Read lega-mwenga Kulolesibua 6 Bible Online

Kulolesibua 6 - lega-mwenga bible

Kulolesibua 6

¹Namonine ku Muana wa Mukoko akanduide kamenyikilo kamozi ku tuto mutuba kamo, nu nungule ku kibumbua kimozi ku bibio binazi bili na kalamo kiatendile neiyuki anga mukulumino wa mbula bune, Vua.

²Nu namonine ku mpunda zenga, nu wozo wabezaga wikala gantata gazo abezaga na bunta; nu akasilue nkumbu za bukota: nu avule buno akinde, nu kukinda.

³Nu gatikizie kamenyikilo ka tubili, nungule ku kibumbua kia bibili kili na kalamo kiatendile bune, Vua.

⁴Nu engo mpunda zabasile, mpunda zakisimana nunse; nu bakasile wozo wabezaga wikala gantata gazo magala kutikia bubobelelo ku kisi, buno bantu beitane; nu bamukasile bupanga bunene.

⁵Nu gakanduide kamenyikilo ka tusatu, nungule ku kibumbua kia bisatu kili na kalamo kiatendile bune, Vua. Nu namonine ku mpunda zina; nu wozo wabezaga gantata gazo abezaga na kiuma kia kulindika bizitu ku kuboko kuage.

⁶Nungule kuiyuki munkatini mua bibumbua binazi bili na kalamo liatendile bune, Nkumba emozi za mumpunge ku falanga makumi masatu, nu nkumba isatu za mizongu ku falanga makumi masatu; nu ntuite makiti nu maku.

⁷Nu gakanduide kamenyikilo ka tunazi, nungule kuiyuki lia kibumbua kia binazi kili na kalamo kiatendile bune, Vua.

⁸Nu namonine ku mpunda za kiema; nu izina lia wozo wabezaga wikala gantata gazo lili Lukuo; nu kiziki kia bakuzi (Hadese) kiamuyangile. Nu bakasilue buangato ku kindi kimozi kia binazi kia kisi, nu kuzikia bantu na bupanga, nu na munganda, nu na lukuo, nu na nyama nkali za mu kisi.

⁹Nu gakanduide kamenyikilo ka tutano, namonine kunsi kua kayulo tulamo tua bantu beitagua ku kabamba keidagi lia Kalaga, nu ku kabamba ka bulongeki bubabezaga nabo:

¹⁰nu balalukile neiyuki inene batendile bune, O Mukota, wasililila nu wa bulili, busi bukizi bukasuba mikila zeitu ku babo beikile ga kisi?

¹¹Bakasilue na muntu na muntu nsulu zenga; nu batendilue buno bomunue tanga, aba gakasila maganzo ma banyabo nu mibuto zabo, bakakua anga bubo bubakuaga.

¹²Namonine gakanduide kamenyikilo ka mutuba, nu kuabezaga kaningini kanene ku kisi; nu kisongo kia busi kinine anga nsago za nsulu zina, nu muezi wakisimene anga mikila;

¹³nu nkeninkeni za kuigulu zakolokile ga kisi, anga muti wa figi ukukolokia biguma bibisi gagukutengatenga na kisoa kinene.

¹⁴Nu igulu liagondilue anga katanda kagondua; nu miduko minene insania nu biziba binsania biatukizibue ku biziki biabio.

¹⁵Nu bakota ba kisi, nu bangati, nu bakota ba bakoloboyo, nu bagumi, nu babibu, nu bakobe bansania, nu bakandulua bansania, babisamine mu tulimba nu mu makozi ma ku miduko;

¹⁶nu babuide miduko nu makozi bune, Tulimbazi, nu tubisazi buno tatumone ku wozo wikile ga kisumbi kia bukota, nu ku bongua bua Muana wa Mukoko:

¹⁷kubuno busi bunene bua bongua buabo buakuka; nu nazi unemana?