Read lega-mwenga Bafilipo 4 Bible Online

Bafilipo 4 - lega-mwenga bible

Bafilipo 4

¹Umpanga, mibuto zane, batundua bane, nu bankukuila malima, mbogimbogi zane, nu nkumbu zane za bukota, lindazi mu Mukota, batundua bane.

²Nkuana Esodia, nu nkuana Suntuke, babe na bumenyinino bumozi mu Mukota.

³Nu nkukusengezia, muida wane wa bulili, ukasie bakikulu babo, kubuno bakitile mulimo umozi nanne mu musagu musoga, nu Kulemento, nu babo bango banakitaga nabo mulimo, meina mabo masanzua mu mukanda wa kalamo.

⁴Bogazibogazi mu Mukota bindi binsania: nkutenda lingo, bogazibogazi.

⁵Kubota kueinyu kumenyue na bantu bansania. Mukota eli buigi.

⁶Tamuikutie ku kitondo kinsania; tondo mu kitondo na kitondo, ku kusega nu ku kubuzia na kusima, masego meinyu mamenyue ku Kalaga.

⁷Nu bubobelelo bua Kalaga, buatinga menge mansania, bualindie mitima zeinyu nu makengelo meinyu mu Klisto Yesu.

⁸Umpanga, mibuto zane, bitondo binsania bili bia bulili, binsania bili bia luanzo, binsania bili bisanana, binsania bili bisoga, binsania biakutananizia, binsania bikulumba busoga; ndi bili bisoga, ndi bili bia luganuno, nti mukengele ku bitondo bibino.

⁹Kubuno bitondo bibio bimuigile, nu bimuakasilue, nu bimungule, nu bimuamonaga nkukita, bibio ubimukita: nu Kalaga wa bubobelelo eikale neinyu.

¹⁰Tondo nabogilebogile nunse mu Mukota, kubuno muankengede lingo; nuinyue muankengelaga kankanka, tondo tamuamenyine bumukita.

¹¹Nsikutenda bubuno kubuno nkuiyanina: kubuno nalindizie mutima ku bitondo binsania biambasilaga;

¹²mu buzambi aba mu bugumi, kungua neimbuka aba nsiembuka, kungua nili na kena aba nsili na kena.

¹³Nkuvuama kukita binsania mu we ukunkasaga magala.

¹⁴Tondo muakitile busoga nunse kubuno muagomezie nanne mu mbabazio.

¹⁵Nuinyue baFilipo muizi buno, mu kulinga kua musagu musoga, ganatukile ku Makedonia, takuabede lingo ekelezia liagomezie nanne ku kitondo kikino kia kukasana, umpanga inyue benyene;

¹⁶kubuno aba ku Tesolonike muansingide bingi biniyaninaga.

¹⁷Ta kubuno nkulonda lukaso; tondo nkulonda buno mutali weinyu weitilile.

¹⁸Tondo nsikuiyanina kena, kubuno namonine ku bimuansingilaga na Epapuludito, bulago bua nsunu nsoga, kisansa kitabizibua nu kikutananizia Kalaga.

¹⁹Nu Tatane Kalaga amukase kinsania kimukuiyanina anga buli bugumi buage mu lutanuno luage mu Klisto Yesu.

²⁰Kalaga Tateisue aganunue ku nkiko na nkiko. Amena.

²¹Sambiziazi basuagibua bansania mu Klisto Yesu. Mibuto zeitu zindi nazo bamusambizia.

²²Basuagibua bansania bekumusambizia, tondo lebelebe babo beli mu numba za Kaisala.

²³Mponga za Mukota Yesu Klisto zibe neinyu.