Read lokele Yoane 19 Bible Online

Yoane 19 - lokele bible

Yoane 19

¹Limɔ Pilato loundesa Yesu ndonyɔlɔ Inde la tososola

²la basilikani lotaka likala lia kɛ̈kɛ̈, iyo lotel’Inde liao nda botö, iyo lowates’Inde esinda etelu;

³iyo lokɛkɛ end’Inde okaonga mbo— Liseeli end’Aɛ Bɔkɔta wa BaYuda! Limɔ iyo loomak’Inde mbaka.

⁴Pilato lokuswa lousa ko liasi, inde loonga lau mbo— Tɛnɛ ngo, isoeshel’ino Inde lousa ndoluwes’ino mbo itiɛnɛ litwanelo angolimwito ende Inde.

⁵Yesu lokuswa to lousa ani awati likala lia kɛ̈kɛ̈ la esinda etelu, limɔ Pilato loonga lau mbo— Ɛnɛkɛ to boto!

⁶Nde ɛnɛkɛ̈ Kanga ebieti la polisi wɛnɛ Yesu, iyo loamama likama mbo— Bola nda lieka, bola nda lieka! Pilato mbo— Ino angɛnɛ undesak’Inde okaol’Inde nda lieka, eoka imi angɛnɛ itiɛnɛ litwanelo end’Inde.

⁷BaYuda lomutoel’inde mbo— Iso twende l’eyasu ekela, la ko la ekela ena aengani ko ndowa, eoka mbo asokelaka kwa mbo ende Wana wa Mungu.

⁸Okakä to Pilato e-lioi-li, inde lowanga la bɔwa loeta,

⁹inde loinwa liasi nda ndakɔ ya Komanda, inde loonga la Yesu mbo— ¿Osokwi to l’anima? Nde Yesu atiafek’inde limutoli.

¹⁰Ongoma Pilato loonga lande mbo— ¿Oitoonga lami? ¿Otiluwe mbo yende l’isosha shota Aɛ se la isosha shool’Aɛ nda lieka?

¹¹Yesu lomutola mbo— Otiyaleke l’isosha ende’mi sakolo ngo ko wafomo shao ko la Use; eokao oto ona oyati nde Imi nda besamba yaɛ, inde nd’ayali la loasɔ eloeta.

¹²Kwaamao Pilato lokotaka ndofaikola Yesu, nde BaYuda loamama mbo— Bofaikola Oyo, aɛ oti wina la Kaisala; oyatolukaka inde angɛnɛ oyala Bɔkɔta, inde nd’atotefokola Kaisala.

¹³Nde okaka Pilato ebaoi-ba, inde loesha Yesu lousa, limɔ Pilato loyala se nda kɛka ya likɔmɔnyi, nda elela eyatangomu Lɔ̈mbɔ-loa-batalɛ (BaYuda mbo Ngabata).

¹⁴Liaaka nde lise liotonja Elambɔ ya Lieti la saa liambɛ. Limɔ Pilato loonga la BaYuda mbo— Ɛnɛkɛ to Bɔkɔta wanu!

¹⁵Iyo loamama to mbo— Sokola, sokola, bola Inde nda lieka! Pilato loonga lau mbo— ¿Yoleke Bɔkɔta wanu nda lieka? Kanga ebieti lomutola mbo— Toti ango la Bɔkɔta sakolo ko Kaisala.

¹⁶Lamao Pilato lomach’Inde nda besamba yau mbo aolomoko nda lieka.

¹⁷Iyo loundesa to Yesu, la Inde lotola lieka liande angɛnɛ, Inde lokuswa nda okenge okakɛ nda elela eyatangomu mbo Ngolongota nda baoi ba BaYuda, litina mbo Elela ya longö loa otö.

¹⁸Omao iyo loanyames’Inde nda lieka amamwito la bato basi bambale, oyo nda fangi, oyo nda fangi eyɛmɔi la Yesu atiteni yau.

¹⁹La Pilato lota nda lionga mbo— Yesu wa Nasaleta, Bɔkɔta wa BaYuda; inde lowacha loao nda lieka.

²⁰Wike wa BaYuda lotanga baoi nda lionga eoka elela olo aolomöko Yesu nda lieka yaaka tina la bokenge, la baoi basɔngɔmɔ̈kɔ̈ nda lioi lia BaEbele, la elia BaLoma, la elia BaHela.

²¹Eokao Kanga ebieti ya BaYuda loonga la Pilato mbo— Ɔsɔnɛ̈kɛ mbo Bɔkɔta wa BaYuda, kangä mbo— Oyo asoonga mbo Imi yende Bɔkɔta wa BaYuda.

