Read lega-mwenga 1 Petelo 3 Bible Online

1 Petelo 3 - lega-mwenga bible

1 Petelo 3

¹Bubo, nuinyue bakikulu, anzazi beiba beinyu; kubuno, ndi bamozi tabekuanza idagi babo banalutua kutekuidagi na misako za bakikulu babo;

²gabamone ku misako zeinyu misoga nu luanzo.

³Malebo meinyu, tamabe ma gantata, anga kusuika nzuili; nu kukuivualikia bia malebo bia olo, nu kuvuala nsulu;

⁴tondo mabe mu kalamo keinyu katakumonekako mu malebo matanakubiga; u mutima wola nu bubobelelo, buli bukunza bubibu ku Kalaga.

⁵Kubuno bubo ubualebaga bakikulu basuagibua ba wakalazi, balemaninaga Kalaga, nu kuanza beiba babo:

⁶anga buno Sela anzaga Abalahama, amumanine buno mukota: nuinyue muabe bana bage ba bulili, ndi mukukita busoga, aba kukuitibua na boba.

⁷Bubo nuinyue beiba babo, ikalazi na bakikulu beinyu ku menge, nu anzazi bakikulu beinyu, kubuno tabeli babibu, nu beli bapieni neinyue ba mponga za kalamo; nu bubo masego meinyu tamabiganue.

⁸Umpanga, mube na makengelo mamozi, kuilanazi kiombo, tundanazi anga babutua, mube na mponga nu mole:

⁹tamusubie bubi ku bungo, nu kilingano ku kingo, tondo kitazi mponga; kubuno ubumuamaninue, buno mupiene busoga.

¹⁰Kubuno, Wozo ukutunda kulama, Nu kumona ku bindi bisoga, Azugile lulami luage talutende bubi, Nu kanua kage takengelele;

¹¹Nu asige bubi, nu akite busoga; Alonde bubobelelo, abuyange nunse.

¹²Kubuno meiso ma Mukota meli ku beisanana, Nu matuzi mage makunguaga masego mabo; Tondo malanga ma Mukota tameli ku bakiti ba bubi.

¹³Nu nazi ukamukita bubi, ndi muli bakiti ba busoga?

¹⁴Tondo ndi mukusungibua ku kabamba ka kuisanana, nti muabogaboga; nu tamukue babo bekumuitia boba, aba tamuzangezange;

¹⁵tondo muganune Klisto, buno eli Mukota mu mitima zeinyu; mube kayikayika bindi binsania kuakula ku muntu na muntu ukumubuzia musagu wa kilemanizio kimuli nakio, tondo kukubota, nu boba:

¹⁶mube na kalenganio kasoga, bubo ku kitondo kikio kimukukandikua, babe na nsoni, babo bekunyega bumukukita mu Klisto.

¹⁷Kubuno buli busoga nunse kusungibua ku kukita busoga, ndi ukusombola kua Kalaga, kuteli ku kukita bubi.

¹⁸Kubuno Klisto nuwe asungizibue limbizi limozi tugu ku kabamba ka buagi, wono wisanana, ku kabamba ka bateisanana, buno atulusie ku Kalaga; mubili wage weitilue, tondo wozo wenyene alamizibue na Muuza;

¹⁹kububo endile kuigisia ku miuza zabezaga mu kikando,

²⁰asambalide bantu batanzaga wakalazi kusigilila kua Kalaga kua lindilaga busi bua Noa; gangagua buato, mubo tamuabezaga bantu beingi, babo bantu kinana, ubonine na mazi:

²¹mazi mamo mabezaga kalolesio ka bubatizio bukumonia mu bindi bibino; tabukutikagia nsese za bumba bua buagi; tondo kuakula kua kalenganio kasoga ku Kalaga, ku kuyuka kuage Yesu Klisto;

²²nuwe eli ku kuboko kua seidume kua Kalaga, eyendide muigulu, migenzi nu buangato, nu magala abiangatile.