Read lega-mwenga 1 Petelo 1 Bible Online

1 Petelo 1 - lega-mwenga bible

1 Petelo 1

¹Petelo, musingua wa Yesu Klisto, ku basombolua bandabene nu babalanganizibue ku Ponto, ku Galatia, ku Kapadokia, ku Asia, nu ku Bitinia,

²kukumenya kua Kalaga Tateisue kuamenyine wakalazi, kukusuagibua kua Muuza, aba kuanza nu kukubulilua mikila za Yesu Klisto: Mponga nu bubobelelo bitalikilue kumuli.

³Lutanuno ku Kalaga Isi wa Mukota weitu Yesu Klisto, kubuno ku kiombo kiage kinene atubutile lingo, buno tube na kilemanizio kia kalamo ku kuyukibua kuage Yesu Klisto ku bakuzi,

⁴buno tube na bupieni butanakubiga, nu buteli na nsese, nu butanakusila, bumuabisidue muigulu,

⁵mukulangua na magala ma Kalaga mu bukatizio mube na lonio luli kayikayika kumoneka ku nkungu nzinda.

⁶Mukubogaboga nunse, aba ndi ku bindi bimozi muli na tubebe ku malindiko mengukana,

⁷buno idindiko lia bukatizio bueinyu, lili na bukunza bubibu kutinga olo zikuziminaga aba ndi zalindikua na keiya, limonekeko ku luganuno nu lutanuno nu luanzo, gakamoneka Yesu Klisto:

⁸u wozo tamuamumonineko tondo mukumutunda; nu wozo umukukatizia tamukumumonako, nu mukubogaboga nunse na mbogimbogi zitakumenyua kutendua nu uzili na lutanuno:

⁹mukakasua lukalilo lusoga lua bukatizio bueinyu, u lonio lueinyu.

¹⁰Ku musagu wa lonio luluno balengania balondile na komanizia, basambede musagu wa mponga zimukakitua:

¹¹batundaga kumenyinina nkungu nkizi zalolesizibue na Muuza wa Klisto wabezaga mubeli alingile kulongekela kubabalua kua Klisto, nu lutanuno lukaba kusila kua bubo.

¹²Balolesezibue, kubuno ta ku kabamba kabo bobenyene, tondo ku kabamba keinyu, bakitile mu bitondo bibino, nu muasambaliduebio na babo bamusambalilaga musagu musoga mu Muuza Wasililila asingilue nu atukile muigulu; ku malagi mamo migenzi batundaga kumamenyinina.

¹³Kubuno kokomeziazi menge meinyu, mube na nkiki, nu mulemanine nunse ku mponga zimukalusizibua mu kumoneka kua Yesu Klisto;

¹⁴anga bana bekuanza, tamuidingimanie na ntundo zeinyu zimualingaga kukita mu bukongolo bueinyu:

¹⁵tondo anga bubo buli wozo wamumanine eli wasililila, nuinyue musililile mu makitilo mansania ma kalamo keinyu;

¹⁶kubuno buasanzilue bune, Mukaba basililila; kubuno nne nili wasililila.

¹⁷Ndi mukumumanaga buno Tateisue, wozo ukusungagia muntu na muntu anga buakukita, nu ntekukutagia wampa, kuazi boba mu nkungu zimukili muzo kuko kumuandabene:

¹⁸muizi buno tamuakuluidue na bikubigaga; aba ku feza aba olo, ku lukita lutasuaga luatukile ku basoinyue;

¹⁹tondo ku mikila za bukunza bubibu za Klisto, anga muana wa mukoko uteli neitondoki aba biulu,

²⁰amenyinue kutukila wakalazi, nti kisi takiba, tondo alolesizibue kuzinda kua nkiko ku kabamba keinyu,

²¹kubuno mueli muse muakatizia Kalaga, wamuyukizie ku bakuzi, nu amukasile lutanuno; buno bukatizio bueinyu nu kilemanizio kienyu bibe ku Kalaga.

²²Muiyengezie ku kuanza kua bulili kielamo kia mibuto kiteli na kangonongono, tundanazi nunse:

²³kubuno muabutilue lingo, takukubutua ku kubigaga, tondo kutakubigaga, kuidagi lia Kalaga lili na kalamo nu litanakuzinda.

²⁴Kubuno, Mubili na mubili uli anga bisugu, Nu malebo mago mansania meli anga maluba ma bisugu, Bisugu bioma, nu maluba mabio nti makoloka;

²⁵Tondo idagi lia Mukota talinakuzinda. Nu muidagi lilino lili musagu musoga umuasambalilagua.