹Umpanga Kalaga ekutulindagia inyue nuisue mu Klisto, nu ekutubongia muambo;

²²nuwe uwatubikile kamenyikilo, nu uwatukasile kalingilo ka Muuza mu mitima zeitu.

²³Tondo nne nkumana Kalaga abe mulongeki wane, buno ku kumukuila kiombo nsiendile ku Kolinto.

²⁴Ta kubuno tukuangata bukatizio bueinyu, tondo tuli bakasia ba mbogimbogi zeinyu: kubuno mualinda mu bukatizio.