Read lega-mwenga 1 Petelo 4 Bible Online

1 Petelo 4 - lega-mwenga bible

1 Petelo 4

¹Umpanga kubuno Klisto ababazizibue ku mubili, nuinyue agatazi ngabo za makengelo mamo, kubuno we wababazizibue ku mubili, alekanukile na buagi;

²bubo tamulame kalamo kansania keinyu ku ntundo za bumba bua buagi aba ku ntundo mbi za bantu, tondo ku kusombola kua Kalaga.

³Kubuno zezo nkungu zaiingile kalazi zinasuagile kukita bukutunda baBilongo, ku kukita butazi, nu ntundo mbi, nu kukatua na maku, nu kisagulo kia buliagundu, nu kunua maku, nu kukumbamina nkisi zitasuaga:

⁴nu bangamine buno tamukuenda nabo mu misako zabo zitasuaga, nu kumulinga nunse:

⁵nubo bakasambala bunsania ku wozo uli kayikayika kusungia balami nu bakuzi.

⁶Kubuno bakuzi nubo basambalidue musagu musoga, buno nubo basungibue mu bumba bua mubili, anga bukusungibua bantu, buno balame mu Muuza anga bukulamaga Kalaga.

⁷Tondo binsania bisavua kuzinda; umpanga mube na menge, nu kukokomena mu masego;

⁸kuitila nunse mutundane nunsania; kubuno kutundana ku kukukila misako mingi za buagi:

⁹sekelanazi tondo tamugambane:

¹⁰bubo nawe nawe nagukitila bango anga buakasilue anga bakiti basoga ba mponga ningi zili kua Kalaga;

¹¹ndi muntu ekusambala, nti asambale meigisia ma Kalaga; nu ndi muntu ekuigisia, nti eigisia na magala makasua na Kalaga; bubo mu bitondo binsania Kalaga aganunue mu Yesu Klisto, kueli kuli lutanuno nu magala matanakuzinda. Amena.

¹²Batundua bane, tamuitangale kuidindiko anga lia keiya likumubasila, nu likumugeleka, nu likumuangamia:

¹³tondo ndi mukusungibua anga buasungizibue Klisto, bogazibogazi; buno gakalolesibua lutanuno luage, mukabogaboga na mbogimbogi nunse.

¹⁴Ndi muasungibua ku kabamba keizina lia Klisto, nti muli na mbogimbogi; kubuno Muuza wa lutanuno u Muuza wa Kalaga amuikalila,

¹⁵Tondo umozi wa kumuli ntasungibue anga muiti, aba anga muibi, aba anga mukiti wa bubi, aba anga ukuiyingizia mu nsake za bango bantu:

¹⁶tondo ndi muntu ekusungibua buno eli muKlisto, ntabe na nsoni; tondo aganune Kalaga muizina lilino.

¹⁷Kubuno nkungu za kusungibua zakuka, tondo lusungio lualinga ku kikanga kia Kalaga; nu ndi lualinga kutuli, kuni kukazindila babo batanza nu batakatizia musagu wa Kalaga?

¹⁸Nu ndi wozo wisanana onibua gasongo ku lusungio wozo utakatizia Kalaga nu muagi buni buakonibua?

¹⁹tondo babo bekusungibua ku kusombola kua Kalaga bakukita busoga ndi babika tulamo tuabo mu maboko ma Mubumbi mukatizia.