Read lokele Matayo 26 Bible Online

Matayo 26 - lokele bible

Matayo 26

¹Asiläkä Yesu ndoongana lau ebaoi-ba batotina, limɔ Inde loonga la baeki bande mbo—

²Olüwi nde mbo mbisa ya bacho bambale, Elambɔ ya Lieti etoya la mbo Wana wa Boto ewambomoko mbo aolomoko nda liyeka.

³Lamao kanga ebieti, la biange ya bato losɔngɔmɔkɔ nda lɔmbɔ loa kanga eya wange ako Kayafa,

⁴la iyo lotwana kuko mbo baundeseke Yesu ko la shɔngɔlɔ mbo bolek’Inde.

⁵Kongo ko iyo loonga mbo— Inga nda lise lia Elambɔ mbo bato batakelaka etondo efi.

⁶Ayaläkä Yesu nda Betania nda ndakɔ ya Simona ewa baɛndi,

⁷otomali loya end’Inde la isako sha litalɛ sha baningo ba liɛsɛ ba loketi lofi fafo, la botomali losondola bao nda botö wa Yesu ani ayali Inde nda bieka.

⁸Nde ɛnɛ̈kɛ̈ baeki bande ongoma, iyo loongana la botema wäle, iyo mbo— ¿Koseya baningo-ba eok’iye?

⁹Bao beungesomo la loketi lofi fafo, yao kofomo ende eba touwe.

¹⁰Alüwäkä Yesu lioi-li, Inde loonga lau mbo— ¿Otosomel’inde ako otomali monito? Asokeela’mi likeeli lilau fafo.

¹¹Wende la eba touwe lanu mbile bitotina, nde oti lami amamwito lanu mbile bitotina.

¹²Eoka asondolik’inde baningo nda bindo yami, akeliki nde ani loasɔ loa loombomo loami.

¹³Itoonga lanu wewe to, mbo— L’olo l’olo atonangolomo Mboli Ilau nda wenda bototi, elosokela botomali-bo, loao imɔ koongomo kwa loenyelesomo loande.

¹⁴Limɔ ɔmɔi wa eba liu la bambale lina liande liko Yudasi wa Keliote, inde lɔkɛ ende kanga ebieti,

¹⁵inde loonga mbo— Otokulia ofa’mi iye, eyambo imi nd’atowamb’Inde end’ino? Iyo lokweel’inde bieto yoengana pata kama isatɔ.

¹⁶Konda mbile-ao Yudasi lolukä fofe yowamba Yesu.

¹⁷Nda lise lia oso lia Elambɔ ya lituma, baeki loya ende Yesu oyafel’Inde mbo— ¿Olɛmbi mbo tokomyelek’Aɛ Elambɔ ya Lieti mbo oleke yao anima to?

¹⁸Inde mbo— Kɛndɛkɛ nda okenge ende Asisa, ongaka lande mbo, Boekesi mbo— Mbile yami esamboya, itola Elambɔ ya Lieti nda ndakɔ yaɛ amamwito la baeki bami.

¹⁹La baeki lokela kwa akambesäkä Yesu iyo la iyo lokomya Elambɔ ya Lieti.

²⁰Iläkä buse litele, Inde loyala se nda bieka amamwito la baeki liu la bambale.

²¹Aläk’iyo, Yesu mbo— Itoonga lanu wewe mbo ɔmɔi wanu nd’atowamba’mi.

²²Iyo looka ikɛnɛnɛ sifi la iyo loakola ɔmɔi la ɔmɔi ndoonga lande mbo— ¿Ngɛnɛ, ende to imi?

²³Inde lomutola mbo— Inde oyasotaela bosamba amamwito lami nda lɔfɛfɛ, ambo inde-yo nd’atowamba’mi.

²⁴Wana wa Boto atɔkɛ ndɔkɛ kwa atomökö nda Lokasa eoka yande, kongo ko aeko wale ende oto ona oyatowamba Wana wa Boto. Bolau ende oto-ao ani atiaotomökö angootomo.

²⁵Lamao Yudasi oyawambäk’Inde, inde lomutola mbo— ¿Boekesi, ende to imi? Inde mbo— Aɛ nd’asoonga.

²⁶Aläk’iyo, Yesu lɔɔsɔ lituma, Inde lofa kelekëlë, Inde louna liao, Inde lofaefa baeki, Inde mbo— Ɔsɔkɔ, laka liao, lile bindo yami.

²⁷Lamao Inde lɔɔsɔ kɔpɔ, Inde lofa kelekëlë, Inde lofaef’iyo kɔpɔ; Inde mbo— Mwaka yao, ino yaatotina;

²⁸eoka eba bende bakila bami ba Ngɛla Eyai ebasosendolomo bato wike loasɔ loa limɛsɛli lia batwanelo.

