Read lega-mwenga 2 Petelo 1 Bible Online

2 Petelo 1 - lega-mwenga bible

2 Petelo 1

¹Simona Petelo, mukobe nu musingua wa Yesu Klisto, ku babo babezaga na bukatizio bumozi neisue bua bukunza bubibu mu kuisanana ku Kalaga weitu, nu Monia weitu Yesu Klisto:

²Mponga kumuli nu bubobelelo butalikilue mu bumenyinino bua Kalaga nu bua Yesu Mukota weitu.

³Kubuno mpumba za buKalaga zatukasile binsania bia kalamo nu misako zage, ku bumenyinino bua wozo watumanine ku lutanuno luage nu ku busoga buage wenyene;

⁴kubuno tuakasilue malagano manene nu ma bukunza bubibu; buno mugomie mumo na Kalaga, buno monibue na kubiga kuli mu kisi mu ntundo zakio.

⁵Nu ku bubo muatunganana kuikokomezia nu kutalikila bukatizio bueinyu ku busoga, nu ku busoga bumenyinino;

⁶nu ku bumenyinino kuisungula, nu ku kuisungula nkiki, nu ku nkiki kuisanana;

⁷nu ku kuisanana kutunda mibuto zeinyu; nu ku kutundana, kiombo.

⁸Nu ndi muli na misako zeno, zikumulolesia buno mukutunda kukita mulimo nu mukukolama nunse, mu bumenyinino bua Mukota weitu Yesu Klisto.

⁹Kubuno wono uteli na zezo misako eli kiuku, ntanamona bili bulazi, eibilide kuko kusugua misako zage za buagi za wakalazi.

¹⁰Bubuno, mibuto zane, kitazi na komanizia nu mulinde mu mubila weinyu nu mu kusombola kueinyu, kubuno ndi mukukita bubo, tamunikuka nunse;

¹¹kubuno bubo muitabizibue nunse kuingila mu bukota butanakuzinda bua Mukota weitu, nu Monia weitu Yesu Klisto.

¹²Nsikuibilila kumukengelezia bubo bindi binsania, aba ndi mubizi, nu mualindibua mu bulili bumuli nabo.

¹³Nne nkukengela buno buli busoga, gankili mu numba zeno za mubili, nkumugugumania mu kumukengelezia;

¹⁴kubuno nizi buno kutuka kuane mu numba zeno za mubili kuseli buigi, anga buandolesizie Mukota weitu Yesu Klisto.

¹⁵Tondo aba kungua nakua nkutunda muakengela bitondo bibino bindi binsania.

¹⁶Kubuno isue tatuayangile misumo za buengelezi, gatuamukengelezizie magala ma Mukota weitu Yesu Klisto nu kuvua kuage; tondo tuamonine ku Bukota buage.

¹⁷Kubuno akasilue luanzo nu lutanuno kulsi Kalaga, gonguilue kuiyuki liatukile ku Lutanuno Lunene bune, Wono eli Muana wane u Ngoli zane, nakomana nage:

¹⁸nu iyuki lilino tualiunguleko nuisue liatukile muigulu, gatuabezaga nage ku muiduko wa kizila.

¹⁹Nuisue tuli neidagi lia bulengania bua lebelebe; mulole kulio anga kasuku kakusana mu kiziki kili kapilo, aba nu kusanuka kua busi, nu lukenikeni lua nindunindu lukasana mu mitima zeinyu:

²⁰menyazi tanga buno, takuli bulengania mu masanzo bunamenyua kuisulua anga bukutunda muntu.

²¹Kubuno bulengania tabualusizibue wakalazi ku lutundo lua bantu; tondo bantu batendilue na Kalaga, banagua na Muuza Wasililila.