Read lokele Yoane 5 Bible Online

Yoane 5 - lokele bible

Yoane 5

¹Mbisa yamao yaäkä Elambɔ ya BaYuda la Yesu akɛndɛ̈kɛ̈ Yelusaleme.

²Nda bokenge wa Yelusaleme to, tina la liongo lia bɛkɔkɔ, loaaka lyaa lia balia eliatangomökö nda lioi lia BaYuda mbo Betesata, la yaäka la balɛlɛ bɔɔmwi ba batalɛ omao.

³Nda balɛlɛ ana likama lia bato ba kambo loingakala se, bako eba etuku, l’eba bikoti, l’ebalɛmbɛti.

⁴

⁵Boto ɔmɔi loyala nde amao oyaäkä la lokambo miaka kama isatɔ la bonanɛi.

⁶Yesu lɔɛnɛ inde ani aingal’inde se ina, la aluwäk’Inde mbo asoumwa mbile yumwa ongoma, Inde loonga lande mbo— ¿Olɛmbi nde ndɔɔlɔ bosäsu?

⁷Boto wa lokambo lomutoel’Inde mbo— Bwana, iti la boto bota’mi nda lyaa ani liela lia balia litoya, atɔkɛ’mi omao boto wasi atokwela’mi oso.

⁸Yesu loonga lande mbo— Emalaka, ilaka tange yaɛ, tangwaka.

⁹Lisasaya inde losäsesomo, inde loila tange yande, inde lotangwaka. Lise-ao liäkä nde elia Yenga.

¹⁰Eokao BaYuda loonga la boto oyasäsesomökö mbo— Louse ende lise lia Yenga la lotiengane laɛ ndoilaka tange yaɛ.

¹¹Nde inde lomutola lau mbo— Oyasäsoliki’mi, nd’aongi lami mbo— Ilaka tange yaɛ, tangwaka.

¹²Iyo lofel’inde mbo— ¿Boto ndai oyaongi laɛ mbo— Ilaka tange yaɛ, tangwaka?

¹³Nde inde oyasäsesomökö atialuwäkä imɔ Inde, eoka Yesu loengwa bokamu wa bato omao.

¹⁴Mbisa yamao, Yesu looshana lande nda Ndakɔ ya Mungu, Inde loonga lande mbo— Tɛnɛ ngo, ososäsesomo, okelëk’imɔ bobe, mbo loasɔ lolongela loo la owau, lotawɛlɛmɛ end’aɛ.

¹⁵Boto lɔkɛ la inde lokambesa BaYuda mbo ale ko Yesu oyasäsesik’inde.

¹⁶Eokao BaYuda loakola ndokongola Yesu eoka atokelaka njasɔ-bi la lise lia Yenga.

¹⁷Nde Yesu lomutoel’iyo mbo— Sango wami akokelaka likuwa liande, la Imi imɔ ikokeli likuwa liami.

¹⁸Eoka ya baoi-ba to BaYuda lookel’Inde yɛmɛ yool’Inde, yoeta eya oso, inga eoka asotefola liti lia Yenga kongo, nde simbi to eoka atangi nde Mungu mbo Sango wande, anyo aenganesi Inde angɛnɛ la Mungu.

¹⁹Yesu lomutoel’iyo to mbo— Wewe, wewe, itoonga lanu mbo Wana angokɔkɔlɔ okela loasɔ angolɔmoi ko Inde angɛnɛ, sakolo ko yao eyɛni Inde mbo Sango nd’akeli yao; eoka yao ebitokelaka Sango, Wana nd’atokela imɔ ko yao.

²⁰Sango asoniya Wana la atɔɛnɛsɛ Wana bitotina ebitokelak’Inde angɛnɛ la ɛnɛsɛkɛ Wana bekeeli yolongela-bi mbo ino omwaleke.

²¹Kwa atotɛmwɛse Sango ebawäkä la atofaef’iyo liwawi liasi, ko ongoma Wana atofaka liwawi ende bato ebakasangek’Inde ofa liao.

²²Ati to Sango oyatoatela boto njasɔ, nde asofa Wana isosha sha liati lia njasɔ,

²³mbo batotina baliteseke Wana, kwani atolites’iyo olitesa Sango angɛnɛ. Oyaitolitesa Wana, ambo aitolitesa Sango oyatomäkä Wana.

²⁴Wewe, wewe, itoonga lanu mbo oyatoka lioi liami la oyatolendelo Inde oyatomäkä’mi, ambo asɔɔlɔ liwawi lia loiko la atilaɔtɛkɛ nda liati, kongo ko asosokwa nda liwa okaɔtɔ nda liwawi.

²⁵Wewe, wewe, itoonga lanu mbo mbile eyaka nde, eingo esoya kwani eyetokaka ebawi nde limiki lia Wana wa Mungu, la iyo ebatoka belayalaka la liwawi.

²⁶Kwa Sango to ayali ngɛnɛ wa liwawi, ongoma imɔ asofaefa Wana isosha shoyala ngɛnɛ wa liwawi;

²⁷la Sango asofaef’Inde imɔ isosha shoataka njasɔ eoka Inde nd’ayali Wana wa Boto.

²⁸Omwalëke eloasɔ-lo, eoka la mbile eyekayeke, batotina ebayali nda sai, belokaka limiki liande,

²⁹la belatɛmwaka nda liwa okaɔtɔ nda loiko, bako bakelaki ba olau, nde bakelaki ba bobe belatɛmwaka ko ndofomo se.

³⁰Imi angɛnɛ itikɔkɔlɛ ndokela loasɔ ango lomɔi; ko ani atoka’mi, itoata ongoma, la liataki liami liengani nde, eoka iitofumba ndokelaka ko lisangi liami, kangä lisangi liande oyatomäkä’mi.

³¹Eya to mbo yetaka inango shami angɛnɛ, ambo inango shami siitokulyomo mbo wewe;

³²Wasi nd’atota inango eoka yami, la Imi nd’aluwi mbo inango esitot’Inde eoka yami, shende wewe.

³³Ino watomäkä ende Yoane, la inde lotaka inango sha wewe,

³⁴nde likulyi elisolɛmbɛ’mi liti elia bato, nde iongi nde lioi-li lia Yoane mbo buwesomoko.

³⁵Inde ayaläka nde faka eyonganäkä foi la bolangalangu la ino watalɛmbɛ̈kɛ̈ ndoyaimwa ko mbile ɛmɔi la bolangalangu wande.

³⁶Nde Imi nd’ayali la inango sholonga esha Yoane, eoka likuwa eliafäkä Mungu efa’mi mbo yɔlɔlɛsɛkɛ liao, liao kongo elikokela’mi oko kwani, liao lile inango mbo Sango nd’atomäkä’mi.

³⁷La oyatomäkä’mi ako Sango, Inde nd’atota inango loasɔ loami. Otioke limiki liande, otiɛnɛ bɔfɔnɔ wande,

³⁸la lioi liande litiingale nda betema yanu eoka otiimel’Inde oyatomomökö lande.

³⁹Ototangakela kasa ya Mungu, eoka otangi nde mbo bɔsɛlɛkɛ nde Liwawi ko la yao, kongo ko yao bitotaka inango loasɔ loami;

⁴⁰nde ino otilɛmbɛ ndoya ende’mi mbo bɔɔlɛkɛ Liwawi.

⁴¹Lokuku loa bato, itikulye loao.

⁴²Iluwi nde mbo ino oti la losamɔ loa Mungu nda betema yanu.

⁴³Isoya ko nda lina lia Sango wami, nde otinyangele’mi; wasi nde koya nda lina liande angɛnɛ, ani ino konyangela nde ona.

⁴⁴¿Ino nd’atokɔkɔlɔ ndoimela la moni, ani otokulya liineli lia baina lanu, kongo ko otiluke liineli elitosokwa ko ende Mungu Ɔmwitoto?

⁴⁵Otangëke mbo Imi nd’atof’ino se oso wa Sango, ende ko Mɔsɛ oyatof’ino se, la osokɛsɛkɛ tɔɛli twanu ko end’inde kongo.

⁴⁶Eya to mbo wimeläkä nde Mɔsɛ, ani osoimela Imi, eoka inde nd’asɔnɔ̈kɔ̈ loaso loami nda Kasa.

⁴⁷¿Eya to mbo otiimele eyasonɔ̈kɔ̈ inde, ani ino koimela ebami baoi la moni?