Read lokele Matayo 24 Bible Online

Matayo 24 - lokele bible

Matayo 24

¹Yesu lokuswa nda Ndakɔ ya Mungu limɔ a kɛndɛk’Inde, baeki bande loyaɛnɛs’Inde bosweli wa Ndakɔ,

²nde Yesu loonga lau mbo— ¿Osɔɛnɛ to bitotina-bi? Isoonga lanu wewe mbo angwɛnɛ litalɛ ango limɔi lilamachomoko likolo lia liasi nde batotina belaukolomoko.

³Ayaläk’Inde se nda löngo loa Elaya baeki bayäkä end’Inde wisakumbo, iyo mbo— Kambesaka to iso mbile eyekayeke njasɔ-bi la eni ndembe yolembeela mbo osamboya la ya basilelo ba wenda-bo?

⁴Yesu lomutoel’iyo mbo— Lambaka la wɛlï mbo boto atalimb’ino,

⁵eoka wike batoya nda lina liami ani batoonga mbo— Imi yende Masiya la batoengolaka basi wike.

⁶Bolaokaka mboli ya bita la iwaesa sha bita; owangëke, eoka bilayaka nde, kongo ko losilo lokayi kɔni.

⁷Yese la yese bitowesana, la bɔkɔta la bɔkɔta batowesana, fondo la lotukeso loa nyɛlɛ bilayaka la elela la elela.

⁸Nde bitotina-bi bile ko liakoli lia ielo.

⁹Lamao bɛkɛsɛkɛ ino ende ebatokuchak’ino la batool’ino la boiyanomoko l’eoka ya lina liami nda tukela bitotina.

¹⁰Wike bekwaka se, la boto atowamba wina lande, la beiyanaka

¹¹la batɔndɔli ba nanga wike beyaka nde, limɔ iyo belimbaka basi wike.

¹²Limɔ eoka mbo litefoli litokonda finɛ, basi wike batotɛkwa, samɔ ya beoto bitosaa;

¹³kongo ko oyatokɔkɔmɔ ko nda liko, ambo inde elauwesomoko.

¹⁴Mboli Ilau-bi bilanangolomoko nda wenda bototina kwa boekï wotomo ende bato ba tukela bitotina. Lamao basilelo belayaka.

¹⁵Eokao, akɛnɛk’ino wɛnɛ bɔlɛlɔ wa lioma, eliaongomökö la Danyɛlɛ ewa bɔtɔndɔli, bosoyala nda Elela eyuchomo (oyatotanga aluweke litina)

¹⁶kwaamao eba Yudea bakweke mangu konda föngo.

¹⁷Boto eyala olikolo lia ndakɔ yande, angotasulwaka se okaluke biengo nda ndakɔ;

¹⁸boto eyala nda elanga angoinywa imɔ okenge okɔsɔ esinda yande.

¹⁹Aeko wale ende batomali ba lieme la ebatomwesa bana baɛlɛ nda bacho ana.

²⁰Sombolaka mbo botili ebokakwek’ino botaya nda bɔtɔkɔ kwa nda bɔfɛfyɔ, kwa la lise lia yenga,

²¹eoka nda bacho ana bifembi belayaka kwa ebitiayäkä oso, ango ko nda baakoelo ba wenda konda kwani la botilayek’imɔ ongoma liasi.

²²Aenaka mbo bacho bana betungesomoko, ani angwɛnɛ angɔmwito angouwa, kongo ko bacho bana belatungesomoko ko l’eoka ya ebaaomökö.

²³Nda mbile ena eyambo boto eonga lanu mbo— Tɛnɛ Masiya eyamaya; Tɛnɛ ale onamona, wimelëke,

²⁴Eoka BaMasiya ba nanga la bɛtɔndɔli ba nanga beyaka nde la tokesa la ndembe ya isosha mbo bekɔkɔlɔ ndolimbaka ango ebasoaaomo angɛnɛ.

²⁵Tɛnɛngɔ, isotäkambes’ino loao oso.

²⁶Eokao beonga lanu mbo— Tɛnɛ, ale nda liɔmbɛlɛ, otakuswëke okɛnɛ, beonga mbo— Tɛnɛ, ale nda kuku ya ndakɔ, wimelëke.

²⁷Eoka kwa atokuswa ibalibali fangi ya ɛsɔswɛlɔ ya bonyanya okɛnɛlɛ fangi ya baɔndwɛlɔ, bayelo ba Wana wa Boto beyalaka ko ongoma.

