Read lokele Matayo 28 Bible Online

Matayo 28 - lokele bible

Matayo 28

¹Asamboeta lise lia osambale (Yenga ya BaYuda), ani yömbe ya lise lia oso lia yenga esokangwa, Malia wa Mangandala la Malia oyɔmɔi, iyo loya oyɛnɛ losai.

²Futuku, nyɛlɛ lotukatuka likama, bokitomo wa Ngɛnɛ Mungu losulwa se nda Use, inde loyaundukola litalɛ, inde loyala se nda liao.

³Inde lɔɛnɛlɛ kwa ibalibali la bisinda yande bifufwi kwa basasɛ ba mbula;

⁴basilikani ebalambi loilikima la bɔwa, iyo lolewa kwa ebasowa.

⁵Nde bokitomo loonga la batomali mbo— Owangëke, ino batomali, eoka iluwi nde mbo osolukä Yesu oyaolomu nda lieka;

⁶ati’mɔ ono, eoka asotɛmwa kwa aongäk’Inde. Yauku oyɛnɛ elela eyeingael’Inde.

⁷Limɔ kɛndɛkɛ mangu okakambesa baeki bande mbo asotɛmwa nda liwa, la kwanikwani asɔkɛ oso wanu konda Ngalilai, wɛnɛkɛ nd’Inde omao. Tɛnɛ, isokambesa nd’ino.

⁸Lamao batomali losekwa lisasaya nda losai la bɔwa la linɛngina lifi; iyo lokwaka mangu okakɛsɛlɛ baeki bande wɛndi.

⁹Limɔ futuku, Yesu lotowana lau nda mboka, Inde mbo— Saelaka betema. Iyo loyel’Inde oyakusamel’Inde batindi, iyo losemol’Inde.

¹⁰Limɔ Yesu loonga lau mbo— Owangëke, kɛndɛkɛ okakambesa bitungani yami mbo batetaka konda Ngalilai, bɛnɛkɛ nde’mi omao.

¹¹Aɛkɛ batomali ongoma, basilikani bamɔi (ebalambiki losai) loiya nda bokenge (wa Yelusaleme) iyo lokambesa kanga ebieti bitotina ebikelomuku.

¹²Asɔngɔmɔ̈kɔ̈ iyo la biange imɔ, aɔtɔk’iyo ikumbɛ, iyo lofaefa basilikani bieto ya likama,

¹³iyo mbo— Ongaka mbo baeki bande bayiki la ocho ndoinda Inde ani toingali tɔlɔ.

¹⁴Eyambo loasɔ loiya nda batoi ba Komanda, iso nd’atoɔngɔl’inde mbo ino otɛnɛ efembi nda loasɔ-lo.

¹⁵Iyo lɔɔsɔ to bieto, iyo lokela kwa akambesomu iyo; eokao lioi-li lisookana ende BaYuda konda eweuse.

¹⁶Nde baeki liu la ɔmɔi lɔkakɛ konda Ngalilai, nda löngo eyakuliaka Yesu lau oso.

¹⁷Enɛ̈k’iyo wɛnɛ Yesu, iyo losemol’Inde, kongo ko bamɔi lota fee.

¹⁸Limɔ Yesu loya tina, Inde loonga lau mbo— Isofomo tososha tototina la nda Use la ono se.

¹⁹Eokao kɛndɛkɛ okasɛlɛ bato nda wenda bototina baeki bami, lufiak’iyo ko nda lina lia Sango la Wana la Bolimo Botanu,

²⁰ani otoekekes’iyo ndolitesa bitotina eyateläkä’mi otel’ino bikela. Tɛnɛ, Imi yende ngo ko amamwito lanu, lise la lise konda basilelo ba wenda.