Read lokele Matayo 17 Bible Online

Matayo 17 - lokele bible

Matayo 17

¹Mbisa ya bacho liambɛ, Yesu lɔɔsɔ Petelo, la Yakobo, la etungani ya Yakobo ako Yoane, Inde lɔkɛsɛnɛ lau olikolo lia löngo lofi, ko iyo angɛnɛ kongo;

²limɔ Inde lokindolomo bɔfɔnɔ wasi oso wa baiso bau, la bɔmbɔ wande longalikima kwa löwa, la bisinda yande imɔ lolangema langelele.

³Futuku Mɔsɛ la Eliya lɔɛnɛlɛ ani batoongana la Yesu.

⁴Lamao Petelo loonga la Yesu mbo— Ngɛnɛ, ende bolau end’iso ndoyala eyamaya, Aɛ bɔlɛmbɛ, isweke ono kumbo bisatɔ, ɛmɔi yaɛ, ɛmɔi ya Mɔsɛ, ɛmɔi ya Eliya.

⁵Angotasila ndoonga, lifita lia bolangalanga loyaisa iyo, la limiki lookana nda lifita, mbo— Oyo ende Wana wami wa losamɔ, oyatoomalesa’mi, okak’Inde.

⁶Okaka baeki lioi-li, iyo loomakana biɔmbɔ la se, iyo lowänga finɛ.

⁷Nde Yesu loyamata iyo, Inde mbo— Emalaka, owängëke.

⁸Ilak’iyo baiso, batiɛnɛ̈kɛ imɔ boto, sakolo ko Yesu angɛnɛ.

⁹Asekwäk’iyo nda löngo, Yesu loimak’iyo mbo— Okambesëke boto angɔmwito ebisoɛnɛlɛ sakolo ko ani Wana wa oto asɔtɛmwa nda liwa.

¹⁰Lamao baeki lofel’Inde mbo— Eok’iye, batikasa batoonga mbo loengani nde mbo Eliya atayaka oso?

¹¹La Yesu lomutoel’iyo mbo— Wewe Eliya nd’atoya oso ndoyakɔkɔmɛsɛ bitotina,

¹²nde Im’itoonga lanu mbo Eliya asoya ndoya, nde iyo batiluwek’inde la basokeel’inde kwa asosang’iyo. Ko ongoma Wana wa boto eokesomoko bowaü ko lau.

¹³Lamao baeki lolüwa mbo aongiki lau loasɔ loa Yoane Bolufi.

¹⁴Iyäkä iyo ende bikuke ya bato liasi, boto ɔmɔi loya ende Yesu, inde loswa balui se oso wande, inde mbo—

¹⁵Ngɛnɛ welaka wana wami botolome shota, eoka ale l’isekakɔkɔ la wale finɛ la mbile la mbile atokwaka nd’ösä, la nda balia imɔ ko ongoma;

¹⁶iyiki ende baeki baɛ, nde batikɔkɔlɛkɛ ndouwes’inde.

¹⁷Limɔ Yesu lomutola lande mbo— E-fɛtɔ-ye eti la liimeli, esofenyakana nde; ¿itoumwaka lanu ko mbile yanga? ¿Itokɔkɔmɛlɛ ino konda eni mbile? Eshak’inde l’ono ende’mi.

¹⁸Lamao Yesu loimaka bolimo obe, la wao lokuswa, la wana losäsa ko la mbil’ao.

¹⁹Limɔ baeki loya ende Yesu ko iyo angɛnɛ lande, iyo mbo— ¿Iso angokɔkɔlɔ ndokusola wao monito?

²⁰Yesu loonga lau mbo— Ko l’eoka ya liimeli lianu likɛkɛ, eoka itoonga lanu wewe mbo— Eya ngo mbo ino boyala la liimeli kwa lokoto lɔmɔi loa mbasɛ, ani ino koonga la e-löngo-lo mbo— Sokwa eya, etak’onamona, la loao kosokwa; angwɛnɛ imɔ loasɔ ango lɔmɔi eloitokɔkɔl’ino okela.

²²Ainwäk’iyo nda Ngalilai, Yesu loonga lau mbo— Wana wa boto ewambomoko nda besamba ya bato,

²³la batool’Inde, lamao mbisa ya bacho basatɔ, Inde kɔtɛmwɛsɔmɔ liasi. Iyo looka ikɛnɛnɛ sifi.

²⁴Iyäkä iyo nda Kafenauma, basɔnjaki ba lifaefi lia BaYuda loya ende Petelo, iyo mbo— ¿Boekesi wanu atikusole lopata loa lifaefi?

²⁵Inde mbo— Eingo. Aɔtɔkɔ Petelo nda ndakɔ, limɔ Yesu lotaonga oso wa Petelo, mbo— ¿Otoenyela to moni, Simona? ¿Bɛkɔta ya wenda-bo batɔɔsɔ bosömbo la bɔsɔmbi ende ndai? ¿Ende bana bau angɛnɛ kwa ende bana ba bɛɛnda?

²⁶Petelo mbo— Ende bɛɛnda. Yesu mbo— Ongoma, bana angɛnɛ angokamba bɔsɔmbi to.

²⁷Nde eoka mbo totakwesa bato-ba nda litwanelo, takɛndɛkɛ nda ngɔngɛ ya eliya, taka shuku, la swi eyetotangola shao ani osokɔkɛlɛ, aɛ kɔɔsɔ yao, akalioleke aɛ bɔnɔkɔ wa swi, aɛ koosha lopata lofi; ɔsɔkɔ loao, faefak’iyo loao loasɔ loaɛ lami.