Read lokele Tomo Ya Batomomu 24 Bible Online

Tomo Ya Batomomu 24 - lokele bible

Tomo Ya Batomomu 24

¹Mbisa ya bacho bɔɔmwi, Kanga Eyeti ako Anania loya amamwito la biange la ikomya ako Telutulo, iyo lokambesa Gouverneur loasɔ loa Paulo.

²Limɔ atomoko Paulo lioi nda likomyi, Telutulo loakola ndowanjel’inde, inde mbo— Bwana Felika Oyalongeli, eoka ya lokele lofi elosokokɔmɛs’aɛ la mbo tosokomielomo njasɔ wike ko la wɛli waɛ nda yese-ye,

³tosoaolela yao la kelekëlë ya likama mbile bitotina la nda yese etotina.

⁴Kongo ko mbo itaokes’aɛ esole, itosombol’aɛ kwa ayali aɛ la bɔfɔɔmu, mbo wokeke sumbu sinyo sha inango nda loasɔ-lo.

⁵Tosɔɛnɛ to e-boto-yo wa bɔfɛnɔa, mbo ende bɔfɔɔli wa liyombayombesi lia BaYuda nda wenda bototina la botoli oso wa botuka wa eba Nasaleta,

⁶oyakotaka ango ndobebesa Ndakɔ ya Mungu, nde iso loundes’inde,

⁷mbo tokomielek’inde ko la bikela yasu; kongo ko Komanda Lusia loyaɔnɔkɔl’inde nda besamba yasu la bofoka, inde loonga mbo loasɔ loyeke oso waɛ,

⁸nde akakɔtɔlɛkɛ aɛ inde angɛnɛ; aɛ kokɔkɔlɔ ndoluwa loasɔ loande lototina elosoesh’iso end’aɛ.

⁹La BaYuda imɔ lokuliana lande nda baoi batotina mbo lole ango ko ani.

¹⁰Limɔ amekulaka Gouverneur mbo aongeke, Paulo lomutola liwanjeli, inde mbo— Ko la limɛngɔ itotungelesa liwanjeli lia loasɔ loami eoka isolembeela mbo ko la miaka wike aɛ nd’asoyala wati wa eba yese-ye.

¹¹Otokɔkɔlɔ ndofela la boluwaka mbo bacho baketi ango liu la ambale, ani aiki’mi ndosemola Mungu nda Yelusaleme,

¹²la batiosheke’mi ani isofenyakana la boto, ango ani isofɔɔlɔ limbilititi lia bato, kwa nda Ndakɔ ya Mungu, kwa nda bisɔngɔmɛlɔ, kwa nda bokenge,

¹³la batikɔkɔlɛ ndokɔcha nda batoi baɛ liwanjeli liau owanjela’mi kwani.

¹⁴Nde itoaola oso waɛ mbo itosemokola Mungu wa batata basu ko la Mboka eyetotang’iyo mbo botuka wa tofenya; isoimela bitotina eyaekesomoko nda Bikela la eyatomoko nda Kasa ya Batɔndɔli;

¹⁵yende la iyɛli sha Mungu esile imɔ ko l’ebatowanjela’mi, siko mbo lilayalaka nde litɛmwi nda liwa lia ebengani l’ebatiengane.

¹⁶Eokao, isotakela bolenda mbo iyaleke la botema wa esaela ende Mungu la ende bato lisanga ko mbile bitotina.

¹⁷Imi yayaka, ani isoetesa miaka bimɔi, ndoyakusola lifaefi la bakaɔ ende bato ba tukela yami;

¹⁸nde akelaka’mi ongoma, iyo loosha’mi nda Ndakɔ ya Mungu ani yende la bosalu, itiyaleke la limbilititi lia bato, itiyaleke la bosho;

¹⁹kongo ko BaYuda bamɔi ba Asia omao-beyala nde lami la loasɔ ani lole loau mbo bemesaneke oso waɛ ndowanjela’mi.

²⁰Eya loti ani, ebato-ba angɛnɛ baongeke litwanelo eliɛnɛk’iyo wɛnɛ lami ani ayalaka’mi oso wa Ikumbɛ; sakolo ngo ko liolo limwito eliaongaka’mi,

²¹ani amamaka’mi eyemalaka’mi sisi yau, liko mbo— Loende ko loasɔ loa litɛmwi nda liwa elosokomielomo’mi louse oso wanu.

²²Nde Felika, oyaluwaka sumbu la wɛli, njasɔ-bi ya botuteli wa Yesu, inde lotaombakeles’iyo, inde mbo— Akayeke Komanda Lusia ko ono, itoaesa loasɔ loaɛ se la wɛli.

²³Inde lota botoli oso wa basilikani ndola mbo batinganeke la Paulo la wɛli la booto imɔ, angokufesa bato bande ndoyasung’inde.

²⁴Mbisa ya bacho bamɔi, Felika loya amamwito la wali wande ako Dulusila, boseka wa BaYuda; inde lota Paulo lioi, limɔ inde looka inango shande loasɔ loa liimeli lioimela Yesu Masiya.

²⁵Kongo ko anangolaka Paulo njasɔ ya liengani la likakalesi lia yɛmɛ la likomyi elikayeke, limɔ Felika lotalimwa la bɔwa, inde mbo— Takɛndɛkɛ kwani, yɛnɛ fofe, itot’aɛ lioi liasi.

²⁶Felika akɛsɛkɛ imɔ iyɛli mbo Paulo efaka nda inde bosömbo, eokao inde lotak’inde lioi mbile la mbile mbo ayeke oyaongana lande.

²⁷Kongoko mbisa ya miaka imbale, Polokio Feseto lofomo isosha nda lifa lia Felika; limɔ Felika angɛnɛ lomacha Paulo nda bɔnyɔlɔlɔ eoka ya iyambacha shookesa BaYuda bolau.