Read lokele Luka 14 Bible Online

Luka 14 - lokele bible

Luka 14

¹Nda lise limɔi lia Yenga, ayaläkä Yesu nda ndakɔ ya Bokumi ɔmɔi oyäkä BoFalusi, iyo lolamb’Inde la shɔngɔlɔ;

²boto ɔmɔi oyaäkä la lokambo loa eila lɔɛnɛlɛ oso wande.

³Kwaamao Yesu lofela Bekumi la BaFalusi mbo— ¿Engani nde la Bikela ndosäsesa boto la lise lia Yenga kwa angoengana?

⁴Kongo ko iyo loyala tau. Limɔ Yesu lounda boto, Inde losäses’inde, Inde lomach’inde akɛkɛ.

⁵Limɔ Inde loonga lau mbo— ¿Ndai wanu, eya mbo funda yande angoko mbolo yande ekwa nda liulu nda lise lia Yenga, oitosaola yao lisasaya?

⁶Batiakɔkɔlɔ̈kɔ̈ ndomutoel’Inde nda loasɔ-lo.

⁷Limɔ Yesu lotela bato ebatomökö lioi nda elambɔ bombila ani ɛnɛ̈k’Inde mbo iyo lokalukake kangala ebieti olau, Inde mbo—

⁸Botomo lioi nda elambɔ ya lisɔngɔni, oyalëke se nda kangala eyeteli, eoka eluwa boto wa lokuku eloeteli eloaɛ, atatomo imɔ,

⁹limɔ ngɛnɛ wa elambɔ oyati l’aɛ lande lioi, ataoyaonga laɛ mbo— Faefaka boto-yo kangala-ye; limɔ aɛ angɛnɛ otoemala la sɔni okayala se nda kangala eyetikali liili.

¹⁰Nde botomo lioi nda elambɔ, kɛndɛkɛ okayala nda kangala ya liili mbo akayek’inde oyati aɛ lioi, inde koonga laɛ mbo— Wina, yauku l’ono nda kangala eyeti. Ongoma ototɛmyɔmɔ nda baiso ba batotina ebatoyalana laɛ nda elambɔ.

¹¹Eoka boto oyatotaliak’inde angɛnɛ, ɛɔndwɛsɔmɔkɔ se hɔndwa, la oyatoɔndwa se inde angɛnɛ, etaliomoko tala.

¹²Lamao Inde loonga la boto oyatäk’Inde lioi nda elambɔ mbo— Bokela elambɔ, kwa la löwa, kwa la ocho, otëke baina laɛ, kwa bitungani yaɛ, kwa beoto yaɛ, kwa bafoka ebayalani laɛ, eoka mbo batata imɔ ko aɛ lioi eyau, l’ano batosakanesa loasɔ.

¹³Kongo ko, bokela elambɔ, taka eba touwe, la ebitukulu, la eba bikoti, la eba betuku,

¹⁴limɔ otoyalaka la limɛngɔ fuu eoka bati ango la yeka yoinel’aɛ; nde otoinolomo yao nda bakuswelo nda liwa ba eba liengani.

¹⁵Okäkä boto ɔmɔi w’ebayalanäkä lande nda bieka ebaoi-ba, inde mbo— Boto oyatola bieka nda Bɔkɔta wa Mungu eyalaka nde la limɛngɔ fuu.

¹⁶Yesu loonga lande mbo— Boto ɔmɔi akeläka elambɔ efi la atäkä bato wike lioi;

¹⁷enganäkä mbile yola inde lotoma bɔkɔwa wande okaongake l’ebatomökö lioi, mbo— Yauku, eoka bitotina bisoela.

¹⁸Nde iyo yaatotina lisanga loakola ndolukä litina liofeka ndoya. Oyo wa oso mbo— Isombiki nde elanga, isɔkɛ okaticha yao, isosombol’aɛ mbo imɛsɛlɔmɔkɔ.

¹⁹Wasi mbo— Isombiki mbolo bɔɔmwi ya likuwa, isɔkɛ okakotesa yao, isosombol’aɛ mbo imɛsɛlɔmɔkɔ.

²⁰Wasi mbo— Isosɔngɔ wali, eokao itikɔkɔlɛ ndoya.

²¹Ongoma bɔkɔwa loinwa, inde lokambesa ngɛnɛ wande njasɔ-bi. Limɔ ngɛnɛ wa ndakɔ loonga la bɔkɔwa wande mbo— Kɛndɛkɛ mangu nda mboka la toloto, eshaka l’ono eba touwe, la e’bitukulu, la eba bikoti, la eba bituku.

²²Limɔ bɔkɔwa loonga mbo— Ngɛnɛ, losokelomo kwa akambesi aɛ’mi, nde elela ekosandelu se.

²³Ngɛnɛ loonga la bɔkɔwa mbo— Kɛndɛkɛ nda balabala la biëli okatinjak’iyo mbo baɔtɛkɛ, litina mbo ndakɔ yami etumeke

²⁴eoka isoonga lanu mbo, Angwɛnɛ angɔɔmɔi w’ebatomökö lioi nde kooka elala ya elambɔ yami.

²⁵Bikuke ya bato wike bakɛsɛnɛkɛ lande; Inde lokikwa end’iyo la Inde loonga lau mbo—

²⁶Boto eya ende’mi, nde angoiyela sango wande la nyango, la wali, la bana, la bitungani, la baelo, imɔ ko la liwawi liande angɛnɛ, ambo atikɔkɔlɛ oyala boeki wami.

²⁷Boto oyaitotolaka lieka liande angɛnɛ oyatuta’mi, ambo atikɔkɔlɛ oyala boeki wami.

²⁸Tɛnɛ, ɔmɔi wanu esanga ndoswaka ndakɔ ya botalemu efi; ¿aitotayalaka se ndotangaka loketi loa bieto mbo atayala la yao yoengana ndosilesa liswi lia ndakɔ?

²⁹Aenaka ongoma, ani atoakol’inde ndoswa batalɛ nda nyɛlɛ, lamao angokɔkɔlɔ ndɔɔlɔlɛsɛ ndakɔ, limɔ akɛnɛkɛ bato ongoma, iyo komuchamucha la twɛlɔ, iyo koonga mbo—

³⁰Boto-yo aakoläkä ndoswa ndakɔ efi nde atikɔkɔlɛ ndosilesa yao.

³¹Loasi imɔ; bokota oyatɔkɛ okanana bita la bokota wasi; ¿Aitotayala se ndoenyakela kwa mbo atokɔkɔlɔ ko la bato bilɛfu liu okanana la bokota wasi oyatoyatowana lande la bato bilɛfu kama imbale?

³²Nde eyambo atienyele ongoma, limɔ, akoyali oyɔmɔi esika, atotoma ikomya sha wange okafela likomyi liotinya lokele.

³³Ko ongoma, boto wanu oyaitosɛnyana la eyande bitoti, aitokɔkɔlɔ ndoyala boeki wami.

³⁴Bokwa bole to olau; ¿Nde eya to mbo bokwa botemba shokana, botokana shokana liasi l’iye?

³⁵Botiengan’imɔ yeka, kwa ndota nda nyɛlɛ, kwa nda liɔlɔ; bato batokusha wao tungi. Oyale la batoi booka, aokeke!