Read lokele Malako 7 Bible Online

Malako 7 - lokele bible

Malako 7

¹Limɔ BaFalusi la Batikasa bamɔi ba Yelusaleme loyasɔngɔmɛlɛ Yesu;

²iyo lɔɛnɛ baeki bande bamɔi ebasola bieka ani besamba yau bititatane, (litina mbo, bititasoolomo).

³(BaFalusi la BaYuda angola bieka ani bakasooli besamba konda batundulundu,

⁴eoka ndolitesaka imɔ ndola wike ya bangau, la atosekwak’iyo nda liongo, iyo angola imɔ bieka ani bakakwi tokuli; ele imɔ la ndola yasi wike ebitolites’iyo, biko lisooli lia kɔpɔ la tei la biɛ̈ngɔ ya mbela)

⁵BaFalusi la Batikasa lofel’Inde mbo— ¿Baeki baɛ batotefola ndola ya bangau ani moni nde kola bieka la besamba ebikasoolomu?

⁶Inde lomutoel’iyo mbo— Yesaya atɔndɔlɔ̈kɔ̈ wewe loasɔ loanu eba bolimbakeli-losotoma nda lokasa loande mbo— E Bato-ba batolitesa’mi la bɛnɔkɔ, Kongo ko betema yau bile esika lami.

⁷Batosemola’mi lisemoela, Eoka liekesi liau lile ko bikela ya bato.

⁸Ongoma ino otomachaka bikela ya Mungu, nde kolitesa ndola ya bato.

⁹Inde mbo— Ino oluwi finɛ ndotombola bikela ya Mungu mbo oliteseke ko ndola ya bato angɛnɛ.

¹⁰Eoka Mose loonga mbo— Litesaka sango waɛ la nyango waɛ la imɔ mbo— Oyatomɔlɔ sango kwa nyango, aweke wewe.

¹¹Nde ino otoonga mbo— Boto eonga la sango wande kwa nyango wande mbo— Yeka esambɔɔlɔ ino ende’mi, yao ele Kobana (litina mbo Lifaefi)

¹²limɔ osofekel’inde mbo angofa sango kwa nyango yeka.

¹³Ongoma osotombola lioi lia Mungu ko la baiti banu ba kwala, la otokelaka yasi wike ya bɔfɔnɔ-bɔ.

¹⁴Limɔ Inde lota windi w’ato lioi oya ende Inde, la Inde mbo— Okaka’mi la wɛlï, ino batoti,

¹⁵Angwɛnɛ yeka eyele lousa loa oto, eyetokɔkɔlɔ ndosɛlɛ inde la bɔwɛwɛ, kangä yao ebitokuswela oto nd’atobebes’inde la bɔwɛwɛ.

¹⁷Asɛnyanaka Inde la windi wa bato, Inde lɔɔtɔ nda ndakɔ, baeki bande lofel’Inde loasɔ loa bombila-bo.

¹⁸Inde mbo— ¿Imɔ ko ino, oti la liluwani? Otiluwe nde mbo yeka eyele lousa loa oto la eyetɔɔtɛlɛ inde, angokɔkɔlɔ ndosɛlɛ inde la bɔwɛwɛ

¹⁹eoka yao etɔɔtɔ nda sɔlɔ yande, inga nda botema, la etonyomo nda toi. (Ongoma Yesu lɔsɔmbɔlɔ bekili ya bieka)

²⁰Limɔ Inde loonga mbo— Ende yao eyetokuswa nda botema wa oto nd’atosɛlɛ inde la bɔwɛwɛ,

²¹eoka bitosekwa nda botema biko-yɛmɛ ibe, bolëfë, la wiya, lioli-lia-oto, nyongo,

²²bolole, luno, bolimbake, ifoifoi, lisiëlä, limɔli, bɔfɛnɔa, la ebebe.

²³Bitotina-bi bitokuswa nd’atiteni ya oto, la yao nd’atosɛlɛ oto la bɔwɛwɛ.

²⁴Limɔ Yesu loemala, Inde lɔkɛ nda bolelo wa yese ya Tulo (la Sidona); Inde lɔɔtɔ ndakɔ la atialɛmbɛkɛ mbo bato baluweke olo ayali Inde, kongo ko atiakokɔlɔkɔ ndoisama.

²⁵Nde lisasaya otomali oyaaka la wanaotomali wa bolimo obe, okaka inde mboli ya Yesu, inde loya oyakwa se nda bakolo bande.

²⁶Otomali aaka wa BaHela ba tukela ya Sulo-Fonisa la inde losombola Yesu mbo akusoleke bolimo obe ende wana wande.

²⁷Yesu loonga lande mbo— Bana bataokaneloko, eoka etiengane ndoɔnɔkɔlɔkɔ lituma lia bana okafaefa ngwa.

²⁸Botomali lomutoel’Inde mbo— Eingo Bɔkɔta, kongo ko ngwa ose ya mɛsa bitolaka bakɔmbɔ ba lituma ebatokwesa bana omao.

²⁹Yesu loonga lande mbo— Ko l’eoka ya lioi-li kɛndɛkɛ eyaɛ, bolimo bosokuswa ende wanaotomali waɛ.

³⁰Otomali lɔkɛ eyande la inde loosha wana ani asoingala nda tange ani bolimo obe asosekwa.

³¹Asekwaka Yesu nda yese ya Tulo, inde loeta la mboka ya Sidona, la yese ya Ndekapolis konda Eliya ya Ngalilai.

³²Lamao baeshelak’Inde boto wa bökö la likekuma la iyo losombol’Inde mbo atalieke bosamba wande end’inde.

³³Yesu losokol’inde sisi ya bokamu wa bato, Inde lɔkɛ lande wisakumbo isisika, Inde lota tosangakala nda batoi ba oto, Inde lotwɛlɛ sɔi, Inde lomata lolamɛ loa oto;

³⁴limɔ Inde loticha nda use ani atotwa liena, Inde loonga lande mbo— Efata (litina mbo, Liolomoko).

³⁵La batoi bande loliolomo la itangau sha lolamɛ losɔmbɔlɔmɔ, inde loonga la wɛlï.

³⁶Yesu loim’iyo mbo batakambesa oto angɔmwito, kongo ko ango aimäkäkä iyo, ongoma iyo lokakambekese bato.

³⁷Bato lomwaala finɛfinɛ, iyo mbo— Asokelaka bitotina la olau woetela; atookesa eba bökö, la atoongesa eba biuma.