Read lokele Tomo Ya Batomomu 17 Bible Online

Tomo Ya Batomomu 17 - lokele bible

Tomo Ya Batomomu 17

¹Akɛndɛk’iyo la mboka ya Amfipoli la Apolonia, iyo loiyela bokenge wa Tesalonika, olo ayalaka ɛsɔngɔmɛlɔ ya BaYuda.

²Paulo, kwa aaka boyaeli wande, inde lɔɔtɔ omao ko yenga bisatɔ, inde lofelakana lau eoka ya Kasa ya Mungu,

³inde losanoel’iyo la baoi boaesa loao se, mbo loengani nde la Masiya mbo okeke tokange la mbo atɛmwɛkɛ liasi nda liwa, la mbo— E-Yesu-yo oyatonangola’mi end’ino, inde nd’ayali Masiya.

⁴Bamɔi bau lokulia baoi bande, iyo lowatema la Paulo la Sila, imɔ ko la BaHela ebasemolaka Mungu wike fafo la batomali wike ba betoli oso.

⁵Kongo ko BaYuda lowɛl’iyo lisiela, iyo lɔɔsɔ batolome bamɔi ba baeteti, limɔ iyo losɔngɔmɛs’iyo nda limbilititi, iyo lofɔɔlɔ bimo nda okenge, iyo lokutukana la ndakɔ ya Yasona ndoluka Paulo la Sila mbo basuliek’iyo nda ikumbɛ sha okenge.

⁶Nde atiɛnɛk’iyo, iyo lokasulia Yasona angɛnɛ la beoto bɛmɔi ende Bekumi ya okenge, iyo loulaula baoi ba liwanjeli mbo— Ebasoyombayombesa wenda basoya imɔ onomono,

⁷la Yasona asof’iyo ndakɔ yande; iyo yaatotina batotefokola baiti ba Kaisala eoka basoonga mbo wasi nd’ayali Bɔkɔta ako Yesu.

⁸Okaka Bekumi la ekuke ya bato e-lioi-li, iyo looka betema wale,

⁹limɔ ɔsɔkɔ iyo tuka ende Yasona la ebamɔi, iyo lomach’iyo mbo bakɛkɛ.

¹⁰Limɔ beoto lotoma Paulo la Sila ko la ocho mbo baɛkɛ nda Beloya. Iyak’iyo omao, iyo lokaɔtɔ nda ɛsɔngɔmɛlɔ ya BaYuda.

¹¹BaYuda-ba balongaka eba Tesalonika la booto, banyangelaka wɛndi la yɛmɛ finɛ la iyo lotichaka Kasa ya Mungu ndɔɛnɛ kwa mbo bitotina-bi bende ngo ko ani.

¹²Ongoma wike wau loimela to, la batomali bamɔi eba lokuku lolau ba BaHela la batolome imɔ sumbu wike.

¹³Nde aluwaka BaYuda ba Tesalonika mbo wɛndi wa Mungu bosonangolomo imɔ ko nda Beloya, iyo loya imɔ, iyo lofɔɔlɔ bikuke ya bato mbo baswaneke bosho.

¹⁴Limɔ beoto lotoma Paulo lisasaya konda balia ba bokwa l’ani Sila la Timoteo lotikala ko omao.

¹⁵Nde ebaɛkɛ okatika Paulo nda mboka, iyo lɔkɛ lande konda Atenai limɔ afomoko iyo ndola ende Sila la Timoteo mbo bayek’ende inde la mangu finɛ, iyo loinwa.

¹⁶Aumbakelaka Paulo oumbakel’iyo nda Atenai, inde looka botema wale finɛ ani ɛnɛk’inde mbo bokenge bosotuma la mungu-ya-bɛfɔnɔ.

¹⁷Eokao inde lofelakana nda ɛsɔngɔmɛlɔ la BaYuda la bato ebasemolaka Mungu la lise la lise nda eolo ya liöngo imɔ amamwito la bato ebakatowaneke lande omao.

