Read lokele Matayo 12 Bible Online

Matayo 12 - lokele bible

Matayo 12

¹Nda mbile ena la lise lia Yenga, Yesu loeta nda bilanga ya bangwindi la baeki bande looka isiyɛ, iyo loakola ndotwaka bangwindi la ndolaka bao.

²Nde ɛnɛkɛ BaFalusi ongoma, iyo loonga lande mbo— Tɛnɛngo, baeki baɛ basotefola liti lia Yenga.

³Inde lomutola lau mbo— ¿Otitange eloakeläkä Dawidi, inde la ebaaka lande, la lise eliayalak’iyo la isiyɛ?

⁴Mbo inde lɔɔtɛlɛ ndakɔ ya Mungu, inde lola batuma ebatambomökö nda mɛsa ya Mungu ebatiaka bolomo lande la bato bande, sakolo ko la kanga angɛnɛ?

⁵¿Otitange imɔ nda Lokasa loa Bikela mbo— Nda Ndakɔ ya Mungu la lise lia Yenga, Kanga nd’atotefokola liti lia Yenga nde iyo basosakoelomo.

⁶Itoonga lanu, Imi mbo— Inde oyatolongela Ndakɔ ya Mungu ale ono.

⁷Eya ngo mbo walüwa litina lia elioi-li mbo— Ilɛmbi nde booto, inga nyama yolomu, ani otifek’iyo se ebati la litwanelo.

⁸Wana-wa-Boto ende to Ngɛnɛ wa Yenga.

⁹Asekwäkä Inde omao, Inde lɔɔtɔ nda ɛsɔngɔmɛlɔ yau,

¹⁰la boto wa bosamba bɔlɛmbɛtɛ lɔɛnɛlɛ omao. Iyo lofela Yesu mbo— ¿Engani nde la Bikela ndouwesa boto la lise lia Yenga? mbo bawanjeleke Inde.

¹¹Inde lomutoel’iyo mbo— ¿Ndai wanu oyayali la bɔkɔkɔ ko ɔmwito, la wao bokwa nda liöndo la lise lia Yenga, mbo inde angosaola wao?

¹²¿Boto aisolongela bɔkɔkɔ la loketi lofi? Eokao to engani nde ndokela olau la lise lia Yenga.

¹³Limɔ Inde loonga la boto mbo— Nanolaka bosamba waɛ; inde lonanola wao la wao losäsa kwa ebɔmɔi.

¹⁴Limɔ BaFalusi lokuswa, iyo lɔɔtɔ ikumbɛ loasɔ loande mbo bɛnɛkɛ mboka yool’Inde.

¹⁵Aluwäkä Yesu ongoma Inde losekwa omao okakɛ elela yasi la bikuke ya bato lotut’Inde la Inde louwekes’iyo batotina.

¹⁶Nde Inde loim’iyo mbo bataluwes’ato loasɔ loande,

¹⁷mbo baoi ba Yesaya ewa Bɔtɔndɔli bakɔchɔmɔkɔ mbo—

¹⁸Tɛnɛ, bokuwi wami oyasoaomo lami, Ale bosamomu wami oyasoomalesa botema wami. Itotel’Inde bolimo wami limɔ Inde atoɛnɛsɛ eba biese bitotina Likomyi lia njasɔ.

¹⁹Aitowalana, aitoanjanjaka, Limiki liande liitookana la oto angɔmwito nda mboka;

²⁰Aitotena liökökö elisomatakelomo, aitotiamesa lotambi elokoseka bolïlya; Konda akalongesek’Inde njasɔ ya Liengani limɔ

²¹Ko la lina liande tukela bitotina batokɛsɛkɛlɛ toɛli.

²²Lamao baeshaka end’Inde boto wa bolimo obe, aaka la botuku la euma la Yesu louwes’inde limɔ ewa euma loonga la inde lɔɛnɛ.

²³Bikuke ya bato lomwaala, iyo mbo— ¿Oyo ende to Wana wa Dawidi?

²⁴Nde okäkä BaFalusi loasɔ-lo iyo mbo— E-botoyo atokusola belimo ebe ko la Balasebula ako bɔkɔta wa belimo ebe.

²⁵Yesu aluwäkä baenyeli bau, Inde mbo— Bato ba yese ɛmɔi ebatonana iyo angɛnɛ, yese ena kosɛɛsɛlɛ; ongoma bato ba okenge ɔmɔi kwa bokulu bɔmɔi boatakana onana limɔ wao angokɔkɔmɔ. ¿Satana ekusola Satana, ani asoatana ndonana lande angɛnɛ, ongoma bɔkɔta wande kokɔkɔmɔ monito?

²⁶¿Eya mbo Imi nd’atokusola belimo ebe ko la bofoka wa Balasebula, bana banu nd’atokusola yao ko la ndai?

²⁷Eokao, iyo batoyala nde bakomyi banu.

²⁸Nde eya mbo Imi nd’asokusola belimo ko la Bolimo wa Mungu, aambo Bɔkɔta wa Mungu bosoya end’ino.

