Read lokele Tomo Ya Batomomu 27 Bible Online

Tomo Ya Batomomu 27 - lokele bible

Tomo Ya Batomomu 27

¹Akomyak’iyo mbo tɔkɛkɛ ko la watɔ wa lofofo ko nda yese ya Italia iyo lota Paulo la ebakandomu basi nda besamba ya botoli oso wa basilikani, ako Yulio wa botuka wa basilikani ebotangomu mbo Wa Auguseto.

²Iso lokwa nda watɔ wa okenge wa Adulamutio ewasangaka ndoetaeta bekenge ebile nda boili wa Asia, limɔ iso loilia owale; Alisitalako, boto wa bokenge wa Tesaloniko nda Makedonia, inde lɔkɛsɛnɛ lasu nda watɔ.

³Lɛlɛngɔ iso loelama nda Sidona, lamao Yulio lookela Paulo booto, inde lomacha Paulo mbo aɛkɛ baina mbo bakukyeke inde sumbu.

⁴Iliak’iso owale liasi, iso loeta fangi eyemɔi ya bosanga wa Kupolio, eoka lofofo lokufesak’iso ndoleka ko la fangi ya wali.

⁵Alekak’iso eliya eyele owale wa Kilikia la Pamfulia, iso loiyela bokenge ɔmɔi wa Lukia boko Mula.

⁶Omao botoli oso wa basilikani loosha ɛɛndɔ ya watɔ wa okenge boko Alesandulia eyetɔkɛ nda Italia, inde lot’iso nda wao.

⁷Aɛk’iso la lofofo ko tenenetenene, bacho bamɔi, iso loiya ko la tale nda Kinido, limɔ eoka mbo lofofo lokufesak’iso ɔkɛ ko fii, iso loeta fangi ya bɔlɔkɔ wa bosanga boko Kulete, tina la kolo eko Salomone.

⁸Ko la bowau, iso lotakela bosanga se, la ongoma iso loiyela elela eyatangomoko mbo Bɛlɔkɔ-belau tina la bokenge boko Lasea.

⁹Etaka mbile yumwa ongoma, lɔkɛndɔ loa watɔ loya la tale finɛ eoka bolanga (nda mbile ya Lokufo-loa-yeka) bosoeta la fomba bitoyala,

¹⁰ongoma Paulo lofaef’iyo likakanelo mbo— Batolome, isoɛnɛ mbo lɔkɛndɔ-lo lotoyala nde la tale la bifembi finɛ, inga nda biengo la watɔ angɛnɛ kongo, kanga imɔ ko nda komba yasu bato.

¹¹Nde Yulio ɛtɛmɛlɛkɛ baoi ba kapitɛni la ngɛnɛ wa watɔ, inga baoi ba Paulo.

¹²Limɔ eoka bɔlɔkɔ botiengane wotikala ko la tengai ya bɔfɛfyɔ, bato ebalongeli basangaka ndoiliaka owale liasi, mbo bakoteke eluwa bɛkɔkɔlɔ ndoiyela Foinike eko lifɔtɔ elile nda bosanga wa Kulete la elitoɛnɛlɛ fangi eyetofofa fofo imbale, mbo batayalaka omao la mbile ya bɔfɛfyɔ.

¹³Limɔ afofaka lofofo lolau loa fangi ya Afilika, iyo loenyela mbo basɔɔlɔ fofe eyelɛmb’iyo, eokao iyo losɔmbɔlɔ tondo, iyo lokatakele ngɔngɛ ya Kulete se.

¹⁴Nde mbisa ya mbile ko sinyo, lomba loa likama loko elotosokwa nda föngo ya bosanga, loao loomanel’iyo, lototangomo lina mbo Eulakulo.

¹⁵Limɔ eoka watɔ lokɔkɔmɔ, angokɔkɔlɔ otambak’imɔ bɔmbɔ nda lofofo, iso lomacha watɔ ndotinjomo la lofofo;

¹⁶limɔ iso lɔɔtɔ bɔlɔkɔ wa bosanga bɔkɛkɛ boko Kauda, limɔ iso losulia etumbe ya watɔ ko la owau.

¹⁷Ilak’iyo etumbe nda balia, iyo lɔsɔ bangwändä ba bekulu, iyo lokandakana watɔ la bao, buu ko la bɔkɔngɔ. Limɔ eoka mbo iyo lowanga mbo watɔ botaswama se nda boke boko Sulutisi, iyo losulola hema ya lofofo se, iyo lochaa ko ongoma.

¹⁸Nde kwa aomanelo iso batutu finɛ, lɛlɛngɔ iso loakola ndɔwɛlɛ biengo ebisoaa watɔ se nda balia;

¹⁹limɔ nda lise lia asatɔ iyo lɔwɛlɛkɛ hema la bekulu ya watɔ se nda balia.

²⁰Ko la bacho wike liso-lia-use la tolonge angɔɛnɛlɛ la ngumba loetela likama, yao loomakana lasu, ongoma totiakɛsɛk’imɔ iyɛli liasi mbo touwesomoko nde.

