Read lokele Yoane 18 Bible Online

Yoane 18 - lokele bible

Yoane 18

¹O Asilaka Yesu e-lisomboli-li, Inde lokuswa amamwito la baeki bande okaleka botima boko Kedelona olo ayalaka elanga, la Inde la baeki bande lɔɔtɔ omao.

²Yudasi imɔ oyasokawamb’Inde aluwaka elela-ao eoka Yesu lotowakanaka la baeki bande omao.

³Ongoma Yudasi lokɔsɔ botuka wa basilikani la polisi ya kanga ebieti la BaFalusi, iyo loya omao la tomwɛli la täla la biɛla.

⁴Yesu aluwaka bitotina ebisamboya end’inde limɔ Inde lokuswa nda elanga okaonga lau mbo— ¿Otoluka to ndai?

⁵Iyo lomutola mbo— Yesu wa Nasaleta. Inde loonga lau mbo— Imi-yo. Yudasi oyawamb’Inde loemala amamwito lau;

⁶aongaka to Yesu mbo— Imi-yo, iyo loinwa mbisa, iyo loomana la se.

⁷Eokao Yesu lofel’iyo liasi mbo— ¿Otoluka to ndai? Iyo loonga mbo— Yesu wa Nasaleta.

⁸Yesu lomutola mbo— Isokambes’ino mbo Imi-yo. Eya mbo boluka nde Imi, machaka e-bato-ba bakɛkɛ eyau.

⁹Mbo lioi lia Lokasa loa Mungu likɔchɔmɔkɔ liko mbo— Itilefese ango ɔmwito w’ebafak’Aɛ efaefa Imi.

¹⁰Petelo to oyasɛli ambɔtɛ lɔɔmɔlɔ wao, inde loswa bɔkɔwa wa kanga eyeti, inde lotinyel’inde litoi lia fangi y’olome; lina lia bɔkɔwa liko Maluku.

¹¹Yesu loonga to la Petelo mbo— Ɔtɛsɛkɛ ambɔtɛ nda ekoko. ¿Imi angomwa kɔpɔ ya bomusi eyesofa Sango efaefa’mi.

¹²Limɔ botuka wa basilikani la Komanda wau la polisi ya BaYuda lounda Yesu, iyo lokand’Inde.

¹³Iyo loesh’Inde oso ende Ana eoka inde ako Ana aaka boili wa Kayafa ako Kanga eyeti nda mwaka-ao.

¹⁴Aaka nde Kayafa oyaongaka la BaYuda nda ikumbɛ mbo loengani nde mbo boto ɔmɔi aweleke bato batotina.

¹⁵Simona Petelo la boeki wasi lotutaka Yesu; boeki ona loluwana la Kanga eyeti to, ongoma inde lɔɔtɔ amamwito la Yesu ko nda lɔ̈mbɔ loa Kanga eyeti,

¹⁶nde Petelo loemala lousa tina la bome. Limɔ boeki ona oyaluwanaka la Kanga eyeti lokuswa, inde loonga la boseka oyalambaka bome, limɔ inde lɔɔtɛse Petelo.

¹⁷Kongo boseka oyalambaka bome loonga la Petelo mbo— ¿L’aɛ imɔ oti boeki wa boto ona? Inde loonga mbo— Iti wande.

¹⁸Nde bɛkɔwa la polisi ebemalaka omao, iyo loanesa bosa wa baäla eoka bocho waaka la bondiya, limɔ iyo lɔtɔ wao; la Petelo loemakala imɔ omao amamwito lau ndɔtɔ bosa.

¹⁹Limɔ Kanga eyeti lokɔtɔlɔ Yesu loasɔ loa baeki bande la liekesi liande.

²⁰Yesu lomutoel’inde mbo— Imi isoonga fololo ende eba wenda, isoekekesa mbile la mbile la nda ɛsɔngɔmɛlɔ la nda Ndakɔ ya Mungu olo atosɔngɔkɔmɔ BaYuda batotina, itiekekese ango lomɔi wisakumbo.

²¹¿Otofela to Imi moni? Felaka ebokaka njasɔ eyaekekesaka Imi oekes’iyo; tɛnɛ baluwi nde eyaongaka’mi.

