Read lega-mwenga Bagalatia 3 Bible Online

Bagalatia 3 - lega-mwenga bible

Bagalatia 3

¹Inyue baGalatia bioto, nazi wamulogile, ndi tamungule buno Yesu Klisto asambedue buno atakilue kumuli?

²Nkutunda kumenya kitondo kikino kimozi kumuli bune, Muakasilue Muuza ku makitilo ma mulembe, aba ku kungua kua bukatizio?

³Inyue muli bioto? mualingile mu Muuza, ndi mukutunda kusililila mu makitilo ma bumba bua buagi?

⁴Muababazizibue buliabulia? ndi buli buliabulia bulili?

⁵Umpanga we wamukasile Muuza wage, nu ukukita maganogano kumuli, ndi ekukita bibino ku makitilo ma mulembe, aba ku kungua kua bukatizio?

⁶Anga bubo buakatizizie Abalahama Kalaga, nu atekuidue buno eisanana.

⁷Umpanga mumenye buno babo beli na bukatizio, ubabo beli bana ba Abalahama.

⁸Nu isanzo, lialingile kumoneka kulio buno Kalaga akabingia baBilongo ku bukatizio, liasambalide Abalahama musagu musoga, liatendile bune, Muguli baBilongo bansania bakakitua mponga.

⁹Kububo babo beli ba bukatizio bekukitua mponga na Abalahama mukatizia.

¹⁰Kubuno babo bansania beli ba makitilo ma mulembe beli mu kisuililo: kubuno buasanzilue bune, Asuililue na muntu na muntu utakuendela mu bunsania buasanzilue mu mukanda wa mulembe nu kubukita.

¹¹Bukumoneka buno takuli muntu kubingibua ku mulembe ku Kalaga, kubuno wisanana akalama ku bukatizio;

¹²nu mulembe tagukutuka ku bukatizio: tondo, Muntu ukuyanga bitondo bia mulembe, alame mubio.

¹³Klisto atukuluide ku kisuililo kia mulembe, asuilidue ku kabamba keitu; anga buasanzilue bune, Asuililue na muntu na muntu ukukamua ku muti:

¹⁴buno mponga za Abalahama zibasile baBilongo mu Yesu Klisto buno tukasue idagano lia Muuza ku bukatizio.

¹⁵Mibuto zane, nkutenda mu lukita lua bantu: Aba idagano lia bantu, ndi liakokomena, muntu ntanalita aba kulitalikila.

¹⁶Ku Abalahama idagano lialagilue nu ku kikanga kiage. Ntatenda, ku bikanga, anga ku bingi; tondo anga kimozi, Nu ku kikanga kiobe, ukili Klisto.

¹⁷Nu bubuno ubunkutenda bune: Idagano liakokomene na Kalaga, nu mulembe wabasile, gabede miaka nkama inazi nu makumi masatu zasila, tagunavuama kulita, aba kugalukia idagano buliabulia.

¹⁸Kubuno bupieni ndi buli ku mulembe, tabuli lingo kuidagano: tondo Kalaga abukasile ku Abalahama kuidagano.

¹⁹Mulembe uli kikizi? watalikidue ku kabamba ka kukagula mulembe, aba gavue kikio kikanga kialagilue idagano, liakakizizibue na migenzi, mu kuboko kua mukulumania.

²⁰Tondo mukulumania nteli mukulumania wa umozi, tondo Kalaga eli umozi.

²¹Umpanga ndi mulembe ukuita malagano ma Kalaga? Kilo, nunse: kubuno songo mulembe wakasilue buno ukasane kalamo, lebelebe kuisanana kunabede ku mulembe.

²²Tondo masanzo makandile binsania mu buagi, buno idagano lili ku bukatizio mu Yesu Klisto likasue ku babo bekukatizia.

²³Tondo gabede bukatizio tabuvua, tuabezaga tukulangua mu mulembe, tuakandilue ku kulindila bukatizio bukabisulua.

²⁴Nu bubo mulembe wabezaga musozi weitu wa kutulusia ku Klisto, buno tubingibue ku bukatizio.

²⁵Tondo gabede bukatizio buavua, mulembe taguli lingo musozi weitu.

²⁶Kubuno inyue bansania muli bana ba Kalaga, ku bukatizio mu Yesu Klisto.

²⁷Kubuno inyue bansania muabatizizibue mu Klisto, muazualile Klisto.

²⁸Takuli muYuda aba muGeleka; takuli mukobe aba mukandulua, takuli wamulume aba mukikulu; kubuno inyue bansania muli umozi mu Yesu Klisto.

²⁹Nu ndi inyue muli ba Klisto, umpanga nti muli kikanga kia Abalahama, nu bapieni beidagano.