Read lega-mwenga Kulolesibua 18 Bible Online

Kulolesibua 18 - lega-mwenga bible

Kulolesibua 18

¹Kusila kua bubo namonine ku ungo mugenzi wagelaga muigulu, abezaga na buangato bunene; nu kisi kiasanine na lutanuno luage.

²Nu alalukile neiyuki inene, atendile bune, Wagoa, wagoa Babulona munene, nu kuseli biziki bia basumbu, nu kikando kia miuza insania za nsese, nu kikando kia tuzoni tunsania tuasombua.

³Kubuno babilongo bansania banune maku ma butazi buage; nu bakota ba kisi bakitile nage butazi, nu bakunzia ba kisi baguma ku magala ma kuguma kuage.

⁴Nu nungule ku lingo iyuki liatukile muigulu, liatendile bune, Bantu bane, tukazi kueli, nu tamugomie na misako zage za buagi, buno munakivua kuba na tubebe tuage:

⁵kubuno misako zage za buagi zamoneka kuzo muigulu, nu Kalaga akengeide ku misako zage za buagi.

⁶Mukasazi anga buakasaga bango, nu mutalikilazi anga buakitile; mu kituma kiatopulilaga bango, mutopulilazikio mambizi mabili.

⁷Anga buikakile, nu kuigumia, bubo muitiazi na tubebe nu mulililazi; kubuno ekuikengela mu mutima wage bune, Nikuikala mukota nu nili mukikulu, nu nsili musigala, nu nsikaba na kabebe nunse.

⁸Kubuno tubebe tuage tukaba ku busi bumozi, lukuo, nu kulila, nu munganda; nu akazika na keiya; kubuno Mukota Kalaga wamusungizie eli na magala.

⁹Nu bakota ba ga kisi, bakitaga nage butazi nu bagumine nage, bakamulilila, gabakamona ku muki wa kuzika kuage,

¹⁰bakemana bulazi kubuno bakatina kabebe kage, bakatenda bune, Kabebe, kabebe, muino munene, Babulona, muino mubibu! kubuno lusungio luobe luavua mu nkungu emozi.

¹¹Nu bakunzia ba ga kisi bakamulilila nu bakamukuila kabebe, kubuno takuli muntu ukakunza bikulo biabo lingo;

¹²bikulo bia olo, nu feza, nu makozi ma bukunza bubibu, nu pelele, nu nsulu nsoga zabota, nu za pulupele, nu zatamba, nu miti za bulago; nu kituma kinsania kia mulamba wa nzogu, nu kituma kinsania kiakitilue na muti wa bukunza bubibu, nu kiuma kia nsubi, nu kiuma kina, nu makozi masoga;

¹³nu sinamone, nu kalafuno, nu bulago, nu aliga, nu mulobo, nu kasuku ka kibuagabuaga, nu makiti, nu bugali bua bota, nu mumpunge, nu ngombe, nu mikoko; nu mpunda, nu ngondangonda, nu bakobe; nu tulamo tua bantu.

¹⁴Nu biguma biwatundaga, biakutukila, nu bikulo binsania biabezaga bialongekua bia bugumi biakuzimina, nu tabakabimona lingo.

¹⁵Nu bakunzia ba bikulo bibino, bagumagia, bakemana bulazi kubuno bakatina kabebe kage; bakalila nu bakaba na kabebe;

¹⁶batendile bune, Kabebe, kabebe, muino munene wabezaga wavualikizibue nsulu za line nsoga, nu za pulepele, nu za kisimana, nu zalongekua na olo, nu makozi ma bukunza bubibu nu pelele!

¹⁷kubuno mu nkungu imozi bugumi bunene buazika. Nu unsania nyene buato, nu unsania ukuenda mu buato kunsania, nu basondelezia ba mato, nu bansania beli na mutali wabo ku mulimo wa mu kitatenge, bemanine bulazi,

¹⁸nu balilile nunse gabamonine ku muki wa kuzika kuage. Nu batendile bune, Muino mukizi uli anga wozo muino munene?

¹⁹Nu babikile mukungu ga matoe mabo, nu balilile, nu babezaga na kabebe, nu batendile bune, Kabebe, kabebe, muino munene, mugo bansania babezaga na mato mu kitatenge bagumine na bugumi buago! kubuno wazika mu nkungu emozi.

²⁰Gubogelazibogelazi, uwe igulu, nuinyue basuagibua, nuinyue basingua nuinyue balengania; kubuno Kalaga amusubile musubo weinyu.

²¹Nu mugenzi mubibu ekile ikozi anga ikozi inene lia kugoga nu alilekeide mu kitatenge, atendile bune, Bubo ubukeisoa Babulona, muino munene, nu tagukamonekako lingo.

²²Takukongubua kuiyuki lia beimbi ba zenze nu beimbi ba nimbo nu bekuida mpengu nu mionze muguli lingo; nu tamukaba mutumbi, nu aba weingo milimo insania muguli, takukazumibua muzumio wa kugoga muguli lingo;

²³nu kiengi kia tusuku takikasana muguli lingo; nu tabakungua kuiyuki lia musongi aba lia musongua muguli lingo; kubuno bakunzia bobe babezaga banene ba kisi; kubuno babilongo bansania bengeledue na buganga buobe.

²⁴Nu bamonine ku mikila za balengania nu za basuagibua, nu bansania beitilue ga kisi muguli.