Read lokele Malako 3 Bible Online

Malako 3 - lokele bible

Malako 3

¹Lise liasi Inde lɔɔtɔ nda ɛsɔngɔmɛlɔ la boto aaka omao la bosamba bɔlɛmbɛti.

²Iyo lolamba Yesu eluwa atouwes’inde la lise lia Yenga, mbo bawanjeleke Inde.

³Limɔ Yesu loonga la boto wa bosamba bɔlɛmbɛti, Inde mbo— Emalaka, yauku l’ono nd’atiteni.

⁴Inde loonga lau mbo— Loni losoengana la Yenga, ndokela olau, kwa ndokela obe? ¿Kwa ndouwesa oto kwa ndoola oto?

⁵Kongo ko iyo loyala hai, Yesu lɔmwɛlɛ iyo la botema wale, inde looka ngandi eoka ya betema yau bewau. Inde loonga la boto mbo— Nanolaka bosamba waɛ. Inde lonanola wao la wao luwa kwa ebɔmɔi.

⁶Limɔ BaFalusi lokuswa, iyo lɔɔtɔ ikumbɛ amamwito l’eba Helodi mbo bɛnɛkɛ mboka yool’Inde.

⁷Nde Yesu la baeki bande losekwa, iyo lɔkɛ fangi ya eliya. Wike wa bato lotutak’Inde, l’eba Ngalilai, l’eba Yudea, l’eba Yelusaleme, l’eba Idumea, l’eba fangi yasi ya Yaledene, l’eba yese ya Tuloa la Sidona,

⁸okakä iyo mboli ya bitotina ebiakelaka Inde, iyo loya ende Yesu.

⁹Inde loonga la baeki bande mbo batonjelek’Inde watɔ woumbakel’Inde eoka ya bokamu wa bato, mbo batawamak’Inde.

¹⁰Eoka Inde louwekesa wike la bato lolingel’Inde la bokamu mbo eba ngwo bamateke Inde.

¹¹La ɛnɛkɛ belimo ebe wɛnɛ Yesu, iyo lotulamel’Inde se, iyo loamama mbo— Aɛ wende Wana wa Mungu.

¹²Nde Inde loim’iyo mbo bataluwesa bato loasɔ loande.

¹³Inde lɔkɛ olikolo lia löngo, lamao Inde lota ebalɛmbɛk’Inde lioi la iyo ana loyel’Inde.

¹⁴la Inde lofa bato liu la ambale isosha mbo bayalakeke lande la mbo atomakek’iyo ndokakambesa wɛndi,

¹⁵la ndokusola belimo ebe.

¹⁶Inde lota eba liu la ambale, bako Simona (Yesu lot’inde lina mbo Petelo)

¹⁷la Yakobo wana wa Sebedayo, la Yoane etungani yande (Yesu atak’iyo ambale lina liko Boanegesi, litina mbo Bana ba kaki)

¹⁸la Andelo la Filipo, Balatomayo, la Matayo, Toma, la Yakobo wana wa Alufayo, la Tadayo, la Simona wa Kanana,

¹⁹la Yudasi wa Keliota, oyawambaka Yesu. Limɔ iyo loinwa nda ndakɔ,

²⁰la bokamu wa bato losɔngɔmɔ liasi l’ani iyo angokɔkɔlɔ ango ndola bieka.

²¹Okaka bato bande ongoma, iyo loya mbo baundek’Inde; iyo mbo— Asowa loseka.

²²Limɔ batikasa ebasokwaka nda Yelusaleme iyo loonga mbo— Asɔɔtɛlɔmɔ la Balasebula, la atokusola beimo ebe ko la lisungi lia bokɔta wa belimo ebe.

²³Limɔ Yesu lot’iyo lioi la Inde loonga lau la bembila, Inde mbo— ¿Satana atokɔkɔlɔ ndokusola Satana monito?

²⁴Eyambo bokenge bosoatana bonanakeke limɔ wao boitokɔkɔmɔ.

²⁵Eyambo bofindi bosoatana ongoma, wao imɔ angokɔkomɔ.

²⁶Satana imɔ enana lande angɛnɛ, ani bofoka wande bosoatana aitokokɔmɔ, asosila fɛɛ.

²⁷Eoka boto angokɔkɔlɔ ndɔɔtɔ nda ndakɔ ya bowangɔ mbo aindeke yeka yande, sakolo ko atotakanda bowangɔ, lamao inde koindaka ndakɔ yande.

²⁸Ongoma isoonga lanu wewe mbo— Njasɔ ibe bitotina bitomɛsɔlɔmo la basɛɔli batotina ba bato imɔ,

²⁹sakolo ngo ko oyatosɛɔlɔ Bolimo Botanu atiaolɛkɛ limɛsɛli, bobe wande bolayalaka layalaya.

³⁰Inde ongoma eoka bato mbo— Ale la bolimo obe.

³¹Limɔ nyango la bitungani yande loya, iyo loemesana lousa loa ndakɔ ani basotoma wɛndi end’Inde ot’Inde lioi.

³²La windi wa bato lolingel’Inde, iyo mbo— Tɛnɛ, nyango waɛ la bitungani yaɛ bale lousa la batolük’Aɛ.

³³Inde lomutoel’iyo mbo— ¿Nyango wami ndai? ¿Bitungani yami yende ndai?

³⁴Limɔ Inde lɔɛlɛlɛ bato ebayalaka se tina lande, Inde mbo— Tɛnɛ nyango wami la bitungani yami. Inde oyatokela kwa alɛmbi Mungu, inde nd’ale etungani yami la welo wami la nyango wami.