Read lokele Tomo Ya Batomomu 16 Bible Online

Tomo Ya Batomomu 16 - lokele bible

Tomo Ya Batomomu 16

¹Limɔ Paulo loiyela Delebe la Lusetula imɔ, la omao yaaka la boeki ɔmɔi ako Timoteo, wana wa otomali wa BaYuda wa liimeli, nde sango wande aaka WaHela;

²Timoteo lotangomo boto wa lokuku lolau ko l’eba beoto nda Lusetula la Ikonio.

³Paulo losanga mbo boto-yo akɛkɛ lande nda lɔkɛndɔ, limɔ inde lɔɔsɔ Timoteo, inde loten’inde itombe loasɔ loa BaYuda ebayalaka nda yese ena, eoka iyo yaatotina loluwa mbo sango wande aaka WaHela.

⁴Etak’iyo nda bokenge la bokenge, iyo lofaekefa beoto lokasa loa baiti ebataka Batomomu la Biange nda Yelusaleme, mbo baliteseke bao.

⁵Ongoma bitanda lokɔkɔmɔkɔ nda liimeli, la loketi loa yao loulwa lise la lise.

⁶Lamao iyo loetaka yese ya Felungia la Galatia, ani batakufesomu la Bolimo Botanu okanangola wɛndi nda yese ya Asia.

⁷Iyak’iyo nda liko lia yese ya Misia, bakotaka ndɔkɛ nda Bitunia, kongo ko Bolimo wa Yesu atialɛmbɛk’iyo ongoma,

⁸eokao iyo loetela Misia, iyo lɔkɛ nda Tuloa.

⁹Limɔ la ocho liɛni lɔɛnɛlɛ ende Paulo, boto wa Makedonia loemala ani atolɔmbɔkɔlɔ Paulo mbo— Lekaka nda Makedonia oyasung’iso!

¹⁰Enɛkɛ Paulo liɛni, lisasaya iso loluka fofe yɔkɛ nda Makedonia eoka totangiki nde mbo Mungu asotak’iso lioi mbo tokɛokanangokole Mboli Ilau ende bato omao.

¹¹Ongoma iso loilia owale la watɔ wa lofo, iso lɔkɛsɔmɔ fii la fofo konda bosanga wa Samotulake, la lɛlɛngɔ iso loiya nda Neapoli,

¹²osokwa omao konda Filipoi, bokenge woeta wa yese ya Makedonia la olo ayalaka koloni ya BaLoma. Iso loumwaka omao mbile bimɔi.

¹³Nda lise lia Yenga, iso lokuswa lousa loa bome wa likula lia okenge tina la liyande olo aenyelak’iso mbo ende esomboelo; iso loyala se omao amamwito la batomali ebasɔngɔmɔkɔ ina.

¹⁴Otomali ɔmɔi ako Ludia boungesi wa langi ya bisinda ya bokenge wa Tuatila, inde looka wɛndi, la ayalaka botomali wosemokola Mungu; Ngɛnɛ lolioel’inde botema mbo alaileke baoi ebaongaka Paulo.

¹⁵Alufiomoko inde la bofindi wande, inde lofelak’iso mbo— Eyambo botanga mbo imi yende wimeli wa Ngɛnɛ, yauku oyayalaka nda ndakɔ yami, ongoma inde lotinj’iso ndokulya.

¹⁶Lise limɔi aɛk’iso nda esomboelo, iso lotowana la boseka ɔmɔi wa likuwa oyaɔtɛlɔmɔ la bolimo wa litɔli la oyaɔlɛsɛkɛ bangɛnɛ bande bondanda finɛ ko la baoi ba litɔli,

¹⁷inde lotutak’iso la Paulo, ani atoamama mbo— E-bato-ba bende bɛkɔwa ya Mungu Oyalongeli, ebatonangoel’ino mboka ya liuwesi.

¹⁸Inde lokelaka ongoma ko bacho wike, nde Paulo lotɛkwa, inde lokikwa okaonga la bolimo mbo— Isotel’aɛ ndola ko la lina lia Yesu Masiya mbo okusweke ende boseka, limɔ wao lokuswa end’inde ko la mbile-ao.

¹⁹Nde ɛnɛkɛ bangɛnɛ bande mbo bati imɔ la fofe yɔɔ̈lɔ bondanda loasɔ loande, iyo loundesa Paulo la Sila, iyo losulia iyo nda eolo ya liongo ende benyafala ya okenge.

