Read lega-mwenga Baebelo 11 Bible Online

Baebelo 11 - lega-mwenga bible

Baebelo 11

¹Umpanga bukatizio buli kilemanizio kia bibio bikulemaninua, bumenyinino bua bibio bitemonekako.

²Kubuno batatanguluisue balongekedue.

³Ku bukatizio tuizi buno, nkiko zabede kuidagi lia Kalaga, nu bubo binsania bikumonekako tabiakitilue ku bikumonekako.

⁴Ku bukatizio bua Abele akasile Kalaga kisansa kisoga kutinga Kaina, kubo alongekedue buno eli wisanana, kubuno Kalaga eitabizizie nkaso zage; nu kubo eki atenda nu akua.

⁵Ku bukatizio bua Enoke azanzuidue, buno anavua kukua, nu ntamonekile lingo ko, kubuno Kalaga amuzanzuide: kubuno gabezaga ntezanzulua alongekedue buno atananizia Kalaga:

⁶tondo geteli bukatizio tabunakulungana kumutananizia; kubuno muntu ukukunda ku Kalaga atunganana kukatizia buno we eligo, nu ekukasaga ku babo bekumulonda lukalilo.

⁷Ku bukatizio bua Noa, Kalaga amutendile binsania bitamonekagako, nu amuanzile, nu angile buato buno onie kikanga kiage; kubo asungizie kisi, nu abede mupieni wa kuisanana kuli mu bukatizio.

⁸Ku bukatizio bua Abalahama, amaninue, anzile buno ende kuko kuakapiena; endile, nteizi kuakuenda.

⁹Ku bukatizio eikede mu kikio kisi kialagagua kuko, anga kuteli kuabo; eikalaga mu numba za nsulu, na Isaka nu Yakobo, babezaga bapieni ba lilio idagano anga we;

¹⁰kubuno balangilaga muino uli na bibanza bisoga, wozo wagobakile nu wagukitile u Kalaga.

¹¹Ku bukatizio bua Sela ekile iyimi nu abezaga ese mukungu nunse, kubuno akengede buno wozo walagile bubo eli mukatizia:

¹²nu bubuno muntu umozi abutile bantu beingi, nu we anga mukuzi, nu babezaga beingi anga nkeninkeni za kuigulu, nu anga misege zili ku mutili wa kitatenge, zitanavuama kuganzua.

¹³Babano bansania bakule gababezaga bekili na bukatizio, tabekile ku mamo malagano, tondo bamamonineko, nu bamasekede gamabezaga bulazi, nu bamenyine buno, babezaga bageni nu beinzi mu kisi.

¹⁴Kubuno babo bekutenda bubo bekulolesia buno bekulonda kisi kiabo.

¹⁵Nu songo bakengelaga kisi kikio kibatukile kukio, songo banasubizie lingo.

¹⁶Tondo kano kaluma bekutunda kisi kisoga nunse, u kikio kia muigulu; ku bubuno Kalaga ntanakua na nsoni ndi ekumanua buno eli Kalaga wabo; kubuno abakitide muino.

¹⁷Ku bukatizio bua Abalahama galindikilue, akasene Isaka buno abe kisansa; nuwe u walagilue mamo malagano akasanaga muana wage wa ngomo;

¹⁸ububo amubuide buno, mu Isaka umukaba kikanga kiobe:

¹⁹amenyine buno Kalaga anayukia bakuzi; nu amukasilue lingo anga wayukibua ku bakuzi.

²⁰Ku bukatizio bua Isaka akitide Yakobo nu Esau mponga aba nu ku bingo bikavua.

²¹Ku bukatizio bua Yakobo, gabezaga ese buigi na kukua, akitile mponga ku muana na muana wa Yosefu: akumbamine nu egamine kuntonga kua musumbo wage.

²²Ku bukatizio bua Yosefu, gabezaga ese buigi na kukua, atendile bukatuka bana ba Isalele; nu bubo akakizizie kuenda na makua mage.

²³Ku bukatizio bua Mose, gabutilue, abisilue miezi isatu na bamubuta, kubuno bamenyine buno eli muana musoga; aba tabakule mulembe wa mukota boba.

²⁴Ku bukatizio bua Mose, gabede ese munene, asombile kumanua buno, eli muana wa mukinga wa Falao;

²⁵atundile kubabazibua anga bukubabazibua bantu ba Kalaga, kuteibogiabogia ku buagi bua kisi kikino nkungu nkeke;

²⁶kubuno akengede buno abengue anga bukubengua Klisto buli iguma inene kutinga bikagi bia Ezipeto; kubuno alemaninaga lukalilo lusoga.

²⁷Ku bukatizio atukile ku Ezipeto, ntakule kongua kua mukota boba; kubuno alindizie mutima, anga ukumona ku wozo watakumonako.

²⁸Ku bukatizio akitile isuluko, nu kubuluga mikila, buno we witile nkula anavua kuitubia kubeli.

²⁹Ku bukatizio basokile kitatenge kiakisimana anga kuakama: nu baEzipeto gabagelekile kubukita, bakule mu mazi.

³⁰Ku bukatizio bitutu bia Yeliko biaguide, gabiasilile kutimbua bindi mutuba kamo.

³¹Ku bukatizio bua Laba wozo wabezaga kitazi, ntakule na babo bananaga, kubuno asekede batitiki na bubobelelo.

³²Nu nitende buni lingo? kubuno kano kaluma nsinavuama kumusambalila musagu wa Gidiona, nu wa Balaka, nu wa Samusoni, nu wa Yepeta; nu wa Davidi nu Samuele nu balengania;

³³babo ku bukatizio bakindile makota, bakitile buisanana, balagilue malagano, balimbile tunua tua bimbue,

³⁴tabagide na ngulumina za keiya, bonine kuitua na bupanga, gababezaga batamba bagugumanizibue, babezaga mapuka ma bita, bakindile mazombo ma bageni.

³⁵Bakikulu basekede bakuzi babo bayukizibue, nu bango balibuidue nu bakule, tabazigile kukululua; buno babe neiyukilo isoga nunse;

³⁶nu bango balindikilue buanguzanguza nu kususulua, nu kukandua makoki nu kubikua mu kikando.

³⁷Balibuidue makozi, batilue na si, balindikilue, beitilue na bupanga, kunsania kubendaga bavualaga bikoba bia mikoko, nu bikoba bia mpene; tababezaga na kampa, bababazizibue, bakitilue bubi

³⁸(bantu ba kisi tabatananizizibue nabo), batimbiletimbile mu kisi kia misege nu mu miduko, nu mu tulimba, nu mu matengu ma kisi.

³⁹Nu babano bansania, ku kulongekelua ku kabamba ka bukatizio buabo, tababede neidagano;

⁴⁰kubuno Kalaga atubikide kili kisoga nunse, tabanasililila gatuteli.