²¹Lamao, eoka batialaka imɔ bieka ko la mbile yumwa, Paulo loemala sisi yau la inde loonga mbo— Batolome, wakuliaka kwa aongaka’mi mbo iso angotasokwa nda Kulete, ani totiweke efembi la e-lituwami-li.

²²Nde yaimwesaka kwani betema yanu, eoka angwɛnɛ angɔmɔi wanu wɔsɛɛsɛlɛ, sakolo ngo ko watɔ kongo,

²³eoka la ocho-bo bokitomo wa Mungu, oyale Ngɛnɛ wami la oyatosemokola’mi osemol’Inde, inde loemala tina lami,

²⁴inde mbo— Owangëke, Paulo, lole loaɛ ndoemala oso wa Kaisala, tɛnɛ ngo Mungu asofaef’aɛ bawawi ba batotina ebasɔkɛsɛnɛ laɛ nda watɔ.

²⁵Ko l’eokao, Batolome, yaimwesaka betema yanu, isoimela nde Mungu mbo lotoyak’end’iso oko ani akambesomoko’mi,

²⁶Kongo ko iso la watɔ toomelaka nde nda bosanga ɔmɔi.

²⁷Bocho ona waaka ewa liu la anɛi ewasokwak’iso nda Bɛlɔkɔ, la iso lochacha nda eliya ya Adelia, limɔ tina la ɛsɔkɔ ya ocho, basali ba watɔ lotanga nde mbo boili bokoya oko tina;

²⁸eokao iyo lokweela bolundu wa balia, iyo lota yiso litinda limɔi. Limɔ mbisa sumbu, iyo lokweela liasi, iyo lota yiso liu la bɔɔmwi.

²⁹Limɔ awangak’iyo mbo watɔ botaomela ko nda ngɔngɛ ya batalɛ, iyo lokushaka tondo binɛi nda wendo, iyo losombola mbo bonyanya boyeke.

³⁰Nde basali ba watɔ loluka fofe yokwa botili, iyo lota etumbe nda balia liasi, iyo lokwela la bolimbake mbo batokakusha tondo yasi nda bɔmbɔ wa watɔ.

³¹Kongo ko Paulo loonga la Komanda Yulio la basilikani mbo— Sakolo ko e-bato-ba kotikala nda watɔ, ani ino angokɔkɔlɔ ndouwesomo.

³²Kwaamao basilikani lotenaka bekulu ya etumbe, iyo lomacha yao ndokwa se nda balia.

³³Oso wa bonyanya sumbu, Paulo lɔɔnjɔnj’iyo yaatotina mbo baleke bieka, inde mbo— Ko la becho liu la inɛi ino osoumwaka ndoombakela, angola bieka;

³⁴eokao itolɔmbɔkɔlɔk’ino mbo boleke sumbu bieka, eoka louweso loanu losolendelo ngo ko yao, eoka angwɛnɛ loswee ango lɔmɔi loa botö wa ɔmɔi wanu kosɛɛsɛlɛ.

³⁵Aongaka Paulo ongoma, inde lounda lituma, inde lofaefa Mungu kelekëlë oso wau yaatotina, limɔ inde louna liao, inde loakola ndola liao.

³⁶Limɔ iyo batotina loyaima betema, iyo imɔ lola bieka.

³⁷Iso yaatotina nda watɔ twaaka bato mia imbale la kama bosambale la bato liambɛ.

³⁸Okaneloko iyo bieka, iyo lokushaka bofonga nda balia eoka ndolɛfɛsɛ watɔ.

³⁹Asɔswaka bonyanya, batialembeelaka boili, nde iyo lɔɛnɛ bɔnɔkɔ wa botima la ngɔngɛ ya boke, iyo losanga mbo, bekɔkɔlɔ, iyo koswamesa watɔ se ko omao;

⁴⁰limɔ iyo lotenaka bekulu ya tondo, iyo lomacha yao nda balia, la mbile-ao iyo lofaikola bikandelo ya bowacheli. Limɔ iyo loemesa hema ya lofofo ya bɔmbɔ fii, iyo lotamba watɔ boomaneke nda ngɔngɛ.

⁴¹Nde iyo loiyela nda nyɛlɛ atiteni ya bɔɛsɔ la botalangu, iyo loswamesa watɔ se la bɔmbɔ loundana angokɔkɔlɔ ndosɔngwa omao, nde wendo loakola ndoachaacha eoka ya batutu ebasoomakana la wao.

⁴²Limɔ basilikani losanga mbo boleke bato ba bɔnyɔlɔlɔ mbo bataungwa nda balia nde kokwa otili.

⁴³Kongo ko Komanda Yulio lokufesa lisangi liau eoka alɛmbɛkɛ ndouwesa Paulo. Inde lota ndola mbo ebaluwi balia, bungweke nda bao oso ndokakɛ nda boili,

⁴⁴limɔ ebatikali batalemeke nda baonga la biengo yasi ya watɔ. Ongoma batotina loiya nda boili la louweso.