Read lokele Luka 4 Bible Online

Luka 4 - lokele bible

Luka 4

¹YESU atumesomöko la Bolimo Botanu, limɔ Inde losekwa nda Yaladene la akɛsɔmɔ̈kɔ̈ la Bolimo nda liɔmbɛlɛ

²ko becho kama inɛi ani atososhelomo la Satana. Inde atialäka bieka ko la becho ena, nde asiläkä yao, limɔ Inde looka isiyɛ.

³Limɔ Satana loonga la Yesu mbo— Eya to mbo wende Wana wa Mungu, ongaka to mbo e-litalɛ-li likinjweke boila.

⁴Yesu lomutola lande mbo— Losotomo nda lokasa loa Mungu mbo— Boto aitoyalaka la liwawi ko l’eoka ya beila kongo.

⁵Limɔ inde losulia Yesu likolo, inde lɔɛnɛs’Inde yakakaelo bitoti ya wenda ko la mbile yobebya baiso,

⁶la Satana loonga lande mbo— Itof’Aɛ isosha la tala ya bitotina-bi eoka bifomu nde’mi la itofaefa oyakasangeke’mi;

⁷eokao botulamela’mi se, yao bitotina koyala eyaɛ.

⁸Yesu lomutola lande mbo— Loatomökö nda lokasa loa Mungu mbo— Tulamelaka ngo ko Ngɛnɛ Mungu waɛ se, Semolaka ko Inde kongo.

⁹Limɔ inde lɔkɛsɛ Yesu konda Yelusaleme, inde loemes’Inde olikolo lia losambɔ loa Ndakɔ ya Mungu, inde loonga la Yesu mbo— Eya mbo wende Wana wa Mungu, kushaka bindo yaɛ se,

¹⁰eoka losotomo nda lokasa loa Mungu mbo— Atoonga la bakitomo bande mbo batinganeke laɛ

¹¹La batotolak’Aɛ nda besamba yau mbo Otaomana litindi liaɛ nda litalɛ.

¹²Yesu lomutola lande mbo— Loaongomökö mbo Ososhelëke Ngɛnɛ Mungu waɛ.

¹³Asiläkä Satana basoshela batotina, limɔ inde losokwa ende Yesu konda fofe yasi.

¹⁴Limɔ Yesu loinywa ko la bofoka wa Bolimo konda Ngalilai, la lokuku loande lofafana nda yese etotina etimbi;

¹⁵Inde lokaekese bato nda bisɔngɔmɛlɔ yau, Inde loinakelomo la bato batotina.

¹⁶Inde loya nda bokenge wa Nasaleta olo akondeläk’Inde wainɛngɛ; la lise lia Yenga Inde lɔɔtɔ nda ndakɔ ya ɛsɔngɔmɛlɔ kwa akelakäk’Inde yenga la yenga, Inde loemala omao ndotanga Lokasa loa Mungu.

¹⁷Afomökö lokasa eloatäkä Yesaya ewa Bɔtɔndɔli; Inde loliola loao, Inde loisola elela eyatomokö mbo—

¹⁸Bolimo wa Ngɛnɛ bosɔɔtɛlɛ’mi, Eoka asücha’mi mbo ikambeseke eba touwe mboli ilau, Asotoma’mi mbo iteke boekï mbo ebaindomökö nda bita basotomo se la mbo Eba etuku bɛnɛkɛ liasi; Lofaikolomu imɔ ende ebakongolomökö,

¹⁹La mbo iteke boekï wa mwaka wa liendoli lia Ngɛnɛ Mungu.

²⁰Inde lolinja lokasa, Inde loinola loao ende botingani wa ɛsɔngɔmɛlɔ, Inde loyala se, la baiso ba batotina ebayaläkä nda ɛsɔngɔmɛlo batinganäkä ngo ko lande.

²¹Limɔ Inde loakola ndoonga lau, mbo— Louse-lo ino osooka ebaoi-ba basokɔchɔmɔ kɔkɛ.

²²Iyo batotina loaolel’Inde, iyo lomwaala inango shande sha booto; iyo mbo— Ati to wana wa Yosefa?

²³Inde loonga lau mbo— Eingoko; otosingwela’mi lilingo-li, liko mbo— Kanga, tuwesaka lokomba loaɛ angɛnɛ; la imɔ mbo— Bitotina ebiokik’iso mbo bikelomuku nda Kafenauma, aɛ kelaka imɔ ko yao ono nda yese yaɛ angɛnɛ.

