Read lokele Tomo Ya Batomomu 19 Bible Online

Tomo Ya Batomomu 19 - lokele bible

Tomo Ya Batomomu 19

¹Ayalaka Apolo nda Kolinto, Paulo loeta ko la yese ya likolö, limɔ inde loiya nda Efeso, omao inde lotowana la baeki bamɔi,

²inde lofel’iyo mbo— ¿Waɔlɔkɔ̈ Bolimo Botanu nda mbile eyimelak’ino? Iyo mbo— Mba, la totiokaka mbo Bolimo Botanu ayali nde.

³Inde mbo— ¿Lini to lilufi elialufiomoko lanu? Iyo loonga to mbo— La lilufi lia Yoane.

⁴Limɔ Paulo mbo— Yoane lolufia bato la lilufi lia likalangani, la inde lokambesa bato ndoimel’Inde oyakayeke mbisa yande ako Yesu.

⁵Okakä iyo ongoma, iyo lolufiomo nda lina lia Ngɛnɛ Yesu,

⁶limɔ ataliakä Paulo otaliel’iyo bangasa, Bolimo Botanu loya end’iyo la iyo loakola ndoonga baoi ba kanda yasi la ndotɔndɔlɔ,

⁷baaka bato ango liu la ambale.

⁸Limɔ Paulo lɔɔtɔ nda ɛsɔngɔmɛlɔ la ko la tengai isatɔ inde lonangokola la lotendela ndofelakana la ndofumbesa bato loasɔ loa Bɔkɔta wa Mungu.

⁹Kongo ko akweloko bamɔi lotale la litefoli, la atɔngɔk’iyo botuteli-bo nda batoi ba bokamu wa bato omao, inde losokwa end’iyo, inde lɔkɛ amamwito la baeki, limɔ lise la lise inde lokasanokoela njasɔ-bi nda sukulu ya boekesi ako Tulano.

¹⁰Inde lokelaka ani ko miaka imbale, ongoma batotina ebayalaka nda tukela ya Asia looka wɛndi wa Ngɛnɛ, la BaYuda la BaHela lisanga.

¹¹Mungu lokelaka bisisho yoetela ko la besamba ya Paulo,

¹²eoka ya totambala la befali ya likuwa lia Paulo eyɔsɔmɔkɔ okakɛsɔmɔ ende eba kambo, la ngwo losokwa la belimo ibe lokuswak’end’iyo.

¹³Kongo ko BaYuda bamɔi betetaka nda likusoli lia belimo ibe, iyo loakola ndosingwaka lina lia Ngɛnɛ Yesu ende bato ebaɔtɛlɔmɔkɔ la belimo ibe, iyo mbo— Isotel’ino ekanɔ ko la lina lia Yesu oyatotomo boekï ko la Paulo!

¹⁴Ebakelaka ongoma baaka batolome bosambale, bana ba Kanga eyeti wa BaYuda ako Sekewa.

¹⁵Nde Bolimo obe loonga lau mbo— Iluwi nde Yesu, la isolembeela Paulo; ¿ino wende to bandai?

¹⁶Limɔ e-boto-yo oyayali la bolimo obe, inde loungwel’iyo, inde lolonga ndokakales’iyo yaatotina, iyo lokwa otili okasokwa nda ndakɔ ena ko wase l’ani batumaka la bafwa.

¹⁷Loasɔ-lo loluwana la batotina ebayalaka nda Efeso, la BaYuda la BaHela lisanga, la bɔwa lounda iyo yaatotina, nde lina lia Ngɛnɛ Yesu loinakelomo finɛ.

¹⁸Limɔ bato wike ebimelaka loya oyaaola la ndosanokola tinjela eyakelak’iyo,

¹⁹la wike imɔ ebaluwaka fɔnɔli, iyo losɔnja kasa yau, iyo lofechaka yao nda bösä oso wa bato batotina. Atangak’iyo loketi loa yao, iyo lɔɛnɛ mbo yenganaka ko pata bilɛfu litinda.

²⁰Ko ongoma Wɛndi wa Ngɛnɛ lɔsɛngɛ la lokuku la bofoka.

