Read lega-mwenga I Batesolonike 5 Bible Online

I Batesolonike 5 - lega-mwenga bible

I Batesolonike 5

¹Tondo ku musagu wa nkungu nu nkiko, mibuto zeitu, nsikutunda namusanzila.

²Kubuno inyue benyene muizi buno, busi bua Mukota buavue anga bukuvuaga muibi mu kindi.

³Kubuno nkungu zibekutenda buno, kuli bubobelelo nu kuli bulonge bukata, ugago kubiga kukabavuila kitangala besi, anga bukuvuilagua muimisu na lubaba, nu tabakakutina.

⁴Tondo inyue, mibuto zeitu, tamuli mu kapilo, buno busi bubo bunamusanga anga muibi:

⁵kubuno inyue bansania muli bana ba kiengi, nu bana ba musi; tatuli bana ba kindi, aba bana ba kapilo;

⁶umpanga tatuiyombeke, anga bukuiyombeka bango, tondo tukesiazi ntende nu tatukue na maku.

⁷Kubuno babo bekuiyombekaga, bekuiyombekaga mu kindi; nu babo bekukatagua na maku bekukatagua na maku mu kindi.

⁸Tondo, isue tuli ba musi, tatukue na maku, tuzuale bukatizio nu lutundo ku bukuba; nu nkumbu zeitu zibe kilemanizio kia lonio.

⁹Kubuno Kalaga ntatongedue, tondo tonibue mu Mukota weitu Yesu Klisto,

¹⁰watukuilide, buno tulame mueli, ndi tuakesia ntende aba ndi tuiyombeka.

¹¹Upanga bobelezaniazi, lindaniazi, anga bumukukita.

¹²Tondo, mibuto zeitu, tukumusengezia, buno muanze babo bekukita mulimo wa Mukota nu bekumuangata nu bekumuana;

¹³nu kubanza nunse mu lutundo ku kabamba ka mulimo wabo. Mube na bubobelelo bueinyu bueinyu.

¹⁴Nu tukumusengezia, mibuto zeitu, anazi babo batakukita buakulungana, lindiazi babo batamba, gugumaniazi basosu, ikalilazi bantu bansania.

¹⁵Umpanga, tamusubanizanie mibi kuingo; tondo kitanazi busoga bindi binsania, nu ku bansania.

¹⁶Bogazibogazi bindi binsania;

¹⁷segazi na komanizia;

¹⁸simazi mu binsania: kubuno kukuno u kusombola kua Kalaga mu Klisto Yesu kumuli.

¹⁹Tamunanie Muuza;

²⁰tamubenge bulengania;

²¹lindikazi binsania; buli busoga ubumukita;

²²idekanukiazi na bubi bua lukita na lukita.

²³Nu Kalaga wa bubobelelo wenyene amusuagie nunse; nu muuza weinyu unsania, nu uwe uwenyene, nu mibili zeinyu insania zilangue, geteli mabingo aba nu kuvua kua Mukota weitu Yesu Klisto.

²⁴We eli mukatizia ukumumana, nu akabukita.

²⁵Mibuto zeitu, tusegelazi.

²⁶Sambiziazi mibuto zeitu na mbogimbogi.

²⁷Nkumukakizia ku Mukota buno somenazi mibuto zeitu insania mukanda wono.

²⁸Mponga za Mukota weitu Yesu Klisto zibe neinyu.