Read lokele Yoane 9 Bible Online

Yoane 9 - lokele bible

Yoane 9

¹Etäkä Yesu nda mboka, Inde lɔɛnɛ boto oyaäkä la botuku konda baotelo bande,

²la baeki bande lofel’Inde mbo— ¿Labi, ndai yakeläkä obe, kwa botoyo kwa ebaot’inde, mbo aotomökö la botuku?

³Yesu lomutola mbo— Ati ango inde angɛnɛ, ango ebaoti inde lokela bobe kangä mbo ebikakeleke Mungu yɛnɛlɛkɛ end’inde.

⁴Lole loami ndokela yao ya Inde oyatomäkä’mi ani löwa lokoyali; akayeke lilima lia bocho, boto angokɔkɔlɔ ndokela likuwa.

⁵Akoyali’mi nda wenda, yende löwa loa wenda.

⁶Aongäk’Inde ongoma, Inde lotwɛlɛ sɔi nda nyɛlɛ ndokela baïti, Inde lolɔɔkɔ inde baïti nda baiso.

⁷Yesu loonga lande mbo— Kɛndɛkɛ okasoola bindo yaɛ nda lyaa liko Siloa (litina mbo Oyatomomu), inde lɔkɛ to inde losoola bindo, inde losokwa omao ani akɔɛnɛ liasi.

⁸Bayalani lande la bato ebɛnɛ̈k’inde oso mbo Ewa shomba, iyo lofelana mbo— ¿Ati ona oyayalakäkä se nda mboka shomba yeka?

⁹Bamɔi mbo— Ale ko inde. Basi mbo— Mba, nde akwelu nde bɔfɔnɔ wande. Nde boto angɛnɛ loonga mbo— Imi-yo.

¹⁰Limɔ iyo lofel’inde mbo— Baiso baɛ to baliolomu nde moni?

¹¹Inde lomutola lau mbo— Boto oyatangomu mbo Yesu lokela baïti, Inde lolɔɔkɔ bao nda baiso bami, Inde loonga lami mbo— Kɛndɛkɛ nda Siloa, soolaka bindo omao; imi lɔkɛ to, la asoolaka’mi, imi lɔɛnɛ liasi.

¹²Limɔ iyo lofel’inde mbo ¿Boto ona ale to anima? Inde mbo— Itiluwe.

¹³Iyo loesha oyayaliki oso la botuku ende BaFalusi.

¹⁴Lise lina eliakeläkä Yesu baiti, la elialioläk’Inde baiso bande, liaäkä elia Yenga.

¹⁵Eokao BaFalusi imɔ lofel’inde liasi ani ɛnɛsɔmɔ̈kɔ̈ inde. Inde loonga to lau mbo— Inde lota baïti nda baiso bami, imi losoola bao la kwani itɔɛnɛ.

¹⁶Bamɔi ba BaFalusi to loonga mbo— Ona ako Yesu ati wa Mungu, eoka atilitese lise lia Yenga. Nde basi bamɔi mbo— Boto oyatokelaka obe nd’atokɔkɔlɔ ndokela ndembe ya ilombo ya bɔfɔnɔ-bo? Ongoma iyo batisangane kuko.

¹⁷Eokao iyo lofelaka ewa botuku liasi mbo— ¿Aɛ angɛnɛ nd’atoonga iye loasɔ loande, eoka alioliki nde ebaɛ baiso? Inde mbo— Ende Bɔtɔndɔli.

¹⁸Nde BaYuda batiaimeläkä mbo ayaläkä la botuku la mbo ɛnɛsɔmɔkɔ̈ liasi, kond’atäk’iyo ebaot’inde lioi, ako oyaɛnɛsɔmɔ̈kɔ̈ liasi,

¹⁹iyo lofela iyo mbo— ¿Oyo ende to wana wanu oyatoong’ino mbo aotomökö la botuku? ¿Asɔɛnɛ to kwani la moni?

²⁰Ebaot’inde lomutola mbo— Toluwi nde mbo ende wana wasu la mbo aotomökö nde la botuku,

²¹nde totiluwe ani asɔɛnɛ inde oko liasi, la iso angɛnɛ totiluwe oyaliolik’inde baiso; felak’inde angɛnɛ, ende otowange, atoaolel’inde angɛnɛ.

²²Ebaot’inde loonga ongoma eoka bawangakäkä BaYuda, eoka BaYuda lotwana kuko mbo boto eaola mbo Yesu ende Masiya, ambo ona kosokolomo nda ɛsɔngɔmɛlɔ.

²³Liao to lile litina eliongiki ebaot’inde mbo— Ale otowange, felak’inde angɛnɛ.

²⁴Eokao iyo lota oyaäkä la botuku, lita lia ambale, iyo loonga lande mbo— Ongaka ko wewe wa Mungu, eoka iso nd’aluwi mbo eboto-yo atokelaka bobe.

²⁵Boto loonga to mbo— Eya boto oyatokelaka obe, im’itiluwe, loasɔ lɔmɔi eloluwi nde imi, loko mbo yaäkä la botuku, nde kwani isɔɛnɛ.

²⁶Iyo lofela inde mbo— ¿Akeeliki nd’aɛ moni? ¿Alioliki nde baiso baɛ l’iye?

²⁷Inde lomutoel’iyo mbo— Ikambesiki nd’ino, nde otiokeke; ¿Olɛmbi nde ndoka liasi moni? Mbo ino imɔ nd’alɛmbi oyala baeki bande?

²⁸Limɔ iyo lomɔl’inde, iyo mbo— Aɛ wende boeki wa boto ona, nde iso nd’ayali baeki ba Mɔsɛ.

²⁹Iso nd’aluwi mbo Mungu aongäkä la Mɔsɛ, kongo ko loasɔ loa oyo-boto-yo totiluwe ango olo asokwäkä lande.

³⁰Boto lomutola lau mbo— Loasɔ lomwaalomo to loko mbo ino angoluwa olo asokwaka lande, l’ani alioli nde baiso bami!

³¹Toluwi nde mbo Mungu angolaila ebatokelaka bobe; nde boto esemolak’Inde, ekelaka lisangi liande, ambo Mungu kolail’inde ona.

³²Ko layalaya lotiaokomökö mbo boto nd’alioläkä baiso ba boto oyaotomu la botuku.

³³Aenaka mbo boto ona ayäkä ende Mungu, ani Inde angokɔkɔlɔ okela yeka.

³⁴BaFalusi lomutoel’inde mbo— Ko la obe aɛ nd’aotomökö fɛɛ! ¿Aɛ nd’atoekes’iso? Limɔ iyo losokol’inde nda ɛsɔngɔmɛlɔ.

³⁵Okäkä Yesu mbo basosokol’inde la oshäkä Yesu oosh’inde, Yesu loonga lande mbo— ¿Osolendelo to Wana wa Mungu?

³⁶Boto ona loonga mbo— ¿Bwana, ale to ndai mbo ilendeloko Inde?

³⁷Yesu loonga lande mbo— Osɔɛnɛ Inde la akoonga imɔ laɛ kwani, Inde kongo.

³⁸Inde mbo— Bwana, isoimela. Inde lotulamela Yesu se.

³⁹Limɔ Yesu loonga mbo— Imi nd’asoya nda wenda-bo ndoyaataka wao, mbo ebatiɛnɛ, bɛnɛkɛ, la mbo ebatɔɛnɛ bakinjweke eba botuku.

⁴⁰Okäkä BaFalusi bamɔi ebayaläkä lande ebaoi-ba, iyo loonga lande mbo— ¿Iso imɔ twende eba botuku?

⁴¹Yesu lomutola lau mbo— Wayala nde la botuku, ani otiyaleke bato ba obe, nde kwaani atoong’ino mbo, Totɔɛnɛ; ambo ino okoyali bato ba obe.