Read lega-mwenga II Bakolinto 11 Bible Online

II Bakolinto 11 - lega-mwenga bible

II Bakolinto 11

¹Buabezaga busoga songo munikalila bukongolo buane; tondo munikalile.

²Kubuno nkubakuila lugi lua Kalaga: kubuno namusongezie ku wamulume umozi, buno nilusizie Klisto kikumi kiasuaga.

³Tondo nkukua boba, buno ku nzila imozi, anga nzoka buzengelede Eva mu buenge buazo, zinabigia makengelo meinyu munasiga luanzo lua mutima umozi luli mu Yesu.

⁴Kubuno ndi ungo avua nu kusambala ungo musagu wa Yesu, ututasambede, aba ndi mukukasua ungo muuza, umutakasilue, aba ungo musagu musoga, umutitabizizie, nti muabeikalila busoga.

⁵Kubuno nkukengela buno, nsidile kena ku bibeli nabio babo basingua banene.

⁶Tondo ndi nsizi kutenda, luluno ta lukita luane nu menge; tondo mu bitondo binsania tuamuloleseziebio.

⁷Ndi nagile ku kuibotia buno inyue mubakamibue, kubuno namusambalide musagu musoga wa Kalaga geteli mutali?

⁸Nanyagile mango maekelezia ma Kalaga bikulo biabo, nibitole bibe biane, buno nikitile inyue;

⁹nu ganabezaga neinyue nu neiyaninaga, nsiakutizie muntu umozi; kubuno mibuto zane, batukile ku Makedonia, bankasile anga buniyaninaga; nu mu bitondo binsania nidangile buno nsimukutie nunse, nu bubo bunidange.

¹⁰Anga bubo buli bulili bua Klisto mundi, takuli muntu unankanda kanua ku kuikaka kukuno mu miaga za Akaya.

¹¹Ku kitondo kikizi P Kubuno nsikumutunda? Kalaga eizi.

¹²Tondo bubo bunkukita nabukite, buno nibakinde babo bekulonda mulondo; buno tabamone mulondo mu kitondo kikio kibakuikaka nakio babe anga butuli.

¹³Kubuno babano beli basingua ba buza, bekukita mulimo ku buenge, bekuigalukia buno basusanie basingua ba Klisto.

¹⁴Aba tabuli buakuangama nabo; kubuno Satana wenyene ekuigalukagia buno asusanie mugenzi wa kiengi.

¹⁵Umpanga tabunangamia ndi bakiti bage begalukia kususania bakiti ba kuisanana; tondo kuzinda kuabo kukaba bumozi na milimo zabo.

¹⁶Nkutenda lingo, muntu ntakengele buno nili kikongolo; tondo ndi mukunkengela bubo, nitabiziazi, buno nunne nikake tanga.

¹⁷Kikio kinkutenda nsikukitenda kuikakizio lia Mukota, tondo anga ku bukongolo, mu kilemanizio kikino kia kuikaka.

¹⁸Ku kuba beingi bekuikaka ku lukita lua mubili, nunne nikake.

¹⁹Inyue beli na menge mukutundaga kubogaboga na bikongolo,

²⁰Kubuno mukubuzigaga, ndi muntu ekumubika ku bukobe, ndi ekumuzambia, ndi ekumunyaga, ndi ekuikaka, ndi ekumulibula ku meiso.

²¹Nili na nsoni kutenda bubo, anga buno isue tuabezaga tuatamba, Tondo ndi muntu ekuikaka ku kitondo kinsania (nkutenda anga kikongolo), nunne nkuikaka.

²²Ndi babo beli baEbele? Nunne nti nili muEbele. Ndi babo beli baIsalele? Nunne nti nili mu Isalele, Ndi babo beli kikanga kia Abalahama? Nunne nti nili wa kikanga kia Abalahama.

²³Ndi babo beli bakiti ba Klisto? (nkutenda anga musile), embe nne nkuitila nunse ku milimo, ku kulibulua bubibu; ku bikando nunse, ku lukuo mambizi meingi.

²⁴Ku baYuda mambizi matano nasusuidue tususula makumi manazi, kutikia ku kamozi.

²⁵Mambizi masatu nalibuidue na tususula, limbizi limozi nalibuidue na makozi, mambizi masatu nangukidue na buato bua mu luzi, musi nu kindi nikalaga muiziba lia kitatenge;

²⁶ku ngendo mambizi meingi, ku biziki bibibu bia nuzi, mu biziki bibibu bia beibi, mu biziki bibibu bia bantu ba kueitu, mu biziki bia baBilongo, mu biziki bibibu bia mino minene, mu biziki bibibu bia kalula, mu biziki bibibu bia kitatenge, mu biziki bibibu bia mibuto za buza;

²⁷ku milimo nu mu kukutua, ku kukeisia ntende kindi kinsania mambizi meingi, mu nzala nu mpusia, kukutalia idia mambizi meingi, mu mpego nu mundulu.

²⁸Nu gamozi na bitondo bibino, bibio bikunvuilaga busi na busi, ubibino kulanga maekelezia mansania ma Kalaga.

²⁹Nazi watamba, nunne nsiatamba? Nazi ukukikitanibua, nunne nsikongoa?

³⁰Ndi natananina kuikaka, nti nikake ku mutambo wane.

³¹Kalaga, Isi wa Mukota weitu Yesu, ukuganunagua kuganunua kutenakuzinda eizi buno nsikueka buza.

³²Ku Dameseke, muangati wa Mukota Aleta, abikile bakoloboyo kukika muino wa Dameseke, atundaga kunkata:

³³nu bangezezie mu luzi geitengu mu kitutu nu bubo nasogonyokile mu maboko mage.