Read lokele Tomo Ya Batomomu 23 Bible Online

Tomo Ya Batomomu 23 - lokele bible

Tomo Ya Batomomu 23

¹Limɔ Paulo lotichaka eba Ikumbɛ, inde mbo— Bitungani yami, botema bosolembeelesa’mi angɛnɛ mbo isolitesaka Mungu la wɛli konda louse-lo.

²Nde Kanga eyeti ako Anania lotel’ebemali tina lande mbo bomeke Paulo nda bɔnɔkɔ.

³Lamao Paulo loonga lande mbo— Mungu nd’atom’aɛ, ako etutu eyesiomu fɛmbɛ! ¿Oyali nde se omao ko ndoataka loasɔ loami ko la Bikela ani aɛ angɛnɛ ototwanelo Bikela ko ndoonga mbo yomomoko?

⁴Ebemali tina loonga la Paulo mbo— ¿Otomɔlɔkɔ nde Kanga Eyeti ya Mungu?

⁵Paulo loonga mbo— Bitungani, itiluweke mbo ende Kanga Eyeti eoka loatomoko nda Lokasa mbo— Osɛolɔ̈kɔ bokomi wa bato baɛ.

⁶Limɔ aluwaka Paulo mbo bamɔi ba Ikumbɛ bale BaSadoke la bamɔi bale BaFalusi, inde loamama mbo— Bitungani, imi yende WaFalusi, la wana wa WaFalusi, isoemala ono ndokomiomo ko loasɔ loa iyɛli sha litɛmwi nda liwa.

⁷Aongaka Paulo ongoma, BaFalusi la BaSadoke lofenyakana la Ikumbɛ loatakana.

⁸Basadoke nde baongaka mbo angwɛnɛ imɔ litɛmwi nda liwa, la angwɛnɛ bokitomo, angwɛnɛ ango bolimo, kongo ko BaFalusi baongaka mbo iyo yaatotina biyali.

⁹Limɔ etondo efi lookana la batikasa bamɔi ba botuka wa BaFalusi loemakala, iyo lofenyana mbo— Totiɛnɛ litwanelo ango limɔi ende e-boto-yo; eluwa ende bolimo oyasoonga lande, ango ko bokitomo.

¹⁰Limɔ akɛkɛ tofenya la bosho la oso, Komanda lowanga mbo batasalaka Paulo la bolengi, inde loonga la basilikani mbo bakɛkɛ okaɔnɔkɔlɔ Paulo end’iyo la mbo bayeke lande nda ndakɔ ya basilikani.

¹¹Limɔ la bocho wa mbisa, Ngɛnɛ loemala tina la Paulo, inde loonga mbo— Sambolaka botema waɛ, kwa asokambes’aɛ okambesa bato loasɔ loami ono nda Yelusaleme, ongoma otokambesa bato imɔ ko yao nda Loma.

¹²Asɔswaka bonyanya, limɔ BaYuda lotwana kuko, iyo lotana tele mbo angola bieka, angomwa ani bakoli ko Paulo;

¹³ebatwanaka kuko baaka bato boeta kama inɛi.

¹⁴Iyo ana lɔkɛ ende Kanga ebieti la biange, iyo loonga mbo— Tosotinya ekanɔ ko la tele mbo iso angolɛtɛ yeka ani tokoli ko Paulo.

¹⁵Eokao to ino angɛnɛ amamwito la Ikumbɛ luwesaka kwani Komanda mbo aeshaka Paulo oso wanu kwa mbo bokomielek’inde e-loasɔ-lo liasi la wɛli, la iso toengani nde ndool’inde ani akayi ango tina.

¹⁶Kongo ko wana wa welo wa Paulo looka loasɔ loa iɔlɛ-si, ongoma inde lɔɔtɔ nda ndakɔ ya basilikani okaluwesa Paulo,

¹⁷la Paulo lota ɔmɔi wa betoli oso wa basilikani lioi, inde mbo— Kɛsɛkɛ isenge-si ende Komanda, eoka ale la lioi lioonga lande.

¹⁸Ongoma to, inde lɔkɛ lande ende Komanda, inde mbo— Oyakandomu ako Paulo, asota’mi lioi, asofela’mi mbo yesheke isenge-si end’aɛ, ale la lioi lioonga laɛ.

¹⁹Komanda lounda to isenge la bosamba, inde lɔkɛ lande sumbu wisakumbo, inde lofel’inde mbo— ¿Iye to eyetokambes’aɛ okambesa’mi?

²⁰Isenge mbo— BaYuda basotwana kuko yofelak’aɛ mbo wesheke Paulo ende Ikumbɛ lɛlɛngɔ mbo bakomielek’inde nda loasɔ-lo liasi la wɛli.

²¹Nde aɛ angoimelel’iyo, eoka bato boeta kama inɛi bakolamba iɔlɛ la basotinyana bikanɔ mbo angola yeka, angomwa ani bakoli ko Paulo; la basoengana kwani, basoumbakela ko lisakä liaɛ.

²²Ongoma Komanda lomach’isenge akɛkɛ ani asoim’inde mbo— Okambesëke oto loasɔ elosois’aɛ ende’mi!

²³Limɔ inde lota betoli oso ya basilikani, bato ambale lioi, inde mbo— Komiaka basilikani mia imbale amamwito la bato kama bosambale ebatalekemi nda funda la bato mia imbale ba bakonga mbo bakɛkɛ ko la ocho,

²⁴la funda yotola Paulo mbo biiyesek’inde la wɛli ko ende Felika ako Gouverneur.

²⁵Inde losɔnɔ lokasa la ebaoi-ba, mbo—

²⁶Imi Kalaudio Lusia, isoseela Gouverneur Oyalongeli ako Felika.

²⁷E-boto-yo ako Paulo akuwamelomökö ko la BaYuda ebasiakool’inde ani iso la basilikani bami loyaomana lau, iso loɔnɔkɔl’inde atiteni yau ani yokakä mbo ende iote sha Loma.

²⁸La eoka yalɛmbɛkɛ ndoluwa litina lia liwanjeli liau owanjela Paulo, imi lɔkɛ lande nda Ikumbɛ shau.

²⁹Imi loluwa mbo awanjelomökö loasɔ loa tofenya twa Bikela yau angɛnɛ, inga eoka ya loasɔ loengani la liwa angoko bɔnyɔlɔlɔ.

³⁰Limɔ aluwesomokö’mi mbo basotwana kuko yool’inde, lisasaya isotom’inde end’aɛ la isokambesa bawanjeli bande mbo baongeke loasɔ loande ko end’aɛ.

³¹Ongoma basilikani lounda Paulo, iyo lɔkɛsɛ inde, kwa akambesomokö iyo, ko la ocho nda Antipatuli;

³²limɔ lɛlɛngɔ basilikani ebakɛndɛkɛ la bakolo, iyo loinwa nda ndakɔ yau nda Yelusaleme, iyo lomacha ebatalemi nda funda mbo bakɛsɛnɛkɛ lande,

³³limɔ iyo ana loiyela Kaisalia, iyo lofaefaka Gouverneur lokasa, iyo loemesa Paulo oso wande.

³⁴Atangak’inde lokasa, Felika lofela Paulo yese yande la aluwesomokö inde mbo ende wa Kilikia, inde mbo—

³⁵Itooka loasɔ loaɛ la wɛli eyakiyeleke ebatowanjel’aɛ. Inde lokambesa basilikani ndotingana lande nda ndakɔ ya Bɔkɔta Helodi.