Read lokele Matayo 27 Bible Online

Matayo 27 - lokele bible

Matayo 27

¹Aaka bonyanya bososɔswa, kanga bieti la biange ya bato, iyo lɔtɔ ikumbɛ nda loasɔ loa Yesu mbo boolek’Inde.

²Akandäk’iyo okanda Yesu, iyo lɔkɛ lande okamach’Inde nda besamba ya Pilato ako Komanda wa Loma.

³Limɔ Yudasi oyawambäkä Inde, ɛnɛ̈k’inde mbo Yesu afomuku nde se, inde lokalangana, inde lokainola pata kama isatɔ ende kanga ebieti la biange,

⁴inde mbo— Isotwanelo ko ndowamba bakila ba oyati la loasɔ. Nde iyo mbo— ¿Loni to loasɔ loasu-lo? Aɛ angɛnɛ komyaka loao.

⁵Lamao inde lofifa bieto se konda kuku ya Ndakɔ ya Mungu, inde lokuswa, inde lɔkɛ okakwa linga.

⁶Nde kanga ebieti lɔɔsɔ bieto, iyo mbo— Lotiengane la Bikela ndota yao nda sanduku ya lifaefi, eoka ende bolïli wa bakila.

⁷Limɔ iyo lɔɔtɔ ikumbɛ sha loasɔ, iyo losomba elanga ya bakuki ba tei ya tɔlɔngɔ la bieto ina, elanga losɛɛlɔmɔ eombelo ya bɛɛnda.

⁸Eokao elanga ena lotangomo mbo Elanga ya Bakila, ko nd’eweuse.

⁹Lona eloaongäkä Yelemaya ewa Bɔtɔndɔli loakɔchɔmɔ̈kɔ̈ mbo— Baɔsɔ̈kɔ̈ pata kama isatɔ, bolïli wa Inde oyatinyomökö loketi ko la bana ba Isalaeli,

¹⁰La iyo losomba la bieto-ao elanga ya bakuki ba tei, Kwa aongäkä Ngɛnɛ eonga lami.

¹¹Limɔ Yesu loemala oso wa Komanda; la Komanda lofel’Inde mbo— ¿Aɛ wende Bɔkɔta wa BaYuda? Yesu loonga lande mbo— Aɛ nd’aongi ongoma.

¹²Awanjelomökö Inde la kanga ebieti la biange, Inde angomutola ango lioi.

¹³Limɔ Pilato loonga lande mbo— Otioke likama lia njasɔ ebisowanjel’iyo laɛ?

¹⁴Nde Yesu atimutole lioi nda loasɔ ango lɔmɔi, ongoma Komanda lomwaala finɛ.

¹⁵Nda lise lia Elambɔ, Komanda ayaläkä la boyaeli wofaikoela bato, ɔmɔi wa ebakandomu kwa asangäk’iyo.

¹⁶Bayaläkä nde la boto wa lokuku lofi nda bɔnyɔlɔlɔ ako Balaba.

¹⁷Eokao, asɔngɔmɔ̈kɔ̈ iyo oso wande, Pilato lofela bato mbo— ¿Olɛmbi nde mbo ifaikoelek’ino ndai to? ¿Kwa Balaba kwa Yesu oyasotomo Masiya?

¹⁸eoka Pilato aluwi nde mbo basoesha Yesu nda likomyi ko l’eoka ya lisiela kongo.

¹⁹Ayaläkä Pilato nda kɛka ya likomonyi, wali wande lotomel’inde wɛndi mbo— Oyalëke la loasɔ la boto ona oyengani, eoka yɛniki tale finɛ nda saki louse ko loasɔ loande.

²⁰Kongo ko kanga ebieti la biange, iyo lofumbesa ekuke ya bato mbo bafeleke Pilato ateke Balaba se la mbo basɛɛsɛlɛsɛkɛ Yesu.

²¹Limɔ Komanda lofel’iyo liasi mbo— Boni boto wau yaambale oyalɛmb’ino mbo ifaikoelek’inde eoka yanu? Iyo mbo— Kangä Balaba.

