Read lokele Yoane 16 Bible Online

Yoane 16 - lokele bible

Yoane 16

¹Isoonga lanu ongoma mbo botaoka botema wale wa toloi,

²eoka batosokol’ino nda bisɔngɔmɛlɔ la mbile eyaka nde ani oyatool’ino, inde kotanga nde mbo asokuwela Mungu.

³Bekelaka nde ongoma eoka batiluwe ango ko Sango ango Imi.

⁴Nde isotakambes’ino njasɔ-bi mbo akayeke mbile ya yao, ino boenyeleke mbo Imi nd’aongaka lanu ongoma.

⁵Itiaongaka nde lanu nda yao la liakoli eoka yayalaka lanu, nde kwani isoinwa end’Inde oyatomaka’mi la angwɛnɛ angɔmɔi wanu oyatofela’mi mbo— ¿Ɔtɔkɛ to anima?

⁶Nde ko l’eoka mbo isokambes’ino njasɔ-bi, ikɛnɛnɛ sisotumesa betema yanu.

⁷Kongo ko isoonga lanu wewe mbo bolau end’ino mbo isokweke eoka eyambo itisokwe, ani Boongeli[3] atiayeke end’ino; nde yɛkɛndɛkɛ limɔ yetomaka nde Inde end’ino.

⁸Akayek’Inde, atotombola eba wenda loasɔ loa batwanelo la liengani la loasɔ loa likomyi imɔ;

⁹loasɔ loa batwanelo mbo batialendeloko’mi;

¹⁰loasɔ loa liengani mbo isɔkɛ ende Sango la oitɔɛnɛ imɔ Imi;

¹¹loasɔ loa likomyi mbo bokakalesi wa wenda-bo asofomo se.

¹²Yende la njasɔ wike yoonga lanu, nde boitokɔkɔlɔ ndokaka yao kwani,

¹³nde akayeke Inde, ako Bolimo wa wewe, atotol’ino oso nda mboka ya wewe bototi; eoka aitoonga l’isosha shande angɛnɛ nde yao ebikokek’Inde, ko yao ebitoongaka’Inde la atotaluwes’ino yao ebikayeke kɔni.

¹⁴Atotalia’mi tala, eoka atɔɔsɔ eyami limɔ atoluwes’ino ko yao.

¹⁵Bitotina ebisɛli nde Sango, yende eyami, eokao yongiki mbo asɔɔsɔ eyami atoluwes’ino ko yao.

¹⁶Ko mbile sinyo, limɔ oitɔɛnɛ’mi, mbile yasi sinyo limɔ wɛnɛkɛ nde Imi liasi.

¹⁷Eokao bamɔi ba baeki bande lofelana mbo— Iye to eyetoonga Inde lasu mbo Mbile sinyo la oitɔɛnɛ’mi, limɔ mbile yasi sinyo la wɛnɛkɛ nde Imi liasi? la imɔ mbo Isɔkɛ ende Sango, ende to iye?

¹⁸Iyo loonga imɔ mbo— ¿Iye eyetoong’Inde, mbo Mbile sinyo? Totiluwe litina elisoong’Inde.

¹⁹Aluwaka to Yesu mbo balɛmbɛkɛ̈ ndofelak’Inde, limɔ Inde loonga lau mbo— ¿Osofelakana loasɔ loa lioi eliongiki’mi mbo Mbile sinyo la oitɔɛnɛ’mi, limɔ mbile sinyo la wɛnɛkɛ nde Imi liasi?

²⁰Wewe, wewe itoonga lanu mbo otoleela la ngandi la ndeli ani eba wenda batoomakala. Ino bowaka nde l’ikɛnɛnɛ sifi, kongo ko ikɛnɛnɛ shanu sikindolomoko limɛngɔ fuu.

²¹Botomali nda iyelo atookaka ikɛnɛnɛ sifi, eoka mbile yande esoengana, kongo ko asoot’inde wana, atienyel’imɔ iyelo eoka ya linɛngina mbo boto asoya okenge.

²²Lanu imɔ eoka kwani wende l’ikɛnɛnɛ sifi, nde yɛnɛkɛ ino liasi, limɔ betema yanu beomakaleke la angwɛnɛ boto angɔmɔi wosokoel’ino limɛngɔ lianu.

²³Limɔ nda lise lina otiafeleke nde Imi loasɔ ango lɔmwito nde wewe wewe itoonga lanu mbo boömba Sango yeka, Inde kofaef’ino nda lina liami.

²⁴Konda kwani okömbi yeka nda lina liami, ömbaka, limɔ ino kɔɔlɔ mbo limɛngɔ lianu liɔlwɛkɛ hɔlɔɔ.

²⁵Isokambes’ino njasɔ-bi ko la bembila nda mboka nde mbile etoya eyetokambesa’mi ino njasɔ ya Sango ko fololo, angoonga imɔ lanu la bembila.

²⁶Nda lise lina boombaka nda lina liami nde itionge lanu mbo yesombokolaka Sango loasɔ loanu,

²⁷eoka Sango, Inde angɛnɛ asami nd’ino eoka ino nd’asamaka’mi la ino nd’asoimela mbo Imi yasokwaka ko ende Sango.

²⁸Yasokwaka ende Sango la yayaka nda wenda-bo; itosokwa nda wenda la itɔkɛ ende Sango liasi.

²⁹Baeki bande loonga mbo— Tɛnɛngɔ, kwani otoonga nde fololo, oitoonga imɔ nda bembila.

³⁰Kwani tosoluwa mbo oluwi nde bitotina, boto ati ango la boeno wofelak’Aɛ felo, ko ongoma tosoimela mbo wasokwaka ende Mungu.

³¹Yesu lomutola lau mbo— Wimela nde kwani,

³²tɛnɛ, mbile eyaka nde, esoya oko kwani eyekamelesomoko lanu boto la boto eyande la bomachaka Imi ko ikɛndi nde Imi iti ikɛndi, eoka Sango ale nde lami.

³³Isokambes’ino njasɔ-bi mbo ino bɔɔlɛkɛ lilatemi ko lami, nde nda wenda-bo bɔɔlɛkɛ to bemusi, nde sambokolaka betema yanu eoka Imi nd’asolonga wenda.