²⁴Inde mbo— Wewe eyetoonga’mi lanu mbo angwɛnɛ bɔtɔndɔli koimelomo la lilitesi nda yese yande angɛnɛ;

²⁵Itokambes’ino la wewe mbo batika ba batolome baäkä wike nda Isalaele nda bacho ba Eliya, nda mbile eyaliamäkä buse angwɛnɛ mbula ko miaka isatɔ la otüku l’ani löndo lofi loaäkä nda yese etotina.

²⁶Kongo ko Eliya atiatomomökö ende oto wa Isalaele, kangä ende lotika loa olome loa okenge wa Salefata nda yese ya Sidona.

²⁷Bato ba baɛndi baäkä wike nda Isalaele nda bacho ba Elisha ewa bɔtɔndɔli, nde angwɛnɛ wau angɔmɔi kotanesomo, sakolo ko Naamana boto wa Sulia.

²⁸Okäkä batotina ebayaläkä nda ɛsɔngɔmɛlɔ baoi-ba, iyo losoma sasa,

²⁹iyo loemakala, iyo lokusol’Inde nda okenge, iyo loiliyak’Inde nda isɔkɔ sha löngo, olo aswomökö okenge wau, mbo bakushek’Inde nda ngolongolo,

³⁰kongo ko Inde loeta sisi yau fwaa, Inde lotangwa.

³¹Inde lɔkɛ konda Kafenauma, okenge wa Ngalilai, la aekesäk’Inde oekes’iyo la lise lia Yenga,

³²iyo lomwaala liekesi liande finɛ eoka baoi bande baäkä la isosha.

³³Omao nda ɛsɔngɔmɛlɔ aäkä nde oto wa bolimo wa Satana, inde loamama la limiki lifi mbo—

³⁴Ao, iso laɛ moni, Aɛ Yesu wa Nasaleta, oyi nde oyasɛɛsɛlɛsɛ iso? Isoluw’Aɛ, wende oyo Botanu wa Mungu.

³⁵Nde Yesu loima inde mbo— Yalaka tau, kuswaka ende inde. Bolimo lokush’inde se atiteni yau, wao lokuswa ende inde nde atiokes’inde imɔ wale.

³⁶Bato batotina lomwaala la liena, iyo lofelana mbo— ¿Boni bɔfɔnɔ wa lioi-li? Eoka ko la isosha la bofoka atoima belimo ebe la yao kokuswa ende bato.

³⁷La lokuku loande lomelana nda bilela bitotina bitimbi.

³⁸Asekwäk’Inde nda ndakɔ ya ɛsɔngɔmɛlɔ, Inde lɔɔtɔ ndakɔ ya Simona. La boïli wa Simona aäkä la etao ya likama, iyo lofela Yesu loaso loande.

³⁹Inde loemala tina lande. limɔ Inde loimaka etao, la yao lomach’inde; Lisasaya otomali loemala, inde losung’iyo nda ndakɔ.

⁴⁰Ilakä buse litele, batotina ebayaläkä la beoto ya ngwo ya bɔfɔnɔ la bɔfɔnɔ, iyo loeshel’Inde bato-ao, Inde lotaliaka iyo bangasa bande, Inde losäsola batotina.

⁴¹Imɔ ko la belimo ya Satana bakuswäkä ende bato wike ani batoamama mbo— Aɛ wende Wana wa Mungu. La Yesu loima iyo, eoka atiamachäk’iyo ndoonga eoka baluwi mbo Inde ende Masiya.

⁴²Ayäkä bonyanya, Yesu lokuswa nda ndakɔ, Inde lɔkɛ nda liɔmbɛlɛ; limɔ bikuke ya bato lolukak’Inde, iyo loosh’Inde limɔ bakotäkä okufes’Inde mbo atasokwëke end’iyo,

⁴³nde Inde loonga lau mbo— Lole loami mbo ikeokanangokole mboli ilau ya Bokota wa Mungu imɔ ko nda bekenge yasi, yatomomökö nde ko l’eoka-ao.

⁴⁴Limɔ Inde anangoläkä nda ndakɔ ya ɛsɔngɔmɛlɔ nda bekenge ya Ngalilai.