²⁹¿Boto atokɔkɔlɔ ɔɔtɔ nda ndakɔ ya bowangɔ mbo aindeke yeka yande, sakolo ko atotakandaka bowango; lamao inde koindaka ndakɔ yande?

³⁰Oyatikɛndɛnɛ lami, inde ende wiyani lami; oyatisɔnjɛ lami, inde nd’atomelesa.

³¹Ko l’eokao, isoonga lanu mbo— Njasɔ ibe bitotina la basɛɔli batotina ba bato komɛsɔlɔmɔ kongo ko lisɛɔli lia Bolimo litiangomɛsɛlɔmɔ;

³²ona boto oyatosɛɔlɔ Wana-wa-Boto, inde komɛsɔlɔmɔ, kongo ko oyatosɛɔlɔ Bolimo Botanu, atilamɛsɛlɔmɔ̈kɔ̈ ango nda mbile-ye ango nda mbile eyekayeke.

³³Takuliaka lɔmɔi—kwa mbo isandu shende silau la tuma twa shao tole tolau; kwa mbo isandu shende sibe la tuma tole tobe lisanga, eoka isandu silembeelomu la tuma twa shao.

³⁴Ino lioti lia njɔ, ¿Otokɔkɔlɔ nde ndoonga lioi lilau moni, ani ino angɛnɛ wende abe? Eoka bɔnɔkɔ nd’atoongaka ko yao ebitotumesaka botema.

³⁵Boto olau atokusolaka ko bilau ebile nda bondanda olau ebotumesi nde botema wande; boto obe atokusokola ko ebibe nda bondanda obe wa botema wande.

³⁶Im’itoonga lanu mbo— Nda lise lia Likomyi, bato batofomo nyongo ya lioi la lioi elisoong’iyo liongëlä;

³⁷eoka ko la baoi baɛ, aɛ kolongesomoko, la ko la baoi baɛ imɔ, aɛ kofomoko se.

³⁸Lamao bamɔi ba Batikasa la BaFalusi loongana lande, iyo mbo— Tolɛmbi nde ndɔɛnɛ ndembe end’Aɛ.

³⁹Kongo ko Inde lomutoel’iyo mbo— Fɛtɔ-ye ya obe la nyongo basokaluke ndembe ya ikesa, nde angwɛnɛ ango ɛmwito kofomo iyo, sakolo ngo ko ndembe ya Yona ewa Bɔtɔndɔli.

⁴⁰Eoka kwa ayalaka Yona la becho la njowa bisatɔ nda sɔlɔ ya engää ya swi, ko ongoma Wana-wa-Boto eyalaka nda nyɛlɛ ko becho la njowa bisatɔ.

⁴¹Bato ba Ninewe batoemesana la bato ba fɛtɔ-ye yanu nda lise lia Likomyi, la iyo batof’ino se, eoka iyo nd’akalanganäkä eoka ya inango sha Yona, nde tɛnɛngɔ oyalongeli Yona ngo ko eyamaya.

⁴²Bokɔta otomali wa yese ya Sheba atoemesana la e-fɛtɔ-ye nda lise lia Likomyi, la atof’iyo se, eoka asekwäkä olo nda liko lia wenda ndoyoka wɛlï wa Solomo, nde tɛnɛngɔ oyalongeli nde Solomo ngo ko eyamaya.

⁴³Bolimo wa lilo bosekwa to ende boto, wao atotandela bilela ebiti la balia okaluke fofe yolengela omao, kongo ko angotɛnɛ yao;

⁴⁴Lamao inde koonga mbo— Itoinwa nda ndakɔ yami olo asekweliki’mi. Akayek’inde omao, atosha yao fololo, ani esɔmbɔmɔ la esokomyomo.

⁴⁵Limɔ atɔkɛ okɔsɔ belimo osambale yasi ebisoet’inde la obe, la iyo yaatotina kɔɔtɔkɔ ndakɔ okayalaka ina, la boyaeli wa mbisa wa oto ona bosoetela ewa oso la bobe. Loyalaka ko ongoma imɔ la e-fɛtɔ-ye ya obe.

⁴⁶Atitasiläkä Yesu ndoonga la bikuke ya bato, nyango la bitungani yande loemala lousa, iyo lolɛmbɛ ndoyaongana lande;

⁴⁷Oto ɔmɔi loonga lande mbo— Tɛnɛ nyango waɛ la bitungani yaɛ basoemalaka lousa, balɛmbi ndoyaongana laɛ.

⁴⁸Nde Yesu lomutola lande mbo— ¿Ndai ale nyango wami? ¿Bandai bende bitungani yami?

⁴⁹Limɔ Inde lonanola bosamba wande ende baeki bande, Inde mbo— Tɛnɛ, nyango wami la bitungani yami.

⁵⁰Inde oyatokela kwa alɛmbi Sango wami oyayali nda Use, ambo inde nd’ale etungani yami la welo wami la nyango wami.