²⁸Eoka olo akayaleke bolyo, ambo toyoiyoli kosɔngɔmɔ ngo ko omao.

²⁹Lisasaya mbisa ya bifembi ya bacho bana, liso lia use litotufatufa la tengai angoanyemaka imɔ, la tolonge totokwaka se la befoka ya use betotukatuka.

³⁰Limɔ ndembe ya Wana wa Boto elaɛnɛlɛkɛ nda use, la tukela bitotina ya wenda belalelaka ndeli, limɔ belɛnɛkɛ Wana wa Boto atoya nda bafita ba use la bofoka la bɔfɛkɔ finɛ.

³¹Limɔ atotoma bakitomo bande ebatooma ifonge sifi la batosɔnjak’iyo ebasoaaomo l’olo l’olo fangi bitotina konda liko lia use konda liko elimɔi lia use.

³²Lüwaka loasɔ elosokwelomo la bokumo; atofɛtɛ wao la atɔ̈tɛkɛ batombɔ ba wao, ongoma otolüwa mbo eula esamboya.

³³Ongoma akɛnɛkɛ ino wɛnɛ njasɔ-bi bitotina, lüwaka mbo Inde asoya tina, ango nda bome.

³⁴Itoonga lanu wewe mbo— E-fɛtɔ-ye eitosila oso ani e-njasɔ-bi bitotina bikayi.

³⁵Use la se bilawanjwaka bao, kongo ko baoi bami batilawanjweke imɔ.

³⁶Nde angwɛnɛ oto angɔmwito nd’alüwi lise lina, kwa saa ena, bakitomo angolüwa, Wana angolüwa, sakolo ko Sango Inde nd’alüwi.

³⁷Nde kwa ayaläkä bato nda mbile ya Noa, belayalaka nda bayelo ba Wana wa Boto.

³⁸Eoka nda bacho oso wa fela efi, bato balakäkä bieka la bamwäkä, basɔngɔ̈kɔ̈ la basɔngɛsɔmɔ̈kɔ̈, konda lise eliaɔtɔkɔ Noa nda ndakɔ ya watɔ,

³⁹la batialüwäkä ani ayäkä fela efi loyaɔmbes’iyo yaatotina hɔmbɛ; bayelo ba Wana wa Boto belayalaka ko ongoma.

⁴⁰Lamao batolome bambale beyala nda elanga, ɔmɔi kosokolomo, ɔmɔi komachana.

⁴¹Batomali bambale beunda bosöngö wa lokulu lotwanga, ɔmɔi kosokolomo, oyo ɔmɔi komachana.

⁴²Eokao lambaka la wɛlï, oitolüwa bocho ebokayeke la Ngɛnɛ wanu.

⁴³Nde lüwaka mbo eya ngo mbo ngɛnɛ wa ndakɔ alüwäkä oso ko la mbile eyekayeke ewa wiya ani alambäkä la wɛlï l’ani atiamachäkä mbo ndakɔ yande efindolomoko la wiya.

⁴⁴Eokao enganaka la yose, eoka Wana wa Boto eyaka nda mbile eyeitoenyela lanu.

⁴⁵Ndai to atoyala bɔkɔwa wa likɔchi la wa wɛli ani ngɛnɛ wande oyasotalia inde bonyafala wa bato bande mbo akaelek’iyo bieka yau la lisho lioengana?

⁴⁶Limɛngɔ la olau ende bɔkɔwa ona ani ngɛnɛ wande atoyaosh’inde nda likuwa.

⁴⁷Itoonga lanu wewe mbo— Atotalia boto ona bonyafala wa yeka yande bitotina.

⁴⁸Nde eya mbo bɔkɔwa ona obe, eonga nda botema mbo— Ngɛnɛ wami asoumwaka oya;

⁴⁹lamao inde koakola oomaka bɛkɔwa ebamɔi, la ndolaka la ndowa bänä amamwito la basi ebatolɛwa bänä;

⁵⁰limɔ ngɛnɛ wa bɔkɔwa ona eyaka nde la bocho ebotïlüwe inde, ebotiwɛlɛ inde ngɛnɛ baiso,

⁵¹atomumol’inde la fimbo la atosɛl’inde amamwito la ebalimbaki olo atookana bileli la ngɛlɛtɛ ya bainyo.