Read lega-mwenga Baefeso 1 Bible Online

Baefeso 1 - lega-mwenga bible

Baefeso 1

¹Paolo, musingua wa Klisto Yesu, ku kusombola kua Kalaga, ku basuagibua beli ku Efeso, nu bakatizia mu Klisto Yesu:

²Mponga zibe kumuli nu bubobelelo bukutukaga ku Kalaga Tateisue nu ku Mukota Yesu Klisto.

³Kalaga aganunue, Isi wa Mukota weitu Yesu Klisto, watukitide mponga insania za Muuza, mu biziki bia muigulu mu Klisto:

⁴anga buatusombuede mueli gabezaga kisi takiba, tube basililila beteli na kabalibango kueli mu lutundo.

⁵Atusombuede kutukila wakalazi, buno tubikue bana bage wenyene mu Yesu Klisto, anga ku mbogimbogi nsoga za kusombola kuage,

⁶bubuno ku luganuno lua lutanuno lua mponga zage, zatukitide kuitabizibua mu Mutundua wage.

⁷Mueli tuli na bukuluzi mu mikila zage, isigililo lia misako za buagi, ku buingi bua mponga zage;

⁸anga buatutalikide mu menge mansania nu mu bumenyinino bunsania.

⁹Asilile kutumenesia kakungu ka kusombola kuage, anga buabezaga buamutananizia, anga buakengede wenyene,

¹⁰buno nkungu zezo gakakuka nkiko akakundamania binsania mu Klisto, bili mu meigulu, nu bili mu kisi.

¹¹Mueli nuisue tuli na bupieni, tuasombuedue kuikengelo lia we ukukitaga binsania ku luango lua kusombola kuage;

¹²isue mueli tube luganuno luage, isue balingile kubikila Klisto kilemanizio kietu.

¹³Mu wono nuinyue nunse, gamuasilile kungua musagu wa bulili, musagu musoga wa lonio lueinyu, lingo gamuamukatizizie muabikilue kamenyikilo na Muuza Wasililila weidagano,

¹⁴uli kalingilo ka bupieni bueitu, aba nu gakakulula bage, ku luganuno lua lutanuno luage.

¹⁵Ku kabamba kako nunne, kutukila, ganungule musagu wa bukatizio bueinyu mu Mukota Yesu, nu lutundo lueinyu ku basuagibua bansania,

¹⁶nsikukutua na kumusima, nu nkumusegela;

¹⁷buno Kalaga wa Mukota weitu Yesu Klisto, Isi wa lutanuno, amukase muuza wa menge nu kulolesia mu kumumenya;

¹⁸menyininazi mu mitima zeinyu, buni buli kilemanizio kia mubila wage, nu buni buli bugumi bua lutanuno lua bupieni buage mu basuagibua,

¹⁹nu buni buli kuitila kua magala mage kutuli isue bekukatizia, anga buli magala mage,

²⁰malolesizie mu Klisto, gamuyukizie ku bakuzi, nu kumubika ku kuboko kuage kuidume muigulu,

²¹kutinga nunse makota mansania, nu buangato, nu magala, nu bangati, nuizina neizina likutekulua, ta ku nkiko zeno tugu, tondo nu mu zezo zavue:

²²nu amukasile buangato bua binsania, nu amubikile muangati wa binsania ku kabamba ka ekelezia.

²³Ulilio lili mubili wage, kusililila kuage kuasililila mu binsania.