²⁹Kongo ko itoonga lanu mbo— Itiamwe imɔ liamɔ-li lia boliki, konda lise lina elikamweke’mi eliyai amamwito lanu nda Bɔkɔta wa Sango wami.

³⁰Limɔ iyo lochwa bɔɛlɛ, iyo lokuswa okakɛ nda löngo loa Elaya.

³¹Lamao Yesu loonga lau mbo— Ino yaatotina otokwa se eoka yami la ebocho-bo, loatomökö nde nda Lokasa mbo— Itokuchaka Botingani, limɔ bɛkɔkɔ bitomelesomoko mya.

³²Nde mbisa ya litɛmwi liami, itoetel’ino oso konda Ngalilai.

³³Nde Petelo lomutola lande mbo— Ango batotina bekwa se loasɔ loaɛ, nde inga to imi, ango sinyo.

³⁴Yesu loonga lande mbo— Wewe, isoonga laɛ mbo, ko la ebocho-bo, oso ani kɔkɔ ekati lɔkɔkɔ̈lɔ̈kɔ, aɛ nd’atoanganya Imi baanganya basatɔ.

³⁵Petelo loonga lande mbo— Ambo yengani ndowa amamwito laɛ; nde imi itiangoangany’Aɛ. Baeki batotina loonga nde ko ongoma.

³⁶Iyäkä Yesu amamwito lau nda elela eyetangomu mbo Ngetesemane, Inde loonga la baeki mbo— Yalaka se ono ani Imi itokɛ onamona okasombola.

³⁷Inde lotolana la Petelo la bana bambale ba Sebedai, limɔ Inde loakola ndowa l’ikɛnɛnɛ sifi la lɔtɔtɔngɔ.

³⁸Inde loonga lau mbo— Botema wami bosowa l’ikɛnɛnɛ ambo showa, tatikalaka eya la lambaka lami.

³⁹Limɔ Inde lɔkɛ la oso sinyo, Inde loingala la bɔmbɔ nda nyɛlɛ ani atosombola mbo— Sango wami, eyambo lokɔkɔlɔ ongoma, kɔpɔ-ye eeteeleke’mi, tinga to lisangi liami, kangä eliaɛ likelomoko.

⁴⁰Inde loinywa ende baeki, Inde loosh’iyo ani basoingala ilɔ, Inde loonga la Petelo mbo— ¿Ongoma, botilongeke olamba lami ango saa ɛmwito?

⁴¹Lambaka la sombolaka mbo otaɔtɔ nda lisoshela; botema nde bosokimela kongo ko bindo bile la bɔlɛmbu.

⁴²Inde lɔkɛ likɛ lia ambale, okasombola mbo— Sango wami, eyambo kɔpɔ-ye angokɔkɔlɔ oeteela’mi sakolo ko imweke yao, ambo lisangi liaɛ likelomoko.

⁴³Limɔ Inde loinywa liasi ende baeki, Inde loosh’iyo basoingala tɔlɔ liasi, eoka baiso bau baaka la bolengelenge.

⁴⁴Inde lomach’iyo, Inde lɔkɛ lokasombola lisombola lia asatɔ ko la baoi-ao.

⁴⁵Limɔ Inde loinywa liasi ende baeki, Inde loonga lau mbo— Ingalaka to, eumaka.… Tɛnɛngɔ, saa esamboya, Wana wa Boto akowambomo nda besamba ya bato abe.

⁴⁶Emalaka, tɔɛkɛ. Tɛnɛ, inde oyatowamba’mi ale oko tina.

⁴⁷Aaka Inde atoonga, kwaamao Yudasi loya, ɔmɔi wa eba liu la ambale, la amamwito lande ekuke ya bato la chaka la totumbe, ebasokwäkä ende kanga ebieti la biange ya bato.

⁴⁸Inde oyawambi to Yesu nd’afäk’iyo ndembe oso, mbo— Boto oyatota’mi et’inde ichou, ambo inde-yo; undesaka’Inde ngwi.

⁴⁹Ongoma Yudasi loya kwaamao ende Yesu, inde mbo— Liseeli end’Aɛ, Boekesi; la inde lot’inde ichou.

⁵⁰La Yesu loonga lande mbo— Wina, oyeli nd’iye? Lamao iyo loyela Yesu otel’Inde besamba, iyo loundes’Inde ndɔkɛ lande.

⁵¹Futuku, ɔmɔi wa ebayäkä la Yesu lonanola bosamba wɔɔmɔlɔ ambɔtɛ, inde loswa bɔkɔwa wa kanga eyeti, inde lotinya inde litoi.

⁵²Lamao Yesu loonga lande mbo— Ɔtɛsɛkɛ ambɔtɛ waɛ nda ekoko, eoka batotina ebatounda ambɔtɛ, batosɛɛsɛlɛ ngo ko la ambɔtɛ.