²⁰Iyo lɔkɛs’iyo ende Bekumi, iyo loonga mbo— E-bato-ba ebatoswanel’iso bosho ono nda bokenge wasu, bende BaYuda,

²¹la batonangokola biyaelo ebitiengane lasu ndokulia kwa ndokela eoka tole BaLoma.

²²Limɔ eba ekuke losungamel’iyo la Bekumi losalaka bisinda yau, yao losokolomo limɔ iyo loonga mbo banyɔlɔmɔkɔ la tososola.

²³Asilak’iyo okuchak’iyo la banyɔlɔ wike, iyo lokush’iyo nda bɔnyɔlɔlɔ, iyo lotela botingani wa bɔnyɔlɔlɔ ndola mbo atinganeke lau ko ngwi.

²⁴Limɔ ko l’eoka asotomo ndola ongoma, inde loundes’iyo, inde lokush’iyo nda tindo y’atiteni, inde lokandaka bakolo bau nda bombele ngwi.

²⁵Nda ɛsɔkɔ ya ocho, Paulo la Sila losombola Mungu, iyo lochwaka bɛɛlɛ ani basi ebakandomu omao lolaila iyo.

²⁶Limɔ futuku lotukeso loa nyɛlɛ lolɛlɛsɛ batalɛ ebaswomoko la ndakɔ ya bɔnyɔlɔlɔ, la biome bitotina loliokolomoko futuku la bakala ba ebakandomu lofaikwa.

²⁷Asiswaka botingani nda ilɔ, inde lɔɛnɛ oko biome bisoliwaliwa, inde lɔɔmɔlɔ chaka la asiaka owa la yao eoka atangi nde mbo ebakandomu basolɔmwa.

²⁸Kongo ko Paulo loama la limiki lifi mbo— Obebesëke lokomba loaɛ angɛnɛ, eoka iso yaatotina tole ko eyamaya.

²⁹Limɔ botingani lotaka faka lioi, inde lɔɔtɔ ko mangu ani anyangaka la bɔwa, inde lokwa se oso wa Paulo la Sila,

³⁰limɔ inde lümes’iyo lousa, inde mbo— Bwana, ¿Lole loami ndokela to iye mbo yuwesomoko?

³¹Iyo loonga to mbo— Imelaka Ngɛnɛ Yesu, limɔ otouwesomo, l’aɛ la bofindi waɛ.

³²Lamao, iyo lokambes’inde la batotina ba bofindi wande, wɛndi wa Mungu.

³³Inde lound’iyo ko la saa ena ya bocho, inde losoolaka bakambili bau, la inde la bato bande batotina lolufiomo lisasaya.

³⁴Limɔ inde loesh’iyo nda ndakɔ yande, inde lotaka bieka nda mɛsa oso wau, iyo loomalaka finɛ amamwito la ebande batotina eoka basoimela Mungu.

³⁵La bonyanya, Bekumi lotoma polisi la wɛndi mbo— Faikolaka bato ana!

³⁶Limɔ botingani lokambesa Paulo mbo— Bekumi basotoma polisi mbo bofaikolomoko. Kuswaka to kwani la kɛndɛkɛ eyanu la lilatemi!

³⁷Nde Paulo loonga lau mbo— Bakuchik’iso fololo nda baiso ba bato ani totikomyomo loasɔ, iso bato ba Loma, la basokush’iso nda bɔnyɔlɔlɔ. ¿Kwani to batokush’iso lousa ko wisakumbo? Mbayɔ, kangä iyo angɛnɛ bayeke oyakusol’iso la wɛlï.

³⁸Limɔ polisi lokambesa Bekumi e-baoi-ba, la okak’iyo mbo— Bende BaLoma, iyo lokwelo bɔwa.

³⁹Lamao iyo loya oyaɔngɔlɔ’iyo, iyo lokusol’iyo la wɛli ani bafelak’iyo mbo basokweke nda okenge.

⁴⁰Akuswak’iyo nda bɔnyɔlɔlɔ, iyo lokɔtɔ nda ndakɔ ya Ludia, limɔ ɛnɛk’iyo wɛnɛ beoto, iyo lɔɔnjɔnj’iyo, limɔ iyo lotangwa.