Read lokele Tomo Ya Batomomu 25 Bible Online

Tomo Ya Batomomu 25 - lokele bible

Tomo Ya Batomomu 25

¹Afomokö to Feseto isosha likolo lia yese, la asilak’inde ko becho isatɔ, inde losokwa nda Kaisalia okakɛ nda Yelusaleme.

²Omao kanga ebieti la betoli oso ya BaYuda lokambesa Feseto loasɔ loa Paulo, iyo losombola Feseto,

³mbo akeelek’iyo booto boko mbo atomek’inde nda Yelusaleme, nde iyo angɛnɛ lokomya ndolamba iɔlɛ shool’inde nda mboka.

⁴Nde Feseto lomutola mbo Paulo akandomu bɔnyɔlɔlɔ nda Kaisalia la mbo inde ako Feseto asosanga okakɛ omao mbisa ya mbile ko sinyo.

⁵Inde mbo— Bamɔi banu ba isosha bakɛsɛnɛkɛ lami, eya mbo boto-yo eyala la litwanelo, iyo kowanjel’inde ko omao.

⁶Inde lotikala lau bacho bonanɛi ango ko liu, limɔ inde loinwa nda Kaisalia. Lɛlɛngɔ Feseto loyala se nda kɛka ya likomonyi, inde loonga mbo Paulo eshomoko nda likomyi.

⁷Ayak’inde BaYuda ebasokwaka nda Yelusaleme lolingel’inde, iyo lowanjel’inde bawanjeli wike bawaü, nde batiakɔkɔlɔkɔ ndokɔcha bau.

⁸Paulo lomutola la baoi-ba mbo atungeseleke bawanjeli mbo— Ititwanelo litwanelo ango limwito nda Bikela ya BaYuda, kwa loasɔ loa Ndakɔ ya Mungu, kwa ende Kaisala.

⁹Nde Feseto lolɛmbɛ ndoetela BaYuda liambilo, eokao inde lofela Paulo mbo— ¿Olɛmbi nde ndɔkɛ nda Yelusaleme ndokakomielomo ko lami omao?

¹⁰Limɔ Paulo loonga mbo— Yemali nde kwani nda ekomyelo ya Kaisala, olo engani nde mbo ikomielomoko loasɔ-lo; ititwaneloko litwanelo ango limɔi ende BaYuda, kwa aluwi nd’aɛ la wɛli la wɛli.

¹¹Nde eya to mbo yakela loasɔ lobe kwa litwanelo lioengana la liwa, iitoluka mboka yofeka liwa, kongo ko eya mbo bewanjelaka’mi ko wawa, ani angwɛnɛ boto wokɔkɔlɔ ndofa’mi end’iyo lifaefela. Isotela Kaisala bosakɔ, akomieleke’mi loasɔ.

¹²Limɔ Feseto lofelana la Ikumbɛ shande, limɔ inde lomutola la Paulo mbo— Osotela Kaisala bosakɔ, waɛkɛ ngo end’inde.

¹³Etaka bacho bamɔi, Bɔkɔta Akulipa la Belunike loya fɛtɛti yoseela Feseto nda Kaisalia;

¹⁴umwak’iyo omao bacho wike, Feseto lokambesa Bɔkɔta loasɔ loa Paulo, inde mbo— Boto ɔmɔi ale eya, oyamachaka Felika nda bɔnyɔlɔlɔ,

¹⁵la ayalaka’mi nda Yelusaleme, Kanga ebieti la biange ya BaYuda lowanjel’inde oso wami mbo ifek’inde se,

¹⁶la imi lokambes’iyo mbo etiengane la boyaeli wa BaLoma ndofa oto se wawa ani akatowani l’ɔmbɔ l’ɔmbɔ l’ebatowanjel’inde la fofe yomutoela bawanjeli ebasowanjelomo inde.

¹⁷Eokao ayak’iyo eyamaya, itiaumbakelaka, nde lɛlɛngɔ imi loyala se nda kɛka ya likomonyi, imi loonga mbo boto-yo aeshomoko nda likomyi.

¹⁸Emalaka bawanjeli, batiawanjel’inde la njasɔ ibe eyaenyelaka’mi;

¹⁹kongo ko bafenyakanaka loasɔ loa yao ebisoimelomo lau angɛnɛ la loasɔ loa ɔmɔi ako Yesu oyawaka, oyaongaka Paulo mbo akoyala la liwawi.

²⁰Alefaka’mi mboka yooshaka batina ba loasɔ mbo ikomyele loao, imi lofel’inde kwa mbo atolɛmbɛ ndɔkɛ nda Yelusaleme, ndokakomielomo loao ko omao.

²¹Nde afelaka Paulo mbo atatikala ko ndokakomielomo ko la Kaisala, imi lota ndola mbo aundomoko nda bɔnyɔlɔlɔ konda mbile eyekatomeke’mi otom’inde ende Kaisala.

²²Akulipa loonga la Feseto mbo— Imi angɛnɛ ilɛmbi ndok’inde. Feseto mbo— Lɛlɛngɔ kongo, wokak’inde.

²³Ongoma lɛlɛngɔ Agulipa la Belunike loya la balɛngɔ la bɔfɛkɔ finɛ amamwito la eba Komanda la biange ya okenge, iyo lɔɔtɔ nda eatelo ya njasɔ; limɔ Feseto loonga mbo baesheke Paulo.

²⁴Limɔ Feseto loonga mbo— Bɔkɔta Agulipa la ino batolome batotina ebayali amamwito lasu, bosɔɛnɛ e-boto-yo; BaYuda batotina basofelaka’mi loasɔ loande, la nda Yelusaleme la ono imɔ, basoanjanja mbo lotiengane mbo atikaleke ango la liwawi imɔ.

²⁵Nde imi angɛnɛ yɛnɛkɛ̈ mbo atikele loasɔ ango lɔmɔi loengana la liwa, kongo ko inde angɛnɛ asofela ndokakomyomo la Kaisala, eokao isosanga ndotom’inde nda Loma.

²⁶Nde itiɛnɛ loasɔ angɛnɛ losɔnɛlɛ nda lokasa lotɔkɛ ende Ngɛnɛ wasu ako Kaisala, eokao isoesh’inde oso wanu, simbi to oso waɛ Bɔkɔta Agulipa, litina mbo akakɔtɔlɔmɔk’inde, yɛnɛ to lioi liosɔnɔ nda lokasa,

²⁷eoka itangi nde mbo ende efinole ndotoma boto nda bɔnyɔlɔlɔ angoluwesa loasɔ elotowanjelomo inde.