Read lokele Malako 9 Bible Online

Malako 9 - lokele bible

Malako 9

¹Inde loonga lau mbo— Isoonga lau wewe mbo bato bamɔi ebemali eya batiawëkë konda akɛnɛk’iyo Bɔkɔta wa Mungu bosoya la bofoka.

²Mbisa ya bacho liambɛ Yesu lɔɔsɔ Petelo la Yakobo la Yoane; Inde lɔkɛ lau olikolo lia löngo lofi ko iyo angɛnɛ kongo.

³Limɔ Inde lokindolomo bɔfɔnɔ wasi oso wa baiso bau; bisinda yande longalikima finɛ, ango botanesi w’esinda angokɔkɔlɔ otanesa ongoma.

⁴Lamao Eliya la Mɔsɛ lɔɛnɛlɛ ani batoongana la Yesu.

⁵Petelo loonga la Yesu mbo— Boekesi, bolau end’iso oyala eyamaya, tosweke kumbo bisatɔ, ɛmɔi yaɛ, ɛmɔi ya Mɔsɛ, la ɛmɔi ya Eliya,

⁶eoka atialüwäkä oonga la wɛlï eoka bawängäkä finɛ.

⁷Limɔ lifita loya oyaisa iyo, lamao limiki lookana nda lifita mbo— Oyo ende Wana wami wa losamɔ, okaka Inde.

⁸Futuku, aɛlɛlɛk’iyo, batiɛnɛ̈kɛ̈ imɔ oto sakolo ko Yesu amamwito lau.

⁹Asekwaka’iyo nda löngo, Yesu loimak’iyo mbo batakambesa oto ango ɔmɔi njasɔ ebiɛnɛk’iyo sakolo ko ani Wana wa oto asotɛmwa nda liwa.

¹⁰Iyo lolitesa lioi liande kongo ko iyo lofelana litina lia litɛmwi nda liwa.

¹¹Iyo lofela Inde mbo— ¿Eok’iye, batikasa batoonga mbo loengani nde mbo Eliya atayaka oso?

¹²Yesu lomutoel’iyo mbo— Eliya nd’atoya oso ndoyakɔkɔmɛsɛ bitotina la kwa asotomo loao nda kasa ya Mungu mbo Wana wa oto ökaka bowaü la etefolomoko la sɔni.

¹³Nde itoonga lanu mbo Eliya asoya ndoya la bato basokeel’inde kwa asolɛmbɛ iyo, kwa asotomo loao nda kasa.

¹⁴Iyaka iyo ende baeki basi, iyo lɔɛnɛ windi ofi wa bato basolingel’iyo la batikasa batofenyana lau baoi.

¹⁵Lisasaya, ɛnɛkɛ bato wɛnɛ Inde iyo lomwaala, iyo loya mangu end’Inde oyalamola Yesu.

¹⁶Inde lofel’iyo mbo— ¿Ende iye eyetofelana ino lau?

¹⁷Oto ɔmɔi wa windi lomutola lande mbo— Boekesi, iyiki end’Aɛ la wana wami, ale la olimo wa euma,

¹⁸la olo ekayaleke wana, bolimo eund’inde, wao kokwes’inde, atokusola fulofulo nda bɔnɔkɔ, atosiya ngɛlɛtɛ, atowangema. Yongiki la baeki baɛ mbo bakusoleke wao, nde batikɔkɔlɛ.

¹⁹Yesu lomutola lau mbo— E-fɛtɔ-ye eti la liimeli; ¿Itoumwaka lanu ko mbile yanga? ¿Itokɔkɔmɛlɛ ino konda eni mbile? Eshaka inde ende’mi.

²⁰Limɔ iyo loesha wana end’Inde; la ɛnɛkɛ bolimo wɛnɛ Yesu, lisasaya wao lowanja wana, inde lokwa nda nyɛlɛ, inde losiasia omao ani atokusola fulofulo nda bɔnɔkɔ.

²¹Limɔ Yesu lofela sango wande mbo— ¿Ko eni mbile esoyala inde la loo-lo? Sango mbo— Konda mbile ya wainɛngɛ;

²²la mbile wike wao waumbolak’inde la nda bösä la nda balia eoka ndosɛɛsɛlɛs’inde. Nde ango otokɔkɔlɔ okela loasɔ, okelak’iso ngandi, sungak’iso.

²³Yesu loonga lande mbo— Ango yekɔkɔlɔ! Oyatoimela atokɔkɔlɔ bitotina.

²⁴Lisasaya sango w’isenge loamama mbo— Isoimela nde, sungaka boeno wami wa liimeli.