⁵³¿Otangi nde mbo itikɔkɔlɛ ndota Sango wami lioi la mbo Inde kotomela’mi ngo ko kwani basilikani bolongela bikuke liu la imbale?

⁵⁴¿Nde eya to ongoma, baoi ba Kasa kokɔchɔmɔ moni, ani Kasa yaongäkä mbo loyaka ngo ko ongoma?

⁵⁵Limɔ Yesu ko la mbil’ao, loonga l’eba bikuke mbo— Oyeli oyaundesa’mi la chaka la totumbe, kwa mbo yende booni? Lise la lise ayaläkä’mi lanu, nda Ndakɔ ya Mungu, aekesiki’mi ino, otiundese’mi.

⁵⁶Nde bitotina-bi bisokelomo mbo Kasa ya Batɔndɔli bikɔchɔmɔkɔ. Lamao baeki batotina lomach’Inde, iyo lolɔmwaka.

⁵⁷Limɔ ebaundesäkä Yesu lɔkɛsɛ Inde ende Kayafa, ako kanga ya wange, omao olo asɔngɔmɔ̈kɔ̈ batikasa la biange.

⁵⁸Nde Petelo lotut’Inde esika konda lɔ̈mbɔ loa kanga eyeti, la inde lɔɔtɔ hɔu; inde loyala se omao amamwito la betingani mbo ɛnɛkɛ tuu ya loasɔ.

⁵⁹Kanga ebieti la eba ikumbɛ batotina loluka itɔmbɔ mbo boleke Yesu nde batiɛnɛkɛ,

⁶⁰ango bato wike lowanjel’Inde la nanga. Nde ko liili, bambale loyawanjel’Inde,

⁶¹iyo mbo— Oyo ango’yo loonga mbo— Isokɔkɔlɔ ndoukola Ndako ya Mungu la ndoswa yao liasi nda becho isatɔ.

⁶²Limɔ kanga eyeti loemala, inde loonga la Yesu mbo— Otiamutole ango lioi? ¿Tɔtɔmbɔ etosoya l’ebato-ba twende moni?

⁶³Nde Yesu loyalaka tau. Lamao kanga eyeti loonga lande mbo— Itotel’Aɛ ekanɔ ko la lina lia Mungu wa lokato mbo oluwesek’iso kwa mbo Aɛ wende ngo Masiya, ako Wana wa Mungu.

⁶⁴Yesu loonga lande mbo— Kwa asoong’aɛ ongoma; itoonga imɔ ko mbo wɛnɛkɛ nde Wana wa Boto elayalaka se nda bosamba w’olome wa Bofoka ani eyaka nda bafita ba use.

⁶⁵Limɔ kanga eyeti losalaka bisinda yande, inde mbo— Asosɛɔlɔ Mungu, ¿Tolukeke tɔtɔmbɔ twasi eok’iye? Tɛnɛngɔ, okooka ko kwani asosɛɔlɔ Mungu;

⁶⁶Likomyi lianu liende moni? Iyo lomutola mbo— Engani nde ndoolomo.

⁶⁷Limɔ iyo lotwɛlɛ Inde sɔi nda bɔmbɔ, iyo loomak’Inde toku, iyo losekel’Inde mbaka,

⁶⁸iyo mbo— Tatɔndɔɛlɛk’iso, Aɛ ako Masiya, ¿Oyo ndai oyasokuch’Aɛ?

⁶⁹Ayaläkä Petelo lousa nda lɔ̈mbɔ boseka ɔmɔi bosali loya end’inde, inde loonga la Petelo mbo— Aɛ imɔ oyaliki amamwito la Yesu wa Ngalilai.

⁷⁰Nde Petelo loanganya oso wau batotina mbo— Itiluwe elotoong’aɛ.

⁷¹Akuswäk’inde nda lilɛlɛ lia bome boseka wasi lɔɛnɛ inde, la inde loonga la bato ebayali omao, mbo— Oyo imɔ ayaliki amamwito la Yesu wa Nasalete.

⁷²Nde Petelo loanganya imɔ liasi oko la ekanɔ mbo— Itiluwe boto ona, fufo.

⁷³Mbisa ya mbile sinyo ebaemali omao loya oyaonga la Petelo mbo— Wewe, l’aɛ imɔ wende ɔmɔi wau, eoka ngɔlu yaɛ imɔ esotombol’aɛ.

⁷⁴Lamao Petelo loakola ndosenda bieo la ndotinyaka ekanɔ mbo— Itiluwe boto ona. Kwaamao kɔkɔ lota lɔkɔ̈kɔ̈lɔ̈kɔ̈,

⁷⁵la Petelo loenyela lioi eliaongäkä Yesu lande mbo— Oso ani kɔkɔ ekati lɔkɔ̈kɔ̈lɔ̈kɔ̈, otoanganya’mi banganya basatɔ. Lamao inde lokuswa lousa, inde lolela kɛlɛlikɛlɛli.