Read lokele Matayo 8 Bible Online

Matayo 8 - lokele bible

Matayo 8

¹Ayäkä Yesu se ndoyasokwa nda löngo, bikuku bifi ya bato lotut’Inde.

²Futuku, boto wa baɛndi loya ende Inde, inde lokwa bakulusembe oso wande’inde mbo— Ngɛnɛ, bolɛmbɛ, aɛ kokɔkɔlɔ ndotanesa’mi.

³Yesu lonanola bosamba, Inde lomat’inde, Inde mbo— Ilɛmbi nde ongoma, tanesomoko to. Lisasaya baɛndi lotanesomo.

⁴Yesu loonga lande mbo— Tɛnɛkɛ, okambesëke oto angɔmwitoto, nde kɛndɛkɛ okatamba bindo yaɛ ende kanga, faefaka Mungu lifaefi kwa ataka Mose ekela kwa ndembe ende bato.

⁵Aɔtɔkɔ Inde nda Kafenauma, Komanda wa basilikani loya oyalɔmbɔkɔl’Inde,

⁶inde mbo— Ngɛnɛ, bɔkɔwa wami aingali se nda ndakɔ la loo loa bɔlɛmbɛtɛ la bomusi finɛ.

⁷Yesu loonga lande mbo— Itoya ndoyasäsola inde.

⁸Komanda lomutola mbo— Ngɛnɛ, itiengane mbo ɔɔtɛkɛ ose ya bɔtɔndɔ wami, nde waonga ngo ko lioi kongo, limɔ bɔkɔwa wami kosäsolomo;

⁹eoka imi angɛnɛ yende oto wolitesa isosha la yende imɔ la basilikani ose yami, la yeonga la ɔmɔi mbo— Kɛndɛkɛ, limɔ atɔkɛ; la ende wasi mbo— Yauku, inde atoya; la ende bɔkɔwa wami mbo— Kelaka lona, limɔ atokela loao.

¹⁰Okaka Yesu baoi-ba, Inde lomwaala, Inde loonga lau ebatutaka mbo— Ikoshi kɔni liimeli lifi ongoma ango ende bato ba Isalaele angɛnɛ.

¹¹Isoonga lanu ongoma wewe la mbo wike besokwaka fangi ya batɛmwɛlɔ ba bonyanya la fangi ya litele ndoyayalaka se nda bieka amamwito la Abalayama la Yisaka la Yakobo nda Bɔkɔta wa Use,

¹²nde bana ba Bɔkɔta belaumbolomoko nda lilima lousa, olo elayalaka bileli la ngɛlɛtɛ ya bainyo.

¹³Limɔ Yesu loonga la Komanda mbo— Kɛndɛkɛ to; kwani asoimel’aɛ, loao lokelomoko ko ongoma end’aɛ, la bɔkɔwa wande losäsolomo ko la mbile-ao.

¹⁴Ɔtɔkɔ Yesu nda ndakɔ ya Petelo, Inde loosha boïli wa Petelo nda efima la loo loa etao.

¹⁵Yesu lomata bosamba wande limɔ etao losokwa end’otomali, inde loemala ndokasung’inde.

¹⁶La likɔlɔse, iyo loesel’Inde bato wike ebaaka la belimo ebe lamao Inde lokusola belimo ko la lioi, la Inde losäsola batotina eba kambo,

¹⁷mbo lioi eliaongomökö la Yesaya Bɔtɔndɔli likɔchɔmɔkɔ mbo— Inde angɛnɛ aɔlɔkɔ bɛlɛmbu yasu, Atolaka imɔ ngwo yasu.

¹⁸Ɛnɛkɛ Yesu biindi bifi bisolingel’Inde, Inde loonga lau mbo balekeke nda boili wasi,

¹⁹nde Botikasa ɔmɔi loyaonga lande mbo— Boekesi itutek’Aɛ l’olo atɔkɛ laɛ.

²⁰Yesu loonga lande mbo— Bɛlɛndɛ bile la baondo la nɔli bile la bikalingo, nde Wana wa Boto ati ango la elela yoingesa botö wande se.

²¹Boeki wasi loonga lande mbo— Tamachaka’mi mbo ikɛkɛ okaomba sango wami.

²²Nde Yesu loonga lande mbo— Tutaka’mi, la machaka ebasowa baombakeke ebawi lau.

²³Akwaka Yesu nda watɔ, baeki bande lotut’Inde,

²⁴Futuku lomba lofi loya se nda eliya la ongoma watɔ bosiki olia la batutu, nde Yesu loingalaka ilɔ;

²⁵Baeki loyasisɔl’Inde, iyo mbo— Ngɛnɛ, uwes’iso, tososɛɛsɛlɛ.

²⁶Yesu loonga lau mbo— Owängiki moni? Ino ba boeno wa lilendelu. Lamao Inde loemala, Inde loima lofofo la balia, la eliya lotemba tembelele.

²⁷Nde bato lomwaala, iyo mbo— Boni bɔfɔnɔ wa boto-yo, eoka la lomba la balia ba eliya kolitesa lioi liande.

²⁸Iyaka Yesu nda boili wasi, boko yese ya BaKelesene, bato bambale ebayalaka la belimo ebe loyatowana lande. Bakuswaka nda fowa biko sai oyatowana lande, la eoka ya bolengi finɛ angwɛnɛ boto wokɔkɔlɔ ndoeta la mboka ena.

²⁹Futuku iyo loamama mbo— Iso laɛ twende la loni loasɔ, Aɛ Wana wa Mungu? Oyi nde eyamaya ndoyokes’iso biäle oso wa lisho liasu?

³⁰Esika lau liasa lia ndɛi yaläkä bieka.

³¹Belimo ebe losombol’Inde mbo— Bokusol’iso, kɛsɛkɛ to iso nda liasa lia ndɛi. Inde loonga lau mbo— Kɛndɛkɛ.

³²Akuswäkä iyo, iyo lɔɔtɛlɛ ndɛi limɔ liasa litotina lokwa mangu konda löngo konda eliya la yao lowa nda balia.

³³Betingani ya ndɛi lofata mangu konda bokenge, iyo lokambesa bato bitotina loasɔ loa bato ana ebayalaka la belimo ebe.

³⁴Lisasaya batotina ba bokenge lokuswakuswaka oyatowana la Yesu; ɛnɛk’iyo wɛnɛ Inde, iyo losombola Inde mbo asekweke nda yese yau.