²⁵Ɛnɛkɛ Yesu mbo windi w’ato batosɔngɔmɛlɛ iyo, Inde loimaka bolimo obe, Inde mbo— Aɛ bolimo w’euma la wa bökö, Imi nd’atoonga laɛ mbo— Kuswaka end’inde la ɔɔtɛlɛ̈k’inde imɔ liasi.

²⁶Wao loamama, wao lokwes’inde se, wao lokuswa. Isenge loyala kwa mbo asowa, eokao wike loonga mbo asowa.

²⁷Kongo ko Yesu loundel’inde bosamba, Inde loemes’inde, inde loemala fii.

²⁸Aɔtɔkɔ Yesu nda ndakɔ, baeki bande lofel’Inde ko wisakumbo mbo— ¿Iso angokɔkɔlɔ okusola wao monito?

²⁹Inde loonga lau mbo— E-kanda-ye angokɔkɔlɔ okuswa sakolo ko la lisomboli.

³⁰Asokwaka iyo omao, iyo loeta ko la yese ya Ngalilai, nde atialɛmbɛkɛ mbo bato baluweke ongoma

³¹eoka atokambesa baeki bande mbo— Wana wa oto atowambomo nda besamba ya bato la batool’Inde, nde atoolomo Inde, limɔ mbisa ya becho isatɔ, atotɛmwa liasi.

³²Kongo ko batialüwäkä la wɛlï lioi-li la iyo lowanga ndofel’Inde litina.

³³Iyo loiyela Kafenauma, la ayalaka Inde nda ndakɔ, Yesu lofel’iyo mbo— ¿Nda mboka, ino ofenyaniki nde baoi nda loni loasɔ?

³⁴Nde iyo loyala hai, eoka nda mboka iyo lofenyana baoi mbo ndai asolongela.

³⁵Yesu loyala se; Inde lota baeki liu la ambale lioi, Inde loonga lau mbo— Boto ɛlɛmbɛ oyala botoli oso, ayaleke mbisa y’atoti la akuweleke batoti.

³⁶Limɔ Inde lounda wana ɔkɛkɛ, Inde loemesa wana sisi yau; Inde lokusamel’inde nda besamba,

³⁷limɔ Inde loonga lau mbo— Oyatonyangela wana ɔmɔi kwa wana-yo ko l’eoka ya lina liami, atonyangela’mi la oyatonyangela’mi, atinyangele ko ’mi kongo, nde atonyangela nde Inde oyatomaka’mi.

³⁸Yoane loonga mbo— Boekesi, twɛniki oto ɔmɔi oyatokusola belimo ebe nda lina liaɛ, la twaimak’inde, eoka aitotut’iso.

³⁹Yesu mbo— Oimëk’inde, eoka boto oyatokela ikesa nda lina liami, oyo angokɔkɔlɔ ndotɔ̈ngɔ’mi la mangu.

⁴⁰Eoka boto oyaitoiyel’iso, oyo ale wasu.

⁴¹Boto efaef’ino kɔpɔ ya balia bomwa eoka mbo wende ba Masiya, Imi mbo— wewe, boto-ao angoomelo bosombo wande.

⁴²Oyatokwesa wainɛngɛ ɔmɔi oyatoimela’mi, losoeta lande olau mbo litalɛ lifi likandomoko nda kingo yande la aumbolomoko nda balia ba eliya.

⁴³Bosamba waɛ bokwes’aɛ nda obe, tenaka wao; ndɔɔtɔ nda loiko ko eleme la bosamba ɔmɔi kongo, losoeta okɛsɔmɔ nda Ngehena la besamba imbale nda bösä ebotikɔkɔlɛ otiamesomo.

⁴⁴

⁴⁵Bokolo waɛ bokwes’aɛ nda obe, tenaka wao, ndɔɔtɔ nda loiko la ekoti kongo, losoeta okɛsɔmɔ nda Ngehena la bakolo ambale.

⁴⁶

⁴⁷Eyambo liso liaɛ likwes’aɛ nda obe, ɔ̈mɔlɔkɔ liao, ndɔɔtɔ nda Bɔkɔta wa Mungu ko ɛtwɛlɛ kongo, losoeta okɛsɔmɔ nda Ngehena la baiso bambale

⁴⁸olo lokuso loau loitowa la bösä boitotiamesomo.

⁴⁹Bato batoti batotomo bösä kwa bokwa wa litanesi.

⁵⁰Bokwa wende olau; kongo ko eyambo bokwa botemba shokana, limɔ otota wao shokana liasi ko l’iye? Yalaka to la bokwa atiteni yanu limɔ yalanaka la lilatemi.