¹⁸Bamɔi ba sukulu ya Epikulio la eba wɛlï bako BaStoa lotowana lande, iyo lofelana mbo— ¿E-boto-bo wa botendelë asosanga ndoonga to iye? Basi mbo— Eluwa ende bonangoli wa balimo ba yese yasi, ko eoka mbo Paulo loluwes’iyo Mboli Ilau ya Yesu la litɛmwi nda liwa.

¹⁹Limɔ iyo lounda Paulo okakɛ lande nda eolo eko Aleopago, iyo mbo— ¿Toluweke sumbu litina lia liekesi liyai elitoongak’aɛ?

²⁰Eoka osoeshel’iso mboli ebikaluw’iso; eokao tole la yɛmɛ yoluwa litina lia yao.

²¹Eba Atenai la bɛɛnda ebatoyalaka nda bokenge wau, batoetekesa mbile yau bitotina ko ndoongana la ndokaka ko njasɔ biyai.

²²Limɔ Paulo loemala atiteni ya eolo ya Aleopago, inde loonga mbo— Ino bato ba Atenai, im’isɔɛnɛ mbo wende bato woimelaka njasɔ bitotina.

²³Eoka etaka’mi la mboka ya bokenge wanu, la atichakaka’mi yao ebitosemokol’ino, imi loosha litumbo limɔi elitomu la baoi-ba mbo— Lile elia Mungu Oyatiluwane. Eokao, Imi nd’atoluwes’ino Inde oyatosemol’ino ani otiluwe Inde.

²⁴Mungu oyakelaka wenda la bitotina ebile nda wao, Inde nd’ayali Ngɛnɛ wa use la nyɛlɛ, aitoyalaka nda esemoelo eyekelomu ko la besamba;

²⁵aitokelakomo likuwa la besamba ya balomboki ko l’eoka mbo aenu nde yeka, eoka Inde angɛnɛ atofaekefa bato liwawi la luli la bitoti imɔ.

²⁶Ko la boto ɔmwito akelaka tukela bitotina ya balomboki mbo bayaleke nda wenda bototina, asokaelel’iyo lisho la belelo ya biyaelo yau.

²⁷Alɛmbi nde mbo balukeke Mungu mbo akatufatufek’iyo, iyo koosh’Inde, kongo ko ati esika lasu boto la boto;

²⁸Eoka yande to tole la liwawi la totowawawawa la tokoyali balomboki, kwa asoonga imɔ ɔmɔi wanu angɛnɛ nda bɔɛlɛ mbo— Twende imɔ ko eba lioti liande.

²⁹Eokao kwa ayal’iso lioti lia Mungu, lotiengane lasu ndoenyela mbo Mungu akwelu nde bɔfɔɔnɔ wa mbela, kwa ewa bieto ya falata, ango kwa litalɛ elikwɛtɔmu ko la liluwani la baenyeli ba bato.

³⁰Kongo ko Mungu atienyel’imɔ mbile ena ya botutuku wasu, nde kwani asotoma wɛndi ende bato batotina nda biese bitoti mbo bakalanganeke,

³¹eoka asotinya lisho elikaatek’Inde wenda bototina la liengani ko la Boto oyasüch’Inde, la asosunga bato ndoimela ko la litɛmwi ndotɛmɔlɔ Inde nda liwa.

³²Okaka iyo lioi lia litɛmwi lia ebasowa, bamɔi bau lolimbokol’inde, nde basi mbo— Totooka lioi liaɛ nda loasɔ-lo ko mbile yasi.

³³Ongoma Paulo losokwel’iyo nda ikumbɛ;

³⁴kongo ko batolome bamɔi bau lowatema lande, iyo loimela; Dionusio boto w’ikumbɛ sha Aleopago aaka wau, la botomali ako Damali, bamɔi basi imɔ.