²²Aongaka Yesu ongoma, polisi ɔmɔi oyaemali tina, inde looma Yesu lobaka, inde mbo— Otomutola la Kanga eyeti ongoma?

²³Yesu lomutola lande mbo— Eya mbo iongi nde lioi libe, kambesaka to liao. Nde eya mbo lilau, monito osooma’mi lobaka?

²⁴Lamao Ana lotoma Inde ani akandomu ende Kayafa ako Kanga eyeti.

²⁵Petelo akoemali to ndɔtɔ bosa, bato loonga to lande mbo— ¿Aɛ imɔ oti ɔmɔi wa baeki bande? Inde loanganya mbo— Iti wande.

²⁶Bɔkɔwa ɔmɔi wa Kanga eyeti, oyayali wa bofindi wa boto oyatenomoko litoi la Petelo, inde loonga la Petelo mbo— ¿Imi iisɔɛnɛ aɛ amamwito lande nda elanga?

²⁷Petelo loanganya to liasi, lisasaya kɔkɔ lota lɔkɔkɔlɔkɔ.

²⁸Iyo lɔkɛsɛ to Yesu nda ndakɔ ya Komanda ani basokwaka ende Kayafa, yaaka nda mbile ya bakangwelo ba use. BaYuda angɛnɛ batiaɔtɔkɔ nda ndakɔ ya Komanda mbo batawa bokili kangä mbo baleke Elambɔ ya Lieti.

²⁹Eokao to Pilato angɛnɛ lokuswa lousa end’iyo la inde loonga mbo— ¿Otowanjela e-boto-yo nda loni to loasɔ?

³⁰Iyo lomutoel’inde mbo— Aenaka mbo boto-yo ende boto obe, ani iso angoyamach’Inde end’aɛ.

³¹Pilato loonga to lau mbo— Ino angɛnɛ undaka to Inde la ataka loasɔ loande ko la Bikela yanu. BaYuda loonga lande mbo— Iso toti la isosha shoola boto.

³²Ongoma lioi eliaongaka Yesu loasɔ loa bɔfɔɔnɔ wa liwa elikaweke’Inde likɔchɔmɔkɔ.

³³Limɔ Pilato lɔɔtɔ liasi nda ndakɔ ya Komanda, inde lota Yesu lioi, inde loonga lande mbo— ¿Aɛ wende Bɔkɔta wa BaYuda?

³⁴Yesu lomutola mbo— ¿Oongi nde ongoma ko loasɔ loaɛ angɛnɛ, kwa mbo basi nd’aongi laɛ loasɔ loami?

³⁵Pilato mbo— ¿Imi yende to waYuda? Bende bato ba yese yaɛ angɛnɛ la Kanga ebieti basomach’Aɛ nda besamba yami. ¿End’iye eyekeli Aɛ?

³⁶Yesu lomutoel’inde mbo— Yakakaelo yami etiomane la e-wenda-bo; eya to ya wenda-bo ani basungi bami konanakela’mi la bafumbaka mbo BaYuda bataundesa’mi, nde kwanio yakakaelo eyami eti ya wenda.

³⁷Pilato loonga to lande mbo— ¿Oisoyala to Bokota, ako Aɛ? Yesu lomutola mbo— Aɛ nd’aongi mbo yende Bokota; Imi nd’aotomoko la yayaka nda wenda mbo ikambekeseke bato loasɔ loa Wewe. Batotina ebale bana ba Wewe batokaka limiki liami.

³⁸Pilato loonga lande mbo— ¿Iye ende Wewe? la aongak’inde ongoma inde lokuswa lousa liasi ende BaYuda, inde loonga lau mbo— Imi itiɛnɛ litwanelo angolimwito ende Inde.

³⁹Bole to boyaeli wanu mbo ifaikoelek’ino boto ɔmɔi la mbile ya Elambɔ ya Lieti; ¿Olɛmbi to mbo ifaikoelek’ino Bɔkɔta wa BaYuda?

⁴⁰Iyo loamama liasi la limiki lifi mbo— Mba, inga oyo, kangä Balaba! Balaba ayalaka to booni.