²²Pilato lomutola mbo— Isosɔnɔ ko liao elisɔni nde’mi.

²³Awachaka basilikani owacha Yesu nda lieka, iyo lɔɔsɔ bisinda yande, iyo lokaa yao bakaɔ banɛi, bosilikani likaɔ, bosilikani likaɔ, la kanjo lisanga; nde kanjo etiaaka l’ɛsɔlɛlɔ, yasɔlɔmɔkɔ ko likolo ko se, ko esinda ɛmwito.

²⁴Eokao iyo loongana mbo— Osalakëke yao, nde toteke ngongo nda yao ndoluwa oyakaɔlɛkɛ yao. Ongoma lioi lia Lokasa loa Mungu liakɔchɔmɔkɔ mbo— Basokaana bisinda yami bakaɔ, ebiwati’mi basotela yao ngongo.

²⁵Basilikani lokela ngo ko ongoma. Baemalakä nde tina la lieka lia Yesu, la nyango wande, la etungani ya nyango, la Malia wali wa Kelofa, la Malia wa Mangandala.

²⁶Ɛnɛkɛ̈ to Yesu nyango wande la boeki ona oyasamak’Inde bemesani tina, Inde loonga la nyango mbo— Iya, tɛnɛ wana waɛ-yo!

²⁷Limɔ Inde loonga la boeki ona mbo— Tɛnɛ nyango waɛ-yo! Ko la mbile ena boeki ona lɔkɛ lande nda ndakɔ yande angɛnɛ.

²⁸Mbisa yamao, aluwakä Yesu mbo bitotina bisoiyela mbo lioi lia Lokasa loa Mungu likɔchɔmɔkɔ, Inde mbo— Isoka yɛmɛ yomwa.

²⁹Tei eyetumi la bänä ba ngai lɔsɛlɔmɔ omao, iyo lofɔɛsɛ lilamba nda bänä, lota liao nda ifende, iyo lotamb’Inde liao nda bɔnɔkɔ.

³⁰Aelaka Yesu bänä ongoma, Inde loonga mbo— Lososila! Limɔ Inde lotulia botö se, Inde loinola bolimo wande.

³¹Eoka lise lina liaaka eliotonja Elambɔ, BaYuda batialɛmbɛkɛ̈ mbo belyo bitikaleke nda baeka nda lise lia Yenga (eoka yenga-ao yaaka nde Yenga efi), iyo lofela Pilato mbo bakolo bau baunakomoko la mbo belyo bisokolomoko.

³²Eokao basilikani loya, iyo louna bakolo ba ewa oso la bao ba oy’ɔmɔi, bako ebolomökö nda baeka amamwito lande.

³³Nde iyaka iyo ende Yesu, ɛnɛkɛ̈ iyo mbo asokwelo oko se, batiaunaka bakolo bande.

³⁴Nde ɔmɔi wa basilikani loswa Yesu likonga nda likuka, lisasaya bakila la balia losɛnjwa se.

³⁵Boto oyɛnɛkɛ̈ nde la baiso nd’asokambesa loasɔ-lo, la likambesi liande liende ngo ko wewe, la aluwi nde mbo asoonga nde wewe ko mbo ino wimeleke.

³⁶Bitotina-bi yakelomoko mbo lioi lia Lokasa loa Mungu likɔchɔmɔkɔ, liko mbo— Ikwa shande ango simɔi sitilaunomoko.

³⁷La lioi liasi lia Lokasa loa Mungu, liko mbo— Betichaka nde Inde oyasotwɛlɛ iyo otwɛlɛ Inde.

³⁸Mbisa yamao, Yosefa wa Alimatayo oyayali boeki wa Yesu ko wisakumbo eoka awangaka BaYuda, inde lofela Pilato isosha shosokola bolyo wa Yesu la Pilato lokulia. Eokao Yosefa loya oyasokola bolyo wande.

³⁹La Nikodemo imɔ loya oyayaka ende Yesu oso ko la ocho, inde loesha lisɔbyi lia baningo la baɛsɛ, bolito wa kilo kama inɛi.

⁴⁰Iyo lɔɔsɔ bolyo wa Yesu la iyo lokandaka wao la totambala twa bisinda amamwito la lisɔbyi lia baɛsɛ, kwa ayali boömbeli wa BaYuda.

⁴¹Elanga yaaka omao nda elela olo aolomoko Inde nda lieka, la nda elanga losai loyai olo angotaömbomo kɔni oto.

⁴²Eoka mbo lise lina liyali elia litonji lia Elambɔ ya BaYuda la mbo losai loaka tina, iyo loingesa Yesu omao.