Read lega-mwenga Bafilipo 3 Bible Online

Bafilipo 3 - lega-mwenga bible

Bafilipo 3

¹Umpanga, mibuto zane, bogazibogazi mu Mukota. Nkumusanzila ta kubuno nakutua, tondo ku kumusuagia.

²Muidange na mboa, muidange na bekukitaga bubi, muidange na bekuibigagia:

³kubuno isue tuli bamonesibua, isue bekukumbaminaga Kalaga ku Muuza, nu bekuiganunaga mu Klisto Yesu, aba batakulemanina lukita lua mubili;

⁴tondo ganalemanina lukita lua mubili; ndi ungo muntu ekukengela kulemanina lukita lua mubili, embe nne lino.

⁵Gabede bindi kinana biatinga na ganibutilua namonesizibue, nili muntu wa kilongo kia Isalele, wa kikanga kia Benzamini, muEbelo wa baEbelo; ku kitondo kia mulembe, muFalese;

⁶ku komanizia, muiti wa ekelezia; ku kuisanana kua mulembe, nsiabezaga na katati.

⁷Tondo bitondo bibio biabezaga mutali kundi, nabiganzile kuba buliabulia ku kabamba ka Klisto.

⁸E, lebelebe nazimizizie binsania buno ni menye nunse Klisto Yesu Mukota wane: ku kabamba kage nazimizizie binsania, nabimonine buno bili bulia, buno nimenye Klisto,

⁹nu nibe mueli, nsibe na kuisanana kuane nnenyene, kukutuka ku mulembe, tondo kuko kuli ku bukatizio mu Klisto, kuisanana kuko kukutuka ku Kalaga ku bukatizio:

¹⁰nimumenye, nu magala meiyukilo liage, buno nibabazibue anga buababazizibue nu nisusanibue na lukuo luage;

¹¹buno nibase kuiyukilo lia kutuka ku bakuzi.

¹²Ta kubuno nasila kubasa, aba ta kubuno nasililila: tondo nkinenda buno nikokomezie kikio kinakokomezizibue na Klisto Yesu.

¹³Mibuto zane, nsikukengela buno nasila kukikokomezia: tondo nkukita kitondo kimozi tugu, nkuibilila bibio bia kulinga, nise nayanga bibio bia luabusio,

¹⁴nkuyangilila lugendo nikasue ku lukaso lua mubila munene wa Kalaga mu Klisto Yesu.

¹⁵Umpanga isue bansania, basililila, tube na makengelo mamozi; nu ndi muli na mango makengelo, Kalaga nti amulolesiemo:

¹⁶tondo ndi tuse tuakimenya, tuendazi bumozi mukio.

¹⁷Mibuto zane, nyangazi, nu mulole babo bekuyanga lukita lutuamulolesezie.

¹⁸Kubuno beingi bekutabanga, namusambalide mambizi meingi misagu zabo, aba kano kaluma nkumuana nu nkulila, buno beli beiti ba muti wa magu wa Klisto:

¹⁹kuzinda kuabo u lukuo, kalaga kabo u nda zabo, nu lutanuno luabo luli mu nsoni zabo, bekukengela bia kisi.

²⁰Kubuno tuli ba kuigulu; tukulanga Monia kutukako, u Mukota Yesu Klisto:

²¹we ukagalukia mibili zeitu zakega, buno zisusanie na mubili wage wa lutanuno, ku magala mage akangata binsania.