²¹Mbisa ya njasɔ-bi, Paulo losanga nda isosha sha Bolimo ndotandela yese ya Makedonia la Akaiya okakɛ konda Yelusaleme; inde mbo— Mbisa ani isɔkɛ ko omao, lole loami okakɛ ndɔɛnɛ imɔ Loma.

²²Limɔ atomaka Paulo basungi bande bambale, bako Timoteo la Elaseto nda Makedonia, inde angɛnɛ lotatikala kɔni mbile ɛmɔi nda Asia.

²³Yaaka nde bosho ofi la mbile ena, ko l’eoka ya Liimeli-li.[1]

²⁴Boto ɔmɔi ako Demetulio, botuli wa bieto ya pata, akwelaka bɔfɔnɔ wa Diana ko la bieto ya pata, la likuwa-li lɔɔlɛsɛ betuli ya wɛli ko bieto wike.

²⁵Inde lɔsɔngɔmɛsɛ betuli-bi la basi imɔ ebakelaka bakuwa kwa liao; inde loonga mbo— Batolome, oluwi nde mbo bondanda wasu bosolendelo ko likuwa-li,

²⁶la osoɛnɛ la osoka mbo e-boto-yo ako Paulo asolonga ndolimbaka bokamu wa bato wike, inga ono nda Efeso kongo, kangä imɔ nda yese ya Asia etotina ani atoongaka’inde mbo mungu ebikelomu la besamba ya bato biti mungu wewe.

²⁷Ongoma likuwa liasu lile nda tale, liko mbo litawa sɔni la mbo esemoelo ya mungu efi ako Diana lotangomo mbo wawa la mbo lokuku loande lofi loweke, loko eloande oyasemolomoko nda yese etotina ya Asia.

²⁸Okak’iyo baoi-ba, iyo losomasoma finɛ, iyo loamama mbo— Diana wa Efeso oyalongeli!

²⁹Ongoma bokenge bototina loyombayomba la iyo yaatotina lokwa mangu amamwito nda eolo ya bisha, iyo losuliaka lau, Ngayo la Alisetalako ba Makedonia bako bakɛndɛni ba Paulo.

³⁰Limɔ Paulo losanga ndokɔtɔ limbilititi lia bato, kongo ko baeki bakufesak’inde.

³¹Bekumi bimɔi ya yese ya Asia ebaaka baina la Paulo, iyo lotoma wɛndi end’inde ndolombɔkɔl’inde mbo ataɔtɔ nda eolo ya bisha.

³²Limɔ bamɔi loama la lioi limɔi, basi la lioi liasi, etunda loeyaeya finɛ ani wike angoluwa ango litina eliasɔngɔmɔkɔ lau.

³³Bamɔi ba ekuke lotanga mbo lole loa Alesandelo, eoka BaYuda lotinjak’inde oso ndoonga, nde afɛfɛk’inde la bosamba mbo bokek’inde eoka alɛmbɛkɛ ndoonga lau,

³⁴bato lolembeela mbo ende ngo ko WaYuda, iyo loamama ko la saa imbale la limiki limwito mbo— Diana wa Efeso oyalongeli!

³⁵Asilaka ikomya la botikasa wa okenge ndoyalesa ekuke ya bato tau, inde mbo— ¿Ino bato ba Efeso, boni oto atiluwe mbo bokenge wa Efeso wende botingani wa mungu ofi ako Diana oyakwakwa se nda use?

³⁶Eoka mbo njasɔ-bi biti yoanganyomo, loengani lanu ndoyalaka tau, angokela bofaofao.

³⁷Eoka osoesha e-bato-ba l’ono ani batibebese esemoelo ya mungu wasu la batisɛɔle mungu otomali wasu.

³⁸Eokao eya to mbo Demetulio la ebasangani lande nda likuwa beyala la oto la loasɔ lɔmɔi, tole la baatelo nda lise lia liongo la twende la Bakomi, bawanjelaneke to ko omao.

³⁹Kongo ko bolɛmbɛ ndokomia loasɔ loasi, loao koongomo nda etunda eyengani la boyaeli wasu;

⁴⁰eoka tole nda tale mbo totawanjelomo loasɔ loa loyombayombo louse-lo, eoka toti ango la litina lioengana la loao.

⁴¹Aongak’inde ongoma, inde lomelesa etunda ya bato.