²²Lamao Pilato mbo— ¿Ikeleke to iye la Yesu oyasotomo lina liko Masiya? Iyo yaatotina mbo— Aolomoko nda lieka.

²³Komanda mbo— ¿Eoka iye? ¿Boni obe bosokel’inde? Kongo ko iyo loanjanja liasi imɔ mbo— Aolomoko nda lieka.

²⁴Lamao ɛnɛ̈kɛ̈ Pilato mbo atialongele, kangä mbo bato basambokela etondo, inde lɔɔsɔ balia, inde losoola bangasa bande oso wa baiso b’eba ekuke, inde mbo— Iti’mɔ la loasɔ loa bakila ba boto-yo oyengani, ino ɔsɔkɔ to loao.

²⁵Bato batotina loaola mbo— Bakila bande baomaneke oko end’iso la ende bana basu.

²⁶Limɔ inde lofaikoel’iyo Balaba, la aomakomökö Yesu fimbo, inde lofaef’iyo Inde mbo aolomoko nda lieka.

²⁷Lamao basilikani ba Komanda lɔkɛ la Yesu konda lɔ̈mbɔ loau, la iyo losɔngɔmɛsɛ botukä bototi wau oso wande,

²⁸iyo lowatola bisinda yande, iyo lowates’Inde esinda etelu;

²⁹iyo lotaka likala lia kɛ̈kɛ̈, la iyo lotel’Inde liao nda botö, iyo lɔsɛlɛ isosola nda lingasa lia olome; iyo loswel’Inde balui se la iyo lotak’Inde kömbö mbo— Liseeli, Bɔkɔta wa BaYuda-o.

³⁰Iyo lochwɛlɛ Inde sɔi, limɔ iyo lɔnɔkɔlɔ isosola, iyo loomaka Inde nda botö la shao.

³¹Limɔ asiläk’iyo ndot’Inde kungutu, iyo losokoel’Inde esinda etelu, iyo lowates’Inde esinda yande angɛnɛ, limɔ iyo lɔkɛs’Inde okaol’Inde nda lieka.

³²Akuswäk’iyo nda okenge, iyo lotowana la boto wa Kulene, lina liande liko Simona, iyo lotoles’inde lieka.

³³Iyäk’iyo nda elela eyatangomoko mbo Ngolongota (litina mbo Longö-loa-otö)

³⁴iyo lofaef’Inde bänä babuyani la lisoo lia shungu, alɛtɛk’Inde bao, nde atikulie ndomwa.

³⁵Asiläk’iyo ndoanyames’Inde nda lieka limɔ iyo lokaana bisinda yande ko ndota ngongo nda likao,

³⁶lamao iyo loyalaka se tɛɛ ndotingana lande omao.

³⁷Olikolo lia botö wande iyo lota liwanjeli liau owanjel’Inde, mbo— Oyo ende Yesu, Bɔkɔta wa BaYuda.

³⁸Limɔ ba beoni bambale loanyomo nda baeka bau lisanga, amamwito lande, ɔmɔi nda osamba wa olome la ɔmɔi nda osamba wa wali.

³⁹Ebetäkä losungakel’Inde, iyo lofilingekel’Inde betö,

⁴⁰iyo mbo— Aɛ, oyatomelesa Ndakɔ ya Mungu koswa liasi ko la becho isatɔ, uwesaka lokomba loaɛ angɛnɛ. Eyambo wende Wana wa Mungu, sokwaka nda lieka.

⁴¹Imɔ ko kanga ebieti amamwito la Batikasa la biange lolimbokol’Inde, mbo—

⁴²Auwekesäkä basi, atikɔkɔlɛ ndouwesa lokomba loande angɛnɛ. Ende Bokɔta wa Isalaele asokweke nda lieka kwani, limɔ iso koimel’Inde.

⁴³Asolendelo Mungu; ko Mungu ɛlɛmb’Inde, auwesek’Inde ko kwani, eoka Inde angɛnɛ nd’aongäkä mbo— Yende Wana wa Mungu.

⁴⁴L’eba beoni imɔ ebaanyemesomökö nda baeka lande, iyo lolimbol’Inde.

⁴⁵Ayäkä buse ifitika, lilima lokwa nda yese etotina konda lilongolongo,

⁴⁶Lamao tina la lilongolongo Yesu lota limiki lifi, Inde mbo— Eli, Eli, lama sabakatani? lile mbo— ¿Mungu wami, Mungu wami, moni osomachaka’mi booi?

⁴⁷Bamɔi ebemaläkä omao, iyo looka, iyo mbo— Inde nd’asota Eliya lioi.

⁴⁸Lisasaya ɔmɔi wau lokwa mangu okɔsɔ lilamba, inde lɔfɔɛsɛ liao nda bänä, inde lota liao nda ifende, inde lofa Yesu amweke.

⁴⁹Nde ebamɔi loonga mbo— Macha, twɛnɛkɛ ango Eliya ataya oyauwes’Inde.

⁵⁰Lamao Yesu lota limiki lifi liasi, Inde lokusola luli nda liwa.

⁵¹Kwaamao, esinda ya Ndakɔ ya Mungu losalya yaki imbale ko likolo ko se, la nyɛlɛ lotukatuka la batalɛ loachacha;

⁵²sai loliokolomo la belyo wike ya bato ebengani ebakwäkä ilɔ sha liwa, iyo lokuswakuswaka,

⁵³iyo losekwa nda sai mbisa ya batɛmwɛlɔ ba Yesu, iyo lɔɔtɔkɔ nda Bokenge Botanu, iyo lɔɛnɛlɛ ende bato wike.

⁵⁴Enɛkɛ Komanda wa basilikani la bato ebatinganaka la Yesu amamwito lande, ɛnɛ̈k’iyo lotukeso loa nyɛlɛ la tolombo etwakelomökö, inde lau lomwaala la bɔwa, iyo mbo— Wewe, Oyo aiki nde Wana wa Mungu.

⁵⁵Batomali nde wike baaka esika sumbu otichaka elokelomu, batomali ana batutäkä Yesu, basekweläkä Ngalilai okakukia Inde,

⁵⁶bamɔi baaka nde Malia wa Mangandala, la Malia nyango wa Yakobo la Yose, la nyango wa bana ba Sebedayo.

⁵⁷Iyäkä nde buse litele, boto wa lifoka oyasekwäkä nda Alimatayo, lina liande liko Yosefa, oyaaka imɔ boeki wa Yesu, inde lɔkɛ ende Pilato okaömba bolyo wa Yesu.

⁵⁸Limɔ Pilato loonga mbo bolyo bofomoko ende inde.

⁵⁹La Yosefa lɔɔsɔ bolyo, inde lolingela wao la bisinda bifufu,

⁶⁰inde loingesa wao nda losai loyai, eloande angɛnɛ eloafuwäk’inde nda batalɛ, inde loundukokola litalɛ lifi liolinja ɛɔtɛlɔ ya losai, limɔ inde lɔkɛ,

⁶¹nde Malia wa Mangandala la Malia oyɔmɔi baaka omao, bayaläkä se tina la losai.

⁶²Lɛlɛngɔ, nda lise elisotüta elia lokomyo (loa Yenga), kanga ebieti la BaFalusi lokatowana ende Pilato,

⁶³iyo loonga lande mbo— Ngɛnɛ, tokoenyela mbo e-boto wa bolimbakeli-bo akoyali Inde la liwawi, aongäkä mbo— Mbisa ya becho isatɔ yekuswaka liasi.

⁶⁴Eokao, taka sumbu ndola mbo losai lɔsɔlɔnɛsɔmɔkɔ sɔlɛ̈ konda bocho w’isatɔ, mbo baeki bande batakɛ okainda Inde limɔ bataonga la bato mbo asokuswa nda liwa; ongoma ikitakitä sha liili sitolonga esha oso la bolimbake.

⁶⁵Pilato loonga lau mbo— Wende la bato bolambaka, kɛndɛ okasɔlɔnɛsɛ losai sɔlɛ kwa asokɔkɔlɔ ino.

⁶⁶Iyo lotangwa okasɔlonɛsɛ losai, iyo lokɔkɔmɛsɛ litalɛ la chapa, la iyo lotika basilikani bolambaka loao.