Read lokele Tomo Ya Batomomu 12 Bible Online

Tomo Ya Batomomu 12 - lokele bible

Tomo Ya Batomomu 12

¹Nda mbile ena, Bɔkɔta Helodi loundesa bamɔi ba Etanda la olengi.

²Inde loola Yakobo boloo wa Yoane la chaka,

³limɔ ɛnɛk’inde mbo BaYuda basoka bolau finɛ nda loasɔ-lo, inde losangana imɔ loasi loko oundes’imɔ ko Petelo; yaaka nde bacho ba lituma eliti la fulo,

⁴la aundesak’inde Petelo, inde lokandak’inde bɔnyɔlɔlɔ, la betükä binɛi ya basilikani banɛi banɛi bolambak’inde; inde losanga ndokusol’inde oso wa bato, mbisa ya Elambɔ ya Lieti.

⁵Ongoma to Petelo lomachana nda bɔnyɔlɔlɔ, kongo ko Etanda losombokola Mungu ko la bofiili loasɔ loande.

⁶Nde la bocho ewasangaka Helodi ndokusol’inde, Petelo loingala ilɔ atiteni ya basilikani ambale ani akandomu la bɛnyɔlɔlɔ imbale l’ani basilikani ambale loemala nda biome ndolamba ndakɔ ya bɔnyɔlɔlɔ.

⁷Futuku bokitomo wa Mungu lɔɛnɛlɛ la liangangi loangangela litenya; inde looma Petelo nda likuka, inde losisɔlɔ inde yai, inde mbo— Emalaka mangu! Limɔ bɛnyɔlɔlɔ losɔngwasɔngwa nda besamba yande.

⁸Limɔ bokitomo loonga lande mbo— Wataka bɔkɔli la wataka tokwaka twaɛ. Inde lokela ongoma limɔ bokitomo loonga lande mbo— Wataka imɔ ko kanjo, tutaka’mi!

⁹Petelo lokuswa okatut’inde, nde atiaenyelaka mbo loao eloakelaka bokitomo loende wewe, atangaka nde mbo asɔɛnɛ liɛni.

¹⁰Limɔ iyo loeta botükä wa oso, l’ewa imbale wa betingani, iyo loiyela bome wa yeto ewa lousa, wao loliolama wao angɛnɛ mbo beteke; iyo lokuswa nda okenge, la akɛndɛkɛ iyo nda mboka, lamao bokitomo losɛnyana lande.

¹¹Aluwaka Petelo oluwa loasɔ la wɛlï, inde loonga mbo— Kwani iluwi nde wewe mbo Ngɛnɛ asotoma bokitomo wande la asɔɔnɔkɔlɔ’mi nda besamba ya Helodi la nda loao lototina eloasangaka BaYuda.

¹²Aenyeläk’inde ongoma, inde lɔkɛ nda ndakɔ ya Malia, nyango wa Yoane oyatangomu imɔ mbo Malako, olo asɔngɔmɔkɔ bato wike nda lisomboli.

¹³Atitaka Petelo bome wa lilɛlɛ, boseka wa likuwa ako Loda loya oyaaola,

¹⁴limɔ alembeelaka inde limiki lia Petelo, atitalioelak’inde bome ko l’eoka ya limɛngɔ finɛ, nde inde lokwa mangu okakambes’iyo mbo Petelo aemali nda bome.

¹⁵Nde iyo loonga lande mbo— Osowa loseka! Kongo ko boseka lokɔkɔmɔ ndoonga mbo lole ongoma, nde iyo mbo— Ende bokitomo wande.

¹⁶Ani Petelo atotitaka bome lousa; nde aliolak’iyo, iyo lɔɛnɛ inde, iyo lomwaala finɛ.

¹⁷Limɔ inde lɔfɛfɛ bosamba wande mbo bayaleke tau, limɔ inde lokambes’iyo ani asokusola Ngɛnɛ okusol’inde nda bɔnyɔlɔlɔ, inde mbo— Luwesaka Yakobo la beoto loasɔ-lo. Limɔ inde losokwa, inde lotangwa ko elela yasi.

¹⁸Asɔswaka bonyanya, loeyaeyo lofi ende basilikani mbo loni loasɔ losoyela Petelo.

¹⁹Alukaka Helodi olukak’inde, angoosh’inde; limɔ inde lokotola basilikani, inde lota ndola mbo bolomoko.

²⁰Limɔ Helodi losokwa nda Yudea, inde lokayala nda Kaisalia. La inde losoma finɛ la bato ba Tulo la Sidona, eokao iyo losɔngɔkɔmɔ end’inde la asilak’iyo ndɔɔngɔlɔ Bulaseto ako bonyafala wa Helodi, iyo loomb’inde ndotinya lau lilatemi eoka yese yau yalendeloko eya Helodi loasɔ loa bieka.

²¹Eokao ko la lise eliatinyomoko lisho, Helodi lowataka lilɛngɔ lia bɔkɔta la inde loyala se nda kɛka ya likomyi, inde loakola ndonangola end’iyo;

²²limɔ bato ba ekuke loamama la limiki lifi mbo— Limiki lia Mungu, inga elia boto angɛnɛ.

²³Kwaamao bokitomo wa Mungu looma Helodi, eoka atiainelaka Mungu la lilitesi; nduka yande lolomo la tɔngɔnɔ, inde lokwela se.

²⁴Kongo ko wɛndi wa Ngɛnɛ losɛngɛ, wao loulwaka finɛ.

²⁵Asilaka Balanaba la Saulo tomo eyatomomoko iyo, limɔ iyo loinwa Yelusaleme, iyo loesha amamwito lau Yoane oyatangomoko Malako.