Read lokele Luka 16 Bible Online

Luka 16 - lokele bible

Luka 16

¹Yesu loonga imɔ la baeki bande mbo— Boto wa lifoka ayaläkä la Bonyafala wotinganaka la ndakɔ la bilanga yande la bato lowanjela Bonyafala ende ngɛnɛ wande mbo asomelesa yeka yande.

²Ngɛnɛ lot’inde lioi, inde loonga lande mbo— ¿Loni-lo elosoka’mi loasɔ loaɛ? Faka lokasa loa likuwa liaɛ eoka otikɔkɔlɛ imɔ ndoyala Bonyafala.

³Limɔ Bonyafala loenyela, inde mbo— ¿Itokel’iye, eoka mbo ngɛnɛ wami atosokoela’mi isosha sha bonyafala? Iti la botatulu wosha nyɛlɛ; yende la sɔni ndömba bieka.

⁴Iluwi nde elotokela’mi mbo akafangolomoko’mi nda bonyafala, limɔ batonyangela’mi nda ndakɔ yau angɛnɛ.

⁵Inde lota batotina ebaäkä la ngɛnɛ wande belima, ɔmɔi la ɔmɔi; inde loonga l’ewa oso mbo— ¿Wende la ngɛnɛ wami bolima wa loni loketi?

⁶Inde mbo— Biangola ya baita kama liu. Bonyafala loonga lande mbo— Ɔsɔkɔ lokasa loa bolima, yalaka se mangu la sɔnɔkɔ mbo kama bɔɔmwi.

⁷Limɔ inde loonga la wasi mbo— ¿Aɛ imɔ, ole la bolima wa loni loketi? Inde mbo— Batanga ba bofonga kama liu. Inde loonga lande mbo— Ɔsɔkɔ lokasa loa bolima, sɔnɔkɔ mbo kama bonanɛi.

⁸Ngɛnɛ loinela Bonyafala wande oyatienganaka eoka akeliki nde la eläläka; eoka nda fɛtɔ yau, bana ba wenda-bo balongeli nde bana ba löwa la eläläka.

⁹Imi nd’atoonga lanu mbo— Sɛlɛkɛ ebanu baina ko la bieto ya eba bolimbakeli, litina mbo akasileke yao, limɔ batonyangel’ino nda kumbo ya loiko.

¹⁰Boto wolendelomo la loasɔ lɔkɛkɛ, nda loasɔ lofi ale imɔ wolendelomo; boto oyati la liengani nda loasɔ lɔkɛkɛ, nda loasɔ lofi imɔ ati la liengani.

¹¹¿Ango ino oti bolendelomo nda loasɔ loa bieto y’ebatiengane, ndai to atolendelo ino nda njasɔ ya wewe?

¹²¿Ango botiyaleke bato bolendelomo la eya boto wasi, ndai to atof’ino eyanu angɛnɛ?

¹³Angwɛnɛ bosali wokɔkɔlɔ oyala bɔkɔwa wa bangɛnɛ bambale, eoka ataiyela ɔmɔi, nde kosamaka oy’ɔmɔi, angoko mbo atawatemaka la ɔmɔi, nde koolya oy’ɔmɔi. Botikɔkɔlɛ ndoyala bɔkɔwa wa Mungu la bieto lisanga.

¹⁴BaFalusi baäkä ebasami bieto finɛ, iyo looka baoi-ba batotina, iyo lomuchamuchela Yesu.

¹⁵Inde loonga lau mbo— Ino wende ebatangi nde mbo wengani nda baiso ba bato, nde Mungu nd’aluwi betema yanu, eoka ebitoinelomo finɛ la bato, yao Mungu kɔɛnɛ efu.

¹⁶Bikela ya Mungu la Batɔndɔli yaäkä konda mbile ya Yoane, limɔ mbisa yande ko kwani, mboli ya Bɔkɔta wa Mungu bisotomo boekï la boto la boto atɔɔtɔ nda wao ko la botatulu.

¹⁷Kongo ko ndofanjaka lioi limwitoto lia Bikela ya Mungu lole lowau lolongela elosokola Use la se.

¹⁸Eokao boto oyasosokola wali wande, kosɔngɔ wasi, ambo asotwa nyongo, la boto oyatosɔngɔ wali oyasokolomu ende bolome, ambo inde imɔ asotwa ko nyongo.

¹⁹Aäkä nde boto ɔmɔi wa lifoka lifi oyawatäkä bisinda ya bofɛkɔ la loketi lofi. Inde lolengela lise la lise ko ndolaka bieka ya bonuku.

²⁰La oto wasi wa shomba, lina liande liko Lasalo, loingakala tina la bome wa ewa lifoka, la bindo yande lotuma la bakülü.

²¹Inde looka yɛmɛ finɛ yolaka bakɔmbɔ ebakwäkä ose ya mɛsa y’ewa lifoka, la ngwa loya oyalɛtɛkɛ bakülü bande.

²²Mbisa yamao, ewa shomba lowa, la bakitomo lotol’inde konda bokuku wa Abalayama; la ewa lifoka lowa imɔ kowa, inde loömbomo nda losai.

²³Ayaläk’inde nda ewelo la okäk’inde bemusi finɛ, inde loila baiso likolo inde loɛnɛ Abalayama ko esika la Lasalo ani aingaläkä nda bokuku wandë.

²⁴Inde loamama mbo— Fafa Abalayamao, okelaka’mi ngandi, tomaka Lasalo mbo alufieke bɔmbɔ wa isangakala shande nda balia ndɔɔngɛsɛ lolamɛ loami, eoka isooka lobaba nda wambe-bo.

²⁵Nde Abalayama loonga mbo— Wana, enyelaka mbo ayaläk’aɛ nda wenda waɔlɔkɔ eyaɛ bieka bilau, la Lasalo imɔ ko eyande bieka bibe nde kwani inde asɔɔnjɔnjɔmɔ l’ono, nde aɛ wende la lobaba.

²⁶Loaso loasi imɔ, lofundukwela lofi losokɔkɔmɛsɔmɔ atiteni yasu lanu mbo ebale la yɛmɛ yoakala end’ino angokɔkɔlɔ la angwɛnɛ oto wanu wotenana ono end’iso.

²⁷Limɔ inde mbo— Eokao, itosombol’aɛ, Fafa, mbo otomek’inde omolo nda ndakɔ ya sango wami, eoka

²⁸yende la bitungani bɔɔmwi, mbo aluwesek’iyo wewe mbo bataya imɔ koya nd’elela-ye ya bomusi.

²⁹Nde Abalayama loonga mbo— Bende la kasa ya Mɔsɛ la eya Batɔndɔli, bokek’iyo.

³⁰Kongo ko inde mbo— Mbayo, Fafa Abalayama, nde eyambo ɔmɔi ekuswa nda liwa okakɛ end’iyo, limɔ bekalangana.

³¹Nde Abalayama loonga mbo— Eya ngo mbo batioke Mɔsɛ la Batɔndɔli, ambo ɔmɔi ekuswa nda liwa